មន្ត្រីសិទ្ធិមនុស្ស អ.ស.ប ជំរុញឲ្យព្រឹទ្ធសភាបដិសេធសេចក្តីព្រាងច្បាប់ស្តីពី LANGO
អ្នករាយការណ៍ពិសេសអង្គការសហប្រជាជាតិ ទទួលបន្ទុកខាងសិទ្ធិសេរីភាពក្នុងការជួបប្រជុំដោយសន្តិវិធី និងការបង្កើតសមាគម បានចេញសេចក្តីថ្លែងការណ៍មួយ កាលពីម្សិលម្ងៃ ដោយបានជំរុញឲ្យព្រឹទ្ធសភាកម្ពុជាបដិសេធចោលសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល។ សេចក្តីព្រាងច្បាប់ដែលរងការរិះគន់នេះ ត្រូវបានរដ្ឋសភាកម្ពុជាអនុម័តរួចហើយកាលពីថ្ងៃទី១៣កក្កដា និងកំពុងបញ្ជូនបន្តទៅឲ្យព្រឹទ្ធសភាអនុម័តនិងផ្តល់យោបល់។
ចុះផ្សាយនៅថ្ងៃ៖
ស្តាប់ - ០២:១៩
សេចក្តីថ្លែងការណ៍របស់លោក ម៉ៃណា គីអៃ (Maina Kiai) អ្នករាយការណ៍ពិសេសអង្គការសហប្រជាជាតិ ទទួលបន្ទុកខាងសិទ្ធិសេរីភាពក្នុងការជួបប្រជុំដោយសន្តិវិធី និងស្តីពីការបង្កើតសមាគមនេះ បានធ្វើឡើងកាលពីថ្ងៃទី១៥កក្កដា ពោលគឺ២ថ្ងៃក្រោយដែលរដ្ឋសភាជាតិកម្ពុជាបានអនុម័តលើសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាលនេះ កាលពីថ្ងៃទី១៣កក្កដា។
សេចក្តីថ្លែងការណ៍ដែលចេញផ្សាយពីក្រុងហ្សឺណែវប្រទេសស្វីស ហើយដែលវិទ្យុបារាំងអន្តរជាតិទើបនឹងទទួលបាននៅថ្ងៃនេះ បានរិះគន់ទៅលើសេចក្តីព្រាងច្បាប់នេះថា បានគំរាមកំហែងដល់សេរីភាពនិងឯករាជភាពរបស់អង្គការសង្គមស៊ីវិលនៅក្នុងប្រទេសកម្ពុជា។ នៅក្នុងសេចក្តីថ្លែងការណ៍របស់អ្នករាយការណ៍ពិសេសរូបនេះ ក៏បានជំរុញឲ្យព្រឹទ្ធសភាកម្ពុជាបដិសេធចោលសេចក្តីព្រាងច្បាប់នេះថែមទៀត។
សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលដែលមាន៩ជំពូកនិង៣៦មាត្រា ត្រូវបានរដ្ឋសភាជាតិកម្ពុជាអនុម័តកាលពីថ្ងៃចន្ទទី១៣កក្កដាសប្តាហ៍មុន ដោយសំលេង៦៨លើ៦។ ការអនុម័តនោះ មិនមានការចូលរួមពីសមាជិកសភាគណបក្សប្រឆាំងទាំង៥៥រូបនោះទេ ខណៈដែលក្រុមអង្គការសង្គមស៊ីវិលជាតិជាច្រើនក៏បានលើកគ្នាតវ៉ាប្រឆាំងនឹងការអនុម័តសេចក្តីព្រាងច្បាប់នេះដែរ។ ភ្លាមៗក្រោយពីការអនុម័តសេចក្តីព្រាងច្បាប់នោះ អ្នកនាំពាក្យសហភាពអឺរ៉ុបប្រចាំនៅកម្ពុជាដែលជាភាគីមួយក្នុងការផ្តល់ជំនួយដ៏ធំដល់ប្រទេសកម្ពុជានោះ ក៏បានចេញសេចក្តីថ្លែងការណ៍មួយ ដោយសម្តែងការសោកស្តាយចំពោះការអនុម័តលើសេចក្តីព្រាងច្បាប់នេះ ដោយមិនដាក់បញ្ចូលនូវសេចក្តីព្រួយបារម្ភផ្សេង។
គួរជម្រាបជូនថា នៅថ្ងៃទី១៧កក្កដានេះ ព្រឹទ្ធសភាកម្ពុជា ក៏បានបើកកិច្ចប្រជុំពេញរបស់ខ្លួនដែរ តែគេមិនបានឃើញមានការពិភាក្សាទៅលើសេចក្តីព្រាងច្បាប់ ស្តីពី សមាគម និង អង្គការមិនមែនរដ្ឋាភិបាលដ៏ចម្រូងចម្រាស់នេះទេ។ បើតាមលោក គង់ គាំ សមាជិកព្រឹទ្ធសភាមកពីគណបក្ស សម រង្ស៊ី សេចក្តីព្រាងច្បាប់នេះ កំពុងស្ថិតនៅក្នុងដៃគណៈកម្មការទី៤នៃព្រឹទ្ធសភា។ លោកបានបញ្ជាក់ថា បើគ្មានការប្រែប្រួលទេ ព្រឹទ្ធសភាអាចនឹងលើកយកសេចក្តីព្រាងច្បាប់នេះមកពិភាក្សានិងអនុម័តនៅថ្ងៃទី២២ខែកក្កដាសប្តាហ៍ក្រោយ ដែលសមាជិកព្រឹទ្ធសភាគណបក្សសមរង្ស៊ីចំនួន១១រូប នឹងមិនចូលរួមប្រជុំអនុម័តនោះទេ។ ព្រោះបើតាមសមាជិកព្រឹទ្ធសភាវ័យចាស់របស់គណបក្សសមរង្ស៊ីរូបនេះ លោកគ្មានជំនឿថា សេចក្តីព្រាងច្បាប់នេះ នឹងមានការកែសម្រួលបន្ថែមនោះទេ ក្រៅពីការធ្វើទៅតាមការអនុម័តរបស់រដ្ឋសភារួចទៅហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ