ខួបកិច្ចព្រមព្រៀងក្រុងប៉ារីស មានការឱ្យតម្លៃផ្សេងគ្នា
នៅថ្ងៃទី២៣ តុលា ២០១៥ នេះគឺជាខួបទី២៤ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស។ ជាកិច្ចព្រមព្រៀងដែលភាគីជម្លោះនៅកម្ពុជាទាំង៤ បានចុះហត្ថលេខាបញ្ចប់សង្គ្រាមស៊ីវិល៣ទស្សវត្សនៅកម្ពុជា។ ទន្ទឹមនេះ គណបក្សសង្គ្រោះជាតិបានប្រារព្ឋខួប នៅខេត្តកំពង់ស្ពឺ ដោយឡែកគណបក្សប្រជាជនកម្ពុជាវិញមិនបានប្រារព្ឋខួបនេះនោះទេ។ ប៉ុន្តែក្រុមយុវជនមួយចំនួនបានប្រារព្ឋខួបប្រវត្តិសាស្ត្រនេះ នៅខេត្តចំនួន៥ផ្សេងគ្នាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ការប្រារព្ឋខួប២៤ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ត្រូវបានគណបក្សសង្គ្រោះជាតិឱ្យតម្លៃជាព្រឹត្តិការណ៍ធំ ប៉ុន្តែរដ្ឋាភិបាល នៃគណបក្សកាន់អំណាច និងគណបក្សផ្សេងៗ មិនបានប្រារព្ឋទិវានេះនោះទេ។ គណបក្សសង្គ្រោះជាតិ បានប្រមូលផ្តុំថ្នាក់ដឹកនាំ និងសមាជិកនៅខេត្តកំពង់ស្ពឺដែលមានការចូលរួមពីប្រធានស្តីទីគណបក្សលោក កឹម សុខា។ សម្រាប់លោក កឹម សុខា កិច្ចព្រមព្រៀងដែលមានអាយុ២៤ឆ្នាំនេះ គឺ«ជាការផ្តល់កំណើតថ្មីដល់កម្ពុជា និងជាមូលដ្ឋានដ៏សំខាន់ ឈានទៅអនុម័តរដ្ឋធម្មនុញ្ញ និងបង្កើតឲ្យមានរបបប្រជាធិបតេយ្យសេរីពហុបក្សនៅកម្ពុជា»។ ទន្ទឹមនឹងនេះ លោក កឹម សុខា ក៏បានអំពាវនាវជាទូទៅដល់គ្រប់ភាគីនយោបាយឱ្យគោរពកិច្ចព្រមព្រៀងសន្តិភាពឱ្យបានចប់ចុងចប់ដើមផងដែរ។
ដោយឡែកគណបក្សប្រជាជនកម្ពុជា ក៏ដូចជារដ្ឋាភិបាលវិញ មិនបានប្រារព្ឋខួបទី២៤ឆ្នាំនៃកិច្ចព្រមព្រៀងសន្តិភាពនេះនោះទេ។ លោក សុខ ឥសាន្ត អ្នកនាំពាក្យគណបក្សបានមានប្រសាសន៍ថា ការគោរពកិច្ចព្រមព្រៀងគឺមិនមែនគ្រាន់តែជាការ អុចធូបគោរពនោះឡើយ។ គណបក្សកាន់អំណាចដែលដឹកនាំរដ្ឋាភិបាលជាង៣០ឆ្នាំមកហើយនោះ បានអនុវត្ត និងគោរពនៅស្មារតីនៃកិច្ចព្រមព្រៀងនេះយ៉ាងខ្ជាប់ខ្ជួន។ បន្ថែមពីនេះ គណបក្សកាន់អំណាចមិនត្រឹមតែជាស្ថាបនិកនោះទេ ថែមទាំងជាអ្នកបង្រួបបង្រួមឱ្យមានសន្តិភាពពិតប្រាកដនៅកម្ពុជាតាំងពីឆ្នាំ១៩៩៨មក។ ពោលគឺ ៧ឆ្នាំក្រោយការចុះហត្ថលេខា។ ឆ្នាំ១៩៩៨ ជាឆ្នាំដែលរលាយបាត់ទៅនៃកម្លាំងទ័ពព្រៃខ្មែរក្រហម ក្រោយសមាហរណកម្មជាមួយរដ្ឋាភិបាល។
ចំណែកឯគណបក្សហ៊្វុនស៊ិនប៉ិចដែលជាស្ថាបនិកមួយរូបនៃកិច្ចព្រមព្រៀងសន្តិភាពទីក្រុងប៉ារីសនេះដែរ មិនបានប្រារព្ឋព្រឹត្តិការណ៍ជាប្រវត្តិសាស្ត្រនេះដែរ។ សម្រាប់ហ៊្វុនស៊ិនប៉ិច កិច្ចព្រមព្រៀងក្រុងប៉ារីស គឺជាស្នាព្រះហស្ថរបស់អតីតព្រះមហាក្សត្រសម្តេចឪ នរោត្តមសីហនុ។ នេះបើតាមការបញ្ជាក់ពីលោក ញ៉េប ប៊ុនជិន អ្នកនាំពាក្យគណបក្ស។
ខុសពីគណបក្សកាន់អំណាច និងហ៊្វុនស៊ិនប៉ិច ក្រុមយុវជនដែលមានឈ្មោះថា ក្រុមប្រឹក្សាកិច្ចការសាធារណៈកម្ពុជាវិញ ក៏បានប្រារព្ឋការជួបជុំដើម្បីរំលឹកទិវាជាប្រវត្តិសាស្ត្រនេះដែរ។ លោក បូពៅ អ្នករៀបចំកម្មវិធី បានឱ្យដឹងថា ក្រុមរបស់លោកបានរៀបចំប្រារព្ឋកម្មវិធីនេះចំនួន ៥កន្លែងផ្សេងគ្នា ដូចជានៅភ្នំពេញ ខេត្តតាកែវ កំពង់ចាម បាត់ដំបង និងសៀមរាបជាដើម។ ជាការជួបជុំដើម្បីផ្សព្វផ្សាយពីខ្លឹមសារនៃកិច្ចព្រមព្រៀងទីក្រុងប៉ារីស បើទោះបីជាការជួបជុំមួយចំនួនត្រូវបានបង្ខំពីអាជ្ញាធរឱ្យបញ្ចប់មុនការគ្រោងទុកក៏ដោយ។
សូមរំលឹកថា កិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ តុលា ឆ្នាំ១៩៩១ គឺជាថ្ងៃប្រវត្តិសាស្ត្រដែលគ្រប់គូជម្លោះនយោបាយនៅកម្ពុជាបានចុះហត្ថលេខាដើម្បីសង្គ្រាមស៊ីវិលជាង៣ទស្សវត្សនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ