សង្គ្រាមពាក្យសំដីវិលវល់ក្នុងនយោបាយខ្មែរ
ចុះផ្សាយនៅថ្ងៃ៖
ស្តាប់ - ០៣:១៩
ជារឿយៗសង្គ្រាមវោហាសាស្រ្តតែងតែកើតក្នុងនយោបាយកម្ពុជា។ ជួនកាលសង្គ្រាមទស្សនវិជ្ជានេះបានរុញច្រានដល់ភាពតានតឹងគួរឲ្យព្រួយបារម្ភទៀតផង។
រយៈពេលប៉ុន្មានសប្តាហ៍មកនេះមេដឹកនាំនយោបាយនៃគណបក្សធំៗទាំងពីរក្នុងប្រទេសកម្ពុជាគឺមេដឹកនាំគណបក្សប្រជាជនកម្ពុជានិងគណបក្សសង្គ្រោះជាតិបានប្រើប្រាស់វោហាសាស្ត្រឆ្លើយឆ្លងដាក់គ្នាទៅវិញទៅមកដែលធ្វើអោយកើតជាសង្គ្រាមពាក្យសំដីយ៉ាងស្រួចស្រាវ។ មួយវិញទៀតពាក្យសំដីទាំងនោះបានដុតកំដៅនយោបាយឲ្យមានភាពតានតឹងខុសប្រក្រតី។
ការពិតវាមិនមានអ្វីប្លែកនោះទេនៅក្នុងឆាកនយោបាយខ្មែរ។ ពីព្រោះថាវោហាសាស្ដ្រនេះគឺជាយុទ្ធសាស្ដ្រមួយរបស់អ្នកនយោបាយ។
នៅប្រទេសជឿនលឿនវោហាសាស្រ្តនយោបាយផ្តោតជាពិសេសលើចំណុចខ្សោយរបស់គូប្រជែងជាក់ស្តែងក្នុងអំឡុងពេលឆ្ពោះទៅកាន់ការបោះឆ្នោត។ ការផ្តោតលើចំណុចខ្សោយទាំងនោះជាមូលដ្ឋាននៃការរិះគន់ផងនិងស្ថាបនាផង។
ដោយឡែកសង្គ្រាមពាក្យសំដីនៅក្នុងនយោបាយកម្ពុជាមានលក្ខណៈវាយប្រហារ វាយបកនិងការពារខ្លួន។ ហើយវាក៏ជាវិធីដែលអ្នកនយោបាយខ្មែរប្រើសម្រាប់ទាក់ទាញចំណាប់អារម្មណ៍និងប្រជាប្រិយភាពផងដែរ។
ប៉ុន្តែសង្គ្រាមពាក្យសំដីក្នុងជីវភាពនយោបាយកម្ពុជាតែងតែរុលទៅហួសព្រំដែនសិល្បៈនយោបាយឬទស្សនវិជ្ជានយោបាយហើយបានក្លាយជាការយកចាញ់យកឈ្នះមួយគ្រា មុននឹងអាចរកចំណុចដោះស្រាយឬសម្រួលឡើងវិញបាន។
ថ្វីបើសង្គ្រាមពាក្យសំដីជាផ្នែកមួយនៃចំណែកប្រជាធិបតេយ្យក្នុងប្រទេស ប៉ុន្តែការណ៍នេះតែងតែបង្កឲ្យមានការព្រួយបារម្ភ ការភ័យខ្លាចទាំងសម្រាប់ប្រជាជាតិកម្ពុជាខ្លួនឯង ទាំងសម្រាប់អ្នកបណ្តាក់ទុនបរទេសមកកាន់កម្ពុជា ដ្បិតកម្ពុជាបានឆ្លងកាត់បទពិសោធន៍នយោបាយបែបហិង្សាច្រើនដំណាក់កាលមកហើយ។ ហើយកម្ពុជាហាក់ដូចជាសត្វឆ្មារដែលធ្លាប់រលាកទឹកក្តៅដែលមិនទាន់រាងចាលនៅឡើយ។
ដូច្នេះសង្គ្រាមវោហាសាស្រ្តរវាងអ្នកនយោបាយដែលមាននិន្នាការផ្ទុយគ្នានៅកម្ពុជាងាយនឹងធ្វើឲ្យនយោបាយក្នុងប្រទេសផុយស្រួយ។
ដើម្បីចៀសវាងនូវសង្គ្រាមពាក្យសំដីដ៏គួរឲ្យគ្រោះថ្នាក់នោះ អ្នកនយោបាយខ្មែរគួរចេះកំណត់ព្រំដែននៃសិល្បៈរបស់ខ្លួន ត្រូវប្រើប្រាស់វោហាសព្ទ័ដោយឈរលើមូលដ្ឋានច្បាប់ចៀសវាង ការប្រើវោហាសាស្ដ្រគ្រាន់តែដើម្បីការចោទប្រកាន់ ឬគ្រាន់តែប្រជាភិថុត។ អ្នកនយោបាយកម្ពុជាគួរប្រើភាពប៉ិនប្រសព្វរបស់ខ្លួនមិនមែនគ្រាន់តែដើម្បីការពារឬដណ្តើមអំណាចតែប៉ុណ្ណោះទេ ប៉ុន្តែគឺដើម្បីស្រោចស្រង់សេដ្ឋកិច្ចជាតិនិងលើកមុខមាត់ជាតិជាចម្បង។
អ្នកនយោបាយគួរតែស្ថិតក្នុងភាពវ័យឆ្លាត ចៀសវាងការបង្កការភ័យខ្លាច តក់ស្លុតដល់ប្រជារាស្ដ្រ ប៉ុន្តែច្បិចយកភាពខ្វះចន្លោះរបស់គូប្រជែងនិងធ្វើការកែលំអឲ្យកាន់តែប្រសើរ។
ជាងនេះទៅទៀតអ្នកនយោបាយឬ បក្សនយោបាយគួរតែហ៊ានទទួលយកការរិះគន់ពីគ្នា ហើយក៏ត្រូវហ៊ានទទួលស្គាល់ភាពវិជ្ជមានពីគ្នាផងដែរ។ អ្នកនយោបាយគួរតែកុំវិលវល់ក្នុងអតីតកាល ប៉ុន្តែត្រូវសម្លឹងឆ្ពោះទៅមុខទាំងអស់គ្នានោះទើបអាចគេចផុតពីភាពច្រំដែល ដែលជាគំរូអាក្រក់ក្នុងនយោបាយកម្ពុជា៕
បទវិភាគរបស់ គង់ សុឋានរិទ្ធ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ