សាលារៀនមួយចំនួនសិស្សអង្គុយរៀនជាមួយមូសនៅរដូវវស្សា
ចុះផ្សាយនៅថ្ងៃ៖
ស្តាប់ - ០៤:១៩
សិស្សសាលាតូចៗអាចប្រឈមនឹងការកើតជំងឺគ្រុនឈាមកាន់តែច្រើន ឬប៉ះពាល់សុខភាពពីផ្សែងធូបមូស ប្រសិនបើមូសនៅតែបន្តយកថ្នាក់រៀនធ្វើជាជំរកនារដូវភ្លៀងធា្លក់នេះ។ បន្ថែមពីលើការផ្សព្វផ្សាយអប់រំរបស់ក្រសួងសុខាភិបាល និងក្រសួងអប់រំ ឲ្យមានការប្រុងប្រយ័ត្ន និងការពារកុំឲ្យកើតជំងឺគ្រុនឈាម ស្ថាប័នមានសមត្ថកិច្ចទាំងនេះគួរមានការចាប់អារម្មណ៍ជាអត្ថិភាពដល់សាលារៀនមួយចំនួន ដែលមានស្ថានភាពបរិស្ថានមិនអំណោយផល ជាហេតុបង្កឲ្យក្លាយជាជំរកមូសខ្លា បង្កឲ្យមានការប្រឈមនឹងជំងឺគ្រុនឈាម។
ការវិវត្តន៍ជំងឺគ្រុនឈាមនៅរដូវភ្លៀងនាឆ្នាំ២០១៦នេះ ត្រូវបានគេកត់សម្គាល់ថាមានសន្ទុះខ្លាំង ដោយរយៈពេល ៥ ខែដើមឆ្នាំ មានជិត២ពាន់ករណី។ បើធៀបទៅនឹងរយៈពេលដូចគ្នាកាលពីឆ្នាំ២០១៥ ឃើញថាករណីនេះបានកើនឡើងដល់ទៅ ២ដង។ រីឯការស្លាប់ដោយសារជំងឺគ្រុនឈាមនេះ ក៏បានកើនឡើងដែរគឺ ៤នាក់ ខណៈដែលឆ្នាំទៅមានអ្នកស្លាប់តែ១នាក់ប៉ុណ្ណោះ ក្នុងរយៈពេលដូចគ្នានេះ។
ទោះយ៉ាងនេះក្តីស្ថាប័នជំនាញ ក្នុងនោះគឺមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នៃក្រសួងសុខាភិបាល បានបញ្ជាក់ឲ្យដឹងថានៅមិនទាន់ដល់កម្រិតមួយប្រកាសអាសន្នស្តីពីគ្រុនឈាមនៅឡើយទេ ដោយសារតែវដ្ដនៃជំងឺគ្រុនឈាមនៅប្រទេសកម្ពុជាបានកើតឡើងក្នុងរវាង ៣ឆ្នាំម្តង គឺចាប់ពីឆ្នាំ ២០១៥ ដល់ឆ្នាំ ២០១៧ ហើយនៅចន្លោះឆ្នាំទាំងនេះ នៅមិនទាន់ដឹងពីការរាតត្បាតជំងឺគ្រុនឈាមខ្ពស់នៅឆ្នាំណាមួយ ដោយរងចាំដំណាច់ឆ្នាំ ២០១៧។
ជាការពិត យើងឃើញថាមកទល់បច្ចុប្បន្ននេះ ដែលរដូវភ្លៀងបានមកដល់យ៉ាងពេញទំហឹង វត្តមាននៃសត្វមូសក៏ចាប់ផ្តើមកើតឡើងយ៉ាងច្រើនសន្ធឹកសន្ធាប់។ ការកើតឡើងច្រើនក៏ព្រោះតែទឹកភ្លៀងបានចាប់ផ្តើមធ្លាក់ក្នុងកម្រិតខ្ពស់ បង្កជាការដក់ នៅកន្លែងដែលមានព្រៃស៊ុបទ្រុប ថ្លុក បង្កជាការស្ទះលូ ដែលជាប្រភពកកើតដង្កូវទឹក ហើយបង្កើតជាសត្វមូសគ្រប់ប្រភេទ។
កាលពីពេលថ្មីៗនេះក្រសួងសុខាភិបាលបានចេញលិខិតណែនាំផងដែរនៅពេលរដូវភ្លៀងចូលមកដល់ ណែនាំដល់មន្ទីរសុខាភិបាល និងផ្នែកពាក់ព័ន្ធនានា តាមបណ្តាខេត្តរាជធានី រហូតដល់ថ្នាក់ភូមិ ឲ្យមានការប្រុងប្រយ័ត្ន អង្កេតតាមដានដោយយកចិត្តទុកដាក់ និងត្រៀមលក្ខណៈប្រយុទ្ធនឹងជំងឺគ្រុនឈាម។
ជាទូទៅវិធានការ ដែលក្រសួងសុខាភិបាលបានដាក់ចុះ ទី១ គឺការអប់រំ និងលើកកម្ពស់សុខភាព ពោលគឺរំលឹកប្រជាជនឲ្យមានការយល់ដឹង និងចូលរួមការពារជំងឺគ្រុនឈាម ដោយរួសរាន់យកអ្នកជំងឺទៅកាន់ពេទ្យរដ្ឋ មិនត្រូវចូលពេទ្យឯកជនទេ។ ទី២ គឺគោលការណ៍ប្រើប្រាស់ថ្នាំសម្លាប់ដង្កូវទឹក ២ ដងក្នុងមួយឆ្នាំ មានន័យថានៅដើមរដូវភ្លៀងនេះម្តង និងចុងរដូវភ្លៀងម្តងទៀត។ ហើយជម្រើសចុងក្រោយ គឺការបាញ់ថ្នាំសំលាប់មូស ដែលថ្នាំនេះត្រូវគេគិតថាមានប្រសិទ្ធភាពយ៉ាងយូរពី ២ ទៅ ៣ ថ្ងៃប៉ុណ្ណោះ តែក៏វាប៉ះពាល់ដល់ប្រជាពលរដ្ឋផងដែរ។
ជាការកត់សម្គាល់ ក្រៅពីផ្ទះសម្បែងប្រជាពលរដ្ឋ គ្រឹះស្ថានអប់រំសាធារណៈ ជាពិសេសសម្រាប់សិស្សតូចៗ គួរតែមានការចាប់អារម្មណ៍ខ្ពស់ពីស្ថាប័នពាក់ព័ន្ធជាពិសេសក្រសួងអប់រំផ្ទាល់តែម្តង។ ដោយសារតែជារដូវភ្លៀងដូច្នេះថ្នាក់រៀនកុមារតូច ដែលមានសភាពងងឹតស្រាប់ បានក្លាយជាជម្រកមូសគ្រប់ប្រភេទ។ កុមារមួយចំនួននៅថ្នាក់បឋមសិក្សាកំពុងអង្គុយរៀនជាមួយមូស។ មានថ្នាក់រៀនខ្លះដែរ ដែលគ្រូៗមានចិត្តមានថ្លើមអុចធូបមូសនៅក្នុងថ្នាក់ ដើម្បីកុំឲ្យមូសខាំក្មេង។
ទោះយ៉ាងនេះក្តី មិនគ្រប់គ្រាន់ទេ ដើម្បីទប់ស្កាត់ និងការពារជំងឺគ្រុនឈាម ដែលកាចសាហាវនោះ ចាំបាច់ត្រូវមានកិច្ចអន្តរាគមន៍ពីថ្នាក់ជាតិ តាមរយៈការសម្រេចដ៏ចាំបាច់ ដូចជាត្រូវប្រើវិធានការមានប្រសិទ្ធភាពដើម្បីកំចាត់មូស។ ការផ្អាកការសិក្សាបណ្តោះអាសន្នក៏ថាបាន ជាជាងបណ្តោយឲ្យសិស្សអង្គុយរៀនជាមួយមូស ដែលមានការប្រឈមខ្ពស់នឹងការកើតជំងឺគ្រុនឈាម។ ក្រសួងអប់រំក៏ធ្លាប់មានវិធានការកន្លងមកដែរហើយ គឺបន្ថយម៉ោងសិក្សារបស់សិស្សជាបណ្តោះអាសន្ន ខណៈដែលកម្ពុជាជួបប្រទះនឹងសីតុណ្ហភាពក្តៅខ្លាំងនៅអំឡុងដើមឆ្នាំ២០១៦នេះ។
ដូច្នេះករណីនេះ ករណីកុមារតូចៗអង្គុយរៀននៅសាលាសាធារណៈ ដោយអុចធូបមូសនេះ ប្រសិនបើមិនមានវិធានការជាក់លាក់ជាបន្ទាន់ ពីផ្នែកពាក់ព័ន្ធ រួមមានក្រសួងសុខាភិបាល ក្រសួងអប់រំ ឬផ្នែកអនាម័យបរិស្ថានទេ នោះកុមារនឹងប្រឈម២យ៉ាងគឺទី ១ ប្រឈមនឹងជំងឺគ្រុនឈាម ដោយសារមូសខាំ និងទី២ ប្រឈមនឹងការប៉ះពាល់សុខភាព ដោយសារតែផ្សែងធូបមូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ