គជប អំពាវនាវឲ្យប្រជាពលរដ្ឋកម្ពុជា ត្រៀមខ្លួនទៅចុះឈ្មោះបោះឆ្នោតថ្មីនៅថ្ងៃទី១កញ្ញា
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសថា ការចុះឈ្មោះបោះឆ្នោតថ្មីឆ្នាំ២០១៦ នឹងចាប់ផ្តើមពីថ្ងៃទី ១កញ្ញា ដល់ថ្ងៃទី២៩ខែវិច្ឆិកា ឆ្នាំ២០១៦ខាងមុខនេះហើយ។ ជាមួយគ្នានេះ គជប បានអំពាវនាវឲ្យប្រជាពលរដ្ឋខ្មែរ ដែលគ្រប់អាយុ១៨ឆ្នាំឡើងទៅ ត្រៀមទៅចុះឈ្មោះបោះឆ្នោតថ្មី ហើយថា បើប្រជាពលរដ្ឋណាមិនបានទៅចុះឈ្មោះបោះឆ្នោតថ្មីនេះទេ នឹងមិនមានឈ្មោះនៅថ្ងៃបោះឆ្នោតឡើយ។
ចុះផ្សាយនៅថ្ងៃ៖
ស្តាប់ - ០២:០២
ការចុះឈ្មោះបោះឆ្នោតថ្មី ដែលមានរយៈពេល៣ខែ (១កញ្ញា-២៩វិច្ឆិកា) នឹងធ្វើឡើងនៅតាមសាលាឃុំសង្កាត់ និងនៅតាមភូមិមួយចំនួនក្នុងឃុំសង្កាត់ ដែលបើកធ្វើការជារៀងរាល់ថ្ងៃ មិនថា ថ្ងៃសៅរិ៍ ឬថ្ងៃអាទិត្យនោះទេ។ នេះបើយោងតាមសេចក្តីជូនដំណឹងមួយចុះថ្ងៃទី១៨កក្កដា ហើយត្រូវបានផ្សព្វផ្សាយដល់បណ្តាញផ្សព្វផ្សាយព័ត៌មាន នៅថ្ងៃទី១៩ កក្កដានេះ។
សេចក្តីជូនដំណឹងនេះបានបញ្ជាក់ថា ប្រជាពលរដ្ឋខ្មែរដែលមានលំនៅឋាន ឬទីសំណាក់ច្រើនជាងមួយកន្លែងក្នុងប្រទេសកម្ពុជា ត្រូវជ្រើសរើសយកទីកន្លែងតែមួយគត់ ដើម្បីចុះឈ្មោះនេះ ហើយសម្រាប់ប្រជាពលរដ្ឋ ព្រះសង្ឃ ឬបុព្វជិតសាសនា កម្មករ និយោជិត សិស្ស និស្សិត មន្រ្តីរាជការស៊ីវិល នាយឬពលទាហាននៃកងយោធពលខេមរភូមិន្ទ និងកងនគរបាលជាតិ ដែលកំពុងស្នាក់នៅក្នុងឃុំសង្កាត់ណាមួយ សុទ្ធតែអាចសុំចុះឈ្មោះបោះឆ្នោត នៅក្នុងឃុំសង្កាត់នោះបាន។
គួរជម្រាបជូនថា កាលពីថ្ងៃទី១៧មិថុនាកន្លងទៅ រដ្ឋាភិបាលកម្ពុជា ទើបតែបានចេញអនុក្រឹត្យមួយ ដោយបានសម្រេចបង្កើតឡើងនូវគណៈបញ្ជាការសន្តិសុខអចិន្ត្រៃយ៍មួយ ដើម្បីការពារការចុះឈ្មោះបោះឆ្នោត ការពិនិត្យបញ្ជីឈ្មោះ និងការបោះឆ្នោតថ្នាក់ជាតិ ថ្នាក់ក្រោមជាតិ ចាប់ពីឆ្នាំ២០១៦ ដល់ឆ្នាំ២០១៩ខាងមុខ។ គណៈបញ្ជាការនេះ ដឹកនាំដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃជាប្រធាន និងលោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិជាអនុប្រធាន និងអមដោយទេសរដ្ឋមន្ត្រី រដ្ឋមន្ត្រី រដ្ឋលេខាធិការ អគ្គស្នងការនគរបាលជាតិ អគ្គមេបញ្ជាការកងរាជអាវុធហត្ថលើផ្ទៃប្រទេស និងអភិបាលនៃគណៈអភិបាលរាជធានីខេត្ត ជាសមាជិក។
សូមបញ្ជាក់ថា ការចុះឈ្មោះបោះឆ្នោតនឹងធ្វើឡើងតាមរយៈម៉ាស៊ីនកុំព្យូទ័រ ដែលគេគ្រោងនឹងប្រើប្រាស់កុំព្យូទ័រប្រមាណ ២៤០០ឈុត សម្រាប់ប្រជាពលរដ្ឋកម្ពុជាដែលមានសិទ្ធិចុះឈ្មោះបោះឆ្នោតជិត១០លាននាក់។ លោក ហង់ ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានបញ្ជាក់ថា គជប បានត្រៀមកម្លាំងមនុស្សប្រមាណជា៨២០០នាក់ និងថវិកាប្រមាណជា២៣លានដុល្លារអាមេរិក ក្នុងការចុះឈ្មោះបោះឆ្នោតរយៈពេល៣ខែនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ