សកម្មជនគណបក្សប្រឆាំងម្នាក់ត្រូវបានតុលាការកាត់ទោសឲ្យជាប់ពន្ធនាគារពីរឆ្នាំ
តុលាការសាលាដំបូងរាជធានីភ្នំពេញនៅព្រឹកថ្ងៃទី១០កញ្ញានេះបានបើកសវនាការកាត់ទោស លោក អ៊ុក ពេជ្រសំណាង សកម្មជនគណបក្សសង្រ្គោះជាតិឲ្យជាប់ពន្ធនាគាចំនួន២ឆ្នាំ និងពិន័យជាប្រាក់១៤លានរៀលពីបទបង្កអំពើហិង្សា និងប្រឆាំងអ្នករាជការសាធារណៈ។ លោក អ៊ុក ពេជ្រសំណាង ដែលកំពុងជាប់ពន្ធនាគាស្រាប់នោះ ក៏កំពុងជាប់ចោទក្នុងករណី រំដោះទីលានប្រជាធិបតេយ្យ កាលពីខែកក្កដាឆ្នាំ២០១៤ផងដែរ។
ចុះផ្សាយនៅថ្ងៃ៖
ស្តាប់ - ០១:៣៥
លោក អ៊ុក ពេជ្រសំណាង សកម្មជនគណបក្សសង្រ្គោះជាតិ ត្រូវបានសាលាដំបូងរាជធានីភ្នំពេញ នៅព្រឹកថ្ងៃទី ១០ កញ្ញា នេះសម្រេចឲ្យជាប់ពន្ធនាគារ រយៈពេលពីរឆ្នាំ ពីបទបង្កអំពើហិង្សា និងប្រឆាំងអ្នករាជការសាធារណៈ។ ជាមួយគ្នានេះ សកម្មជនគណបក្សសង្រ្គោះជាតិរូបនេះ ក៏ត្រូវបានតុលាការ ពិន័យជាទឹកប្រាក់ចំនួន ១៤លានរៀល ផងដែរ។
លោក ជួង ជូងី មេធាវីការពារក្តីរបស់ លោក អ៊ុក ពេជ្រសំណាង បាននិយាយថា ការផ្តន្ទនាទោសឲ្យជាប់ពន្ធនាគារ២ឆ្នាំ និងពិន័យជាទឹកប្រាក់ ១៤ លានរៀលគឺជាអំពើអយុត្តិធម៌សម្រាប់កូនក្តីរបស់លោក។ អយុត្តិធម៌ដោយសារតែ នៅពេលសួរដេញដោលនៅក្នុងតុលាការ មិនមានភស្តុតាងឬសាក្សីណាមួយបញ្ជាក់ថា លោក អ៊ុក ពេជ្រសំណាង បានប្រើហឹង្សាទៅលើនរណាម្នាក់ឡើយ សូម្បីតែសន្តិសុខដែលជាជនរងគ្រោះ ដោយសារតែការប៉ះទង្គិចគ្នានៅថ្ងៃកើតហេតុនោះ។
ជាពិសេស នៅពេលដែលតុលាការចាក់វីដេអូឃ្លីប ក៏មិនឃើញមានវត្តមាន កូនក្តីរបស់លោកធ្វើសកម្មភាពអ្វី នោះដែរ។ ចំណែកឯលោក អ៊ុក ពេជ្រសំណាង បានស្រែកថា នេះជារឿងអយុត្តិធម៌សម្រាប់រូបលោក ហើយថា នេះគឺជារឿងនយោបាយ។ លោកថា អ្វីដែលលោកបានធ្វើគឺការងារជួយសង្គមតែប៉ុណ្ណោះ។
សូមបញ្ជាក់ថា លោក អ៊ុក ពេជ្រសំណាង កាលពីថ្ងៃទី២១ ខែកក្កដា ក៏ត្រូវបានតុលាការសាលាដំបូងរាជធានីភ្នំពេញកាត់ទោស ឲ្យជាប់ពន្ធនាគារ៧ឆ្នាំផងដែរ ពីបទចូលរួមក្នុងចលនាកុប្បកម្មនាំឲ្យមានហិង្សានៅក្បែរទីលានប្រជាធិបតេយ្យកាលពីខែកក្កដា ឆ្នាំ២០១៤។ ក្នុងសំណុំរឿងព្រហ្មទណ្ឌទាំងពីរនេះ មានន័យថា លោក អ៊ុក ពេជ្រសំណាង ត្រូវជាប់ពន្ធនាគាដល់ទៅ៩ឆ្នាំ។ ទោះបីជាយ៉ាងណាក៏ដោយ លោក ជូង ជូងី មេធាវីការពារក្តីឲ្យលោក ពេជ្រ សំណាង បានបញ្ជាក់ថា លោកនឹងដាក់ពាក្យប្តឹងឧទ្ធរណ៍នៅពេលខាងមុខ៕
អត្តបទដោយ៖ សរ ពិសី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ