អនុញ្ញាតឲ្យចិញ្ចឹមត្រីឆ្ដោឡើងវិញ៖ សេដាកយល់ថាល្អ តែត្រូវធានាថាមិនយកកូនត្រីធ្វើចំណី
រដ្ឋាភិបាលកម្ពុជា បានសម្រេចអនុញ្ញាតឲ្យមានការចិញ្ចឹមត្រីរ៉ស់ និងត្រីឆ្ដោឡើងវិញ ជាលក្ខណៈគ្រួសារនិងពាណិជ្ជកម្ម បន្ទាប់ពីបានទទួលសំណើពីក្រសួងកសិកម្ម រុក្ខាប្រមាញ់ និងនេសាទ។ បើតាមក្រសួងកសិកម្ម ការចិញ្ចឹមត្រីឆ្ដោនិងត្រីរ៉ស់ អាចកាត់បន្ថយការនាំចូលត្រីមកពីក្រៅប្រទេស និងធ្វើឲ្យសេដ្ឋកិច្ចប្រជាពលរដ្ឋមានភាពល្អប្រសើរជាងមុន។ អង្គការសេដាក យល់ថា ការអនុញ្ញាតឲ្យចិញ្ចឹមត្រីឆ្ដោឡើងវិញ គឺជារឿងល្អ ប៉ុន្តែរដ្ឋាភិបាលត្រូវធានាថា មិនយកកូនត្រីធ្វើចំណីឡើយ។
ចុះផ្សាយនៅថ្ងៃ៖
ស្តាប់ - ០២:៣៣
ខណៈដែលត្រីនៅក្នុងធម្មជាតិមានបរិមាណថយចុះពីមួយឆ្នាំទៅមួយឆ្នាំ លោក សម វិទូ នាយកប្រតិបត្តិអង្គការសេដាក យល់ឃើញថា ការអនុញ្ញាតឲ្យមានការចិញ្ចឹមត្រីរ៉ស់ និងត្រីឆ្ដោឡើងវិញ គឺជារឿងល្អ។ ល្អព្រោះវាអាចជួយផ្គត់ផ្គង់តម្រូវការបរិភោគរបស់ប្រជាពលរដ្ឋ ក៏ដូចជាបង្កើនជីវភាពអ្នកចិញ្ចឹមត្រី។ បើតាមលោក សម វិទូ ត្រីរ៉ស់និងត្រីឆ្ដោ ជាប្រភេទត្រីដែលប្រជាជនខ្មែរទូទៅនិយមចូលចិត្តបរិភាគ។ ត្រីប្រភេទនេះ មានប្រូតេអ៊ីនច្រើន និងមានតម្លៃថ្លៃ។ សព្វថ្ងៃ ត្រីរ៉ស់និងត្រីឆ្ដោដែលដាក់លក់នៅលើទីផ្សារ ភាគច្រើនគឺជាត្រីដែលនាំចូលពីប្រទេសជិតខាង។
យ៉ាងណាក៏ដោយ នាយកប្រតិបត្តិអង្គការសេដាករូបនេះ នៅតែព្រួយបារម្ភ អំពីការប្រើប្រាស់កូនត្រីយកទៅធ្វើជាចំណីសម្រាប់ត្រីឆ្ដោ។ លោកថា រដ្ឋាភិបាលគួរមានគោលការណ៍កំណត់ច្បាស់លាស់អំពីចំណីសម្រាប់ចិញ្ចឹមត្រីឆ្ដោ ដែលអាចប្រើប្រាស់កាកសំណល់ពីសត្តឃាតដ្ឋានជំនួសវិញ។
សូមជម្រាបជូនថា ការសម្រេចរបស់រដ្ឋាភិបាល អនុញ្ញាតឲ្យចិញ្ចឹមត្រីរ៉ស់និងត្រីឆ្ដោឡើងវិញនៅឆ្នាំ២០១៦នេះ កើតឡើងតាមរយៈសំណើរបស់ក្រសួងកសិកម្ម រុក្ខាប្រមាញ់ និងនេសាទ។ លោក វេង សាខុន រដ្ឋមន្ដ្រីក្រសួងកសិកម្ម ដែលទើបឡើងកាន់តំណែងថ្មី បានបញ្ជាក់ថា នៅក្នុងបរិបទបច្ចុប្បន្ន ការចិញ្ចឹមត្រីរ៉ស់ អាចធ្វើទៅបានតាមរយៈការផ្ដល់ចំណីសិប្បនិមិត្ត ហើយមានការលូតលាស់លឿនជាងការផ្ដល់ចំណីជាប្រភេទកូនត្រីទៀតផង។ ដោយឡែក សម្រាប់ត្រីឆ្ដោ បើទោះបីជាមិនទាន់មានចំណីសិប្បនិមិត្តក៏ដោយ ក៏គេមិនចាំបាច់ប្រើប្រាស់កូនត្រីសម្រាប់ជាចំណីទៀតដែរ។ គេអាចប្រើប្រភេទត្រីសមុទ្រល្អិតៗ ដែលកម្ពុជាមានប្រមាណជា៦ម៉ឺនតោនក្នុងមួយឆ្នាំ។ ឬបើពុំដូច្នោះទេ គេអាចប្រើសាច់កណ្ដុរ កាកសំណល់ពីសត្តឃាតដ្ឋាន និងសាច់ខ្យងមាសដែលបំផ្លាញដំណាំស្រូវ ជាចំណីសម្រាប់ត្រីឆ្ដោក៏បាន។
គួររំលឹកថា ត្រីឆ្ដោនិងត្រីរ៉ស់ ត្រូវបានហាមឃាត់លែងឲ្យចិញ្ចឹមនៅកម្ពុជា តាំងពីខែកញ្ញាឆ្នាំ២០០៤ ក្រោមហេតុផលថា ការចិញ្ចឹមប្រភេទត្រីទាំង២នេះ នាំឲ្យមានការប្រើប្រាស់ស្បៃមុងចាប់កូនត្រី ដើម្បីយកទៅធ្វើជាចំណីត្រី។ សកម្មភាពនេះបានបំផ្លាញធនធានត្រីក្នុងទឹកសាប។ ម្យ៉ាង វាជាបទល្មើសនេសាទដែលពិបាកទប់ស្កាត់។ ប៉ុន្តែយ៉ាងណាក៏ដោយ ក្រសួងកសិកម្មនិងស្ថាប័នពាក់ព័ន្ធតែងតែរកឃើញថា ការលួចលាក់ចិញ្ចឹមត្រីឆ្ដោជាលក្ខណៈគ្រួសារ នៅតែមាននៅទូទាំងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ