កម្ពុជាសម្បូរត្រីធម្មជាតិ តែប្រជាជនភាគច្រើនបរិភោគត្រីចិញ្ចឹម
ចុះផ្សាយនៅថ្ងៃ៖
ស្តាប់ - ០៥:៣៧
ជាច្រើនសម័យកាល ប្រទេសកម្ពុជាតែងមានមោទនភាពចំពោះត្រីទឹកសាបរបស់ខ្លួន ដែលជាត្រីធម្មជាតិ មានរសជាតិឆ្ងាញ់។ ក៏ប៉ុន្តែប៉ុន្មានទសវត្សចុងក្រោយនេះ ជនជាតិខ្មែរបាននាំគ្នាទទួលទានត្រីចិញ្ចឹមច្រើនជាងត្រីធម្មជាតិ។ ការធ្វើដូច្នេះក៏ព្រោះតត្រីធម្មជាតិត្រូវបានបំផ្លាញ គ្រប់រូបភាព ជួនពេលដែលចំនួនប្រជាជនខ្មែរមានការកើនឡើង។ ការគោរពច្បាប់ជលផលទាំងអស់គ្នា និងឆន្ទៈរួមគ្នាក្នុងការអភិរក្ស រួមទាំងលុបបំបាត់ រូបភាពផ្សេងៗដែលរំខានដល់ត្រីគេជឿថា កម្ពុជានឹងសម្បូរត្រីធម្មជាតិឡើងវិញ សម្រាប់បំរើដល់ប្រជាពលរដ្ឋក្នុងស្រុក។
កម្ពុជាតូចពិតតែសម្បូរ សម្បត្តិហៀហូរ ហើយប្លែកៗ ត្បូង មាស ធ្យូងថ្ម សំណរ ដែក ប្រេងកាតអនេកនៅក្នុងដី។ មើលទៅមេសូត្រដែលសិស្សធ្លាប់ទន្ទេញចាំមាត់នៅថ្នាក់បឋមសិក្សា ប្រហែលជាគ្រាន់តែនៅក្នុងអារម្មណ៍ ឬក៏នៅតែលើក្រដាសសៀវភៅទេ។ តែប្រសិនបើធនធានធម្មជាតិទាំងអស់នេះនៅគង់វង្ស ដល់បច្ចុប្បន្ន វាអាចជាការលួងចិត្តមួយដល់កូនខ្មែរ ចំពោះមោទនភាពទ្រព្យធម្មជាតិទាំងនេះ។ នេះបើនិយាយពីទ្រព្យនៅក្នុងដី។
ដោយឡែកទ្រព្យសម្បត្តិដ៏ស្តុកស្តមនៅក្នុងទឹកវិញ បើគេនិយាយពីប្រទេសកម្ពុជាគឺ«ត្រី»។នៅស្រុកខ្មែរកន្លងមកនរណាក៏ដឹងដែរថា «មានទឹកគឺមានត្រី»។ សមដូចកំណាព្យមួយវាក្យខណ្ឌ ដែលបានពោលថា«ត្រីក្រាញ់លលេញ ដេញត្រីក្រោះ ត្រីក្រឹមក្រាបចុះឈប់បង្អង់ ត្រីក្រាយហែលក្រោយបណ្តោយត្រង់ ត្រីក្រឹមវិលវង់ក្រោយត្រីក្រាយ»។ តាមរយៈកំណាព្យដូនតាដូច្នេះ បង្ហាញថា កម្ពុជាជាប្រទេសសម្បូរត្រីធម្មជាតិ ប្រជាពលរដ្ឋគ្រាន់តែធ្វើការឬប្រកបអាជីវកម្ម ប្រមូលកំរៃមករក្សាទុកដាក់ជាការស្រេច រីឯម្ហូបមិនមានអ្វីជាកង្វល់ទេ គឺមានត្រីជាតំណាងស្រាប់។
តើនេះជារឿងអកុសល ឬក៏ជាការវិវត្តទៅតាមស្ថានភាពសង្គម និងនយោបាយស្រុកទេស បានជាប្រជាជនខ្មែរពេលនេះនាំគ្នាទទួលទានតែត្រីចិញ្ចឹម ហើយកំរនឹងស្គាល់ជាតិត្រីធម្មជាតិដូច្នេះ?
មានហេតុផលជាច្រើនដែលធ្វើឲ្យប្រទេសកម្ពុជាផ្លាស់ប្តូរពីទឹកដីសម្បូរត្រីធម្មជាតិ ទៅជារាជាណាចក្រមួយដែលបរិភោគត្រីចិញ្ចឹមច្រើននោះគឺទី១ ទាក់ទងទៅនឹងកត្តាប្រជាសាស្ត្រ។ ប្រជាជនកម្ពុជាបានកើនឡើងរហូតដល់ជាង១៤លាននាក់ រីឯផ្ទៃទឹកសម្រាប់ជម្រកត្រីរស់នៅក៏កាន់តែរួញ ផ្ទុយពីផ្ទៃដីដែលមានការកើនឡើង ដោយសារដីមានតម្លៃ ហើយថ្លុកត្រពាំង បឹងបួរ រួមទាំងទន្លេត្រូវគេចាក់ដីលុប។
ទី២.ការអនុវត្តច្បាប់ជលផលកន្លងមកមិនមានប្រសិទ្ធិភាព។ ត្រីទឹកសាបកម្ពុជាដែលល្បីល្បាញលើពិភពលោកត្រូវបានបើកដៃឲ្យបំផ្លាញដោយទ្រង់ទ្រាយធំ-តូច តាមលទ្ធភាពដែលអាចបំផ្លាញបាន។ ការយល់ដឹងរបស់ប្រជាពលរដ្ឋខ្មែរបានធ្លាក់ចុះ ដោយសារមានការព្យាយាមប្រើប្រាស់ឧបករណ៍ហាមឃាត់ ដែលធ្វើឲ្យត្រីមិនអាចក៏កើតបានឆាប់រហ័សដើម្បីបំរើតម្រូវការរបស់អ្នកបរិភោគ។
ងាកទៅមើលជង្រុកត្រីទឹកសាបធំជាងគេបំផុតនៅកម្ពុជាវិញគឺបឹងទន្លេសាបត្រូវគេមើលឃើញថាមានស្ថានភាពខុសប្លែកពីទសវត្សមុនៗ ដោយហេតុថាវត្តមានផ្ទះបណ្តែតទឹករបស់និគមជនវៀតណាមជាច្រើនគ្រួសារ មិនត្រឹមតែទៅដណ្តើមជម្រកត្រីទេ ថែមទាំងធ្វើឲ្យប៉ះពាល់ដល់ពូជពង្សត្រីដែលខ្មែរធ្លាប់តែអួតអន្តរជាតិទៀតផង។
ផលប៉ះពាល់នោះគឺការចាក់កាកសំណល់គ្រប់ប្រភេទទៅក្នុងទឹក ក្នុងនោះក៏មានបង្គន់អនាម័យផងដែរ។ មិនថារដូវហាមនេសាទ ឬមិនហាមនោះទេ តែកាលណានៅលើទឹកហើយប្រាកដជានេសាទត្រីគ្រប់ពេលវេលាជាក់ជាមិនខាន សូម្បីតែពូជត្រីពងពេញពោះក៏ក្លាយជាអាហារដូចជាត្រីមួយក្បាលដូច្នោះដែរ។
មួយវិញទៀត ការប្រើប្រាស់កាណូតម៉ាស៊ីន ហើយបង្ហូរប្រេងចូលទៅក្នុងទឹកជារៀងរាល់ថ្ងៃសុទ្ធសឹងជាបច្ច័យដែលធ្វើឲ្យប៉ះពាល់ដល់ត្រី ខណៈដែលកាកសំណល់គ្រប់ប្រភេទរួមផ្សំនឹងដីល្បាប់បានប្រែក្លាយបឹងទន្លេសាបឲ្យគោករាក់បន្តិចម្តងៗ។
លើសពីនេះការប្រើប្រាស់សារធាតុគីមីបាញ់ទៅលើដំណាំដែលគេដាំ ដោយរានយកព្រៃលិចទឹកនៅតំបន់ជុំវិញបឹងទន្លេសាបក៏ជាហេតុផលមួយបំផ្លាញត្រីផងដែរ គឺនៅពេលទឹកឡើងហើយត្រីបាត់បង់កន្លែងពងកូន ថែមទាំងរងនូវជាតិគីមីដ៏ធ្ងន់ធ្ងរ។
និយាយពីបញ្ហាត្រីនេះ លោកនាយករដ្ឋមន្ត្រី ហ៊ុន សែន កាលពីឆ្នាំ២០១១ កន្លងទៅបានសម្រេចលុបឡូដ៍នេសាទនៅតាមខេត្តមួយចំនួនជាបន្តបន្ទាប់ ដែលនេះជាការអបអរពីពលរដ្ឋខ្មែរទូទាំងប្រទេសជាពិសេសប្រជានេសាទ។ ក្រៅពីរក្សាទុកដែនអភិរក្សពូជត្រីប្រមាណជា១០ភាគរយ កម្មសិទ្ធិឡូដ៍នេសាទលែងមានទៀតហើយ។
កាលពីថ្ងៃពុធម្សិលមិញដែរ នៅក្នុងឱកាសទិវាមច្ឆជាតិ១កក្កដា នៅឯខេត្តកំពង់ចាម ប្រមុខរដ្ឋាភិបាលខ្មែរបានព្រលែងកូនត្រីចម្រុះនិងមេត្រីជាង១លានក្បាល និងបង្កង១សែនក្បាល ដែលសកម្មភាពនេះ រំពឹងថាផលត្រីនឹងសម្បូរបន្ថែមទៀត ប្រសិនបើមានការការពារ និងថែទាំ។
ជារួមប្រសិនបើចង់ឲ្យខ្មែរទូទាំងប្រទេសបានស្គាល់រសជាតិត្រីធម្មជាតិច្រើនឡើងវិញ គេគួរតែមានការការពារនិងអភិរក្សត្រី ដោយឈរលើការគោរពច្បាប់រដ្ឋទាំងប្រជាពលរដ្ឋនិងមន្ត្រី អនុវត្តច្បាប់ឲ្យបានខ្ជាប់ខ្លួន ក្នុងនោះមានការទប់ស្គាត់ការប្រើប្រាស់ឧបករណ៍ហាមឃាត់ លុបបំបាត់រាល់រូបភាពដែលរំខានដល់ការរស់នៅនិងកន្លែងពងកូនរបស់ត្រី ជាពិសេសនៅតំបន់បឹងទន្លេសាប។ បង្កើនការយល់ដឹងដល់ប្រជានេសាទ។ល។និង។ល។
ប្រសិនបើអនុវត្តដូច្នេះបាននោះជនកម្ពុជាអាចនឹងមានត្រីទឹកសាបធម្មជាតិគ្រប់គ្រាន់ សម្រាប់បម្រើដល់ប្រជាជននៅក្នុងស្រុក ដោយកាត់បន្ថយការបរិភោគត្រីចិញ្ចឹម ដែលមានរសជាតិមិនឆ្ងាញ់ដូចត្រីធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ