សកម្មជនCNRPត្រូវបានចោទប្រកាន់បទញុះញង់ឲ្យមានការរើសអើងពូជសាសន៍
លោក ឈា តាំងស៊ន សកម្មជនគណបក្សសង្រ្គោះជាតិប្រចាំស្រុកព្រៃកប្បាស ខេត្តតាកែវ ត្រូវបានតុលាការចោទប្រកាន់ពីបទឲ្យមានការរើសអើងពូជសាសន៍ និងពិន័យ ជាប្រាក់៣លានរៀល។ ទឹកប្រាក់៣លានរៀលនឹងត្រូវពិន័យជូនរដ្ឋ។
ចុះផ្សាយនៅថ្ងៃ៖
ស្តាប់ - ០១:៤២
ថ្លែងប្រាប់វិទ្យុបារាំងអន្តរជាតិRFI នាល្ងាចថ្ងៃចន្ទទី០៧កញ្ញា លោក សំ សុគង់ មេធាវីការក្ដី លោក ឈា តាំងស៊ន បានបញ្ជាក់ថា ការចោទប្រកាន់កូនក្ដីរបស់លោកពីបទញុះញង់ឲ្យមានការរើសអើងពូជសាសន៍គឺតុលាការផ្អែកតាមមាត្រា៤៩៦ នៃក្រមព្រហ្មទណ្ឌ។
មូលហេតុដែលឈានដល់ការចោទប្រកាន់ លោកមេធាវី សំ សុគង់ បន្ថែមថាដំបូងឡើយ លោក ឈា តាំងស៊ន ទាញយកឯកសារពីក្នុងហ្វេសមួយស្ដីពីយុទ្ធសាស្ត្រវៀតណាមយកមកចម្លងទុកជាឯកសារ ប៉ុន្តែត្រូវបានសកម្មជនគណបក្សសង្គ្រោះជាតិផ្សេងទៀតឃើញក៏បានសុំមើល។ ដូចនេះតុលាការក៏បានចោទប្រកាន់ទៅលោក ឈា តាំងស៊ន ថាបានយកឯកសារទាំងនោះទៅធ្វើការញុះញង់ដើម្បីឲ្យមានការរើសអើងពូជសាសន៍។ ចំពោះការពិន័យជាប្រាក់៣លានរៀល លោកមេធាវី សំ សុគង់ នឹងពិភាក្សាជាមួយលោក ឈា តាំងស៊ន ថា តែគួរបង់ប្រាក់ពិន័យនេះជូនរដ្ឋឫក៏ប្ដឹងបន្តទៅឧទ្ទរណ៍។
លោក សំ សុគង់ បន្តថា ការចោទប្រកាន់មកលើលោក ឈា តាំងស៊ន និងការបង្គាប់ឲ្យបង់ប្រាក់ពិន័យគឺជារឿងមិនត្រឹមត្រូវ។ មិនត្រឹមត្រូវដោយសារតែការទាញយកឯកសារអ្វីមួយពីហ្វេសប៊ុកវាមិនអាចឈានទៅដល់ការញុះញង់ឲ្យមានការរើសអើងពូជសាសន៍នោះទេ។ សូមបញ្ជាក់ថា លោក ឈា តាំងស៊ន ត្រូវបានអាជ្ញាធរចាប់ខ្លួនកាលពីថ្ងៃទី៥ កញ្ញា។ លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានហៅការចោទប្រកាន់នេះថា ជាការបំបិទសិទ្ធសេរីភាពទៅលើសកម្មជនគណបក្សប្រឆាំង។
ចំណែក លោក អំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ យល់ថាការចោទប្រកាន់របស់តុលាការទៅកាន់លោក ឈា តាំងស៊ន ជាសញ្ញាមួយបង្ហាញថា ប៉ះពាល់ដល់សិទ្ធសេរីភាពក្នុងការបញ្ចេញមតិរបស់ពលរដ្ឋ។ ព្រោះថា ការទាញយកឯកសារអ្វីមួយពីហ្វេសប៊ុកចែកគ្នាមើលមិនអាចឈានដល់ការញុះញង់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ