តើសាសនារបស់រដ្ឋនឹងទៅជាអ្វី បើសូម្បីតែព្រះសង្ឃក៏ប្រើប្រាស់គ្រឿងញៀន?
ចុះផ្សាយនៅថ្ងៃ៖
ស្តាប់ - ០៣:៤៩
យុទ្ធនាការបង្ក្រាបគ្រឿងញៀនថ្នាក់ជាតិទូទាំងប្រទេសកម្ពុជា កំពុងតែប្រព្រឹត្តទៅយ៉ាងក្ដៅគគុក។ វាជារឿងគួរឲ្យភ្ញាក់ផ្អើលនិងគួរឲ្យហួសចិត្ត នៅពេលសមត្ថកិច្ចនៅខេត្តកំពង់ធំ ឃាត់ខ្លួនព្រះសង្ឃមួយអង្គពីបទប្រើប្រាស់គ្រឿងញៀន កាលពីថ្ងៃអង្គារទី១៧មករា កន្លងទៅ។ តើព្រះពុទ្ធសាសនា ដែលជាសាសនារបស់រដ្ឋនឹងទៅជាអ្វី បើសូម្បីតែព្រះសង្ឃក៏ប្រើប្រាស់គ្រឿងញៀនដែរនោះ?
ព្រះពុទ្ធសាសនា មិនត្រឹមតែជាសាសនារបស់រដ្ឋប៉ុណ្ណោះទេ ប៉ុន្តែព្រះពុទ្ធសាសនា ក៏បានទទួលការគោរពប្រណិបត្តិពីសំណាក់ប្រជាពលរដ្ឋខ្មែរដ៏ច្រើនលើសលុបផងដែរ។ សម្រាប់ពុទ្ធសាសនិកជន ព្រះសង្ឃគឺជាបុគ្គលដែលគោរពប្រតិបត្តិព្រះពុទ្ធសាសនាបានប្រសើរ និងថ្លៃថ្លាជាងគ្រហស្ថ។ ព្រះសង្ឃគឺជាស្រែបុណ្យសម្រាប់មនុស្សទូទៅ។ ចំពោះធម៌វិន័យព្រះពុទ្ធសាសនា ព្រះសង្ឃត្រូវតែប្រកាន់ខ្ជាប់ឲ្យបានតឹងរ៉ឹងបំផុត។
ប៉ុន្តែជាការកត់សម្គាល់ នៅកម្ពុជា ព្រះសង្ឃមួយចំនួន កំពុងតែប្រព្រឹត្តប្រាសចាកពីវិន័យរបស់ព្រះពុទ្ធសាសនា និងមិនបានប្រតិបត្តិខ្លួនឲ្យបានជាទីគោរពសក្ការៈរបស់ពុទ្ធសាសនិកជនជាទូទៅឡើយ។ អ្នកបួសមួយចំនួនតូចទាំងនោះ បានយកស្បង់ចីវរធ្វើជាឈ្នាន់ ដើម្បីកេងចំណេញ និងបោកប្រាស់ជនទាំងឡាយដែលមានសទ្ធាចំពោះព្រះពុទ្ធសាសនាទៅវិញ។
គេក៏បានលឺផងដែរ ការរកឃើញព្រះសង្ឃនៅក្នុងទីកន្លែងកម្សាន្តនានាជាដើម។ ជាព្រះសង្ឃដែលបកស្បង់ ហើយចូលទៅសប្បាយនៅតាមហាង បារ ខារ៉ាអូខេ និងដែលត្រូវសារព័ត៌មានចុះផ្សាយជារឿយៗ។ បុគ្គលទាំងនោះ ថ្វីត្បិតតែបានគ្រងស្បង់ចីវរជាទីសក្ការៈ ប៉ុន្តែបែរជាប្រព្រឹត្តអំពើពាលទៅវិញ។ ចុងក្រោយនេះ ខណៈដែលសមត្ថកិច្ចកំពុងមមាញឹកបង្ក្រាបបទល្មើសគ្រឿងញៀនទូទាំងប្រទេស ការរកឃើញថាមានព្រះសង្ឃប្រើប្រាស់គ្រឿងញៀន គឺជារឿងភ្ញាក់ផ្អើលនិងហួសចិត្តមែនទែន។
នេះគេនៅមិនទាន់និយាយអំពីជម្លោះក្នុងចំណោមព្រះសង្ឃ ការចោទប្រកាន់គ្នាទៅវិញទៅមកនៃព្រះសង្ឃដែលគាំទ្រគណបក្សនយោបាយផ្សេងគ្នា និងរឿងអាស្រូវនៅតាមវត្តអារាមរវាងព្រះសង្ឃនិងអាចារ្យគណៈកម្មការវត្ត និងជួនកាលទៀត រវាងគណៈកម្មការវត្ត ជាមួយប្រជាពុទ្ធបរិស័ទចំណុះជើងវត្តផង។
មែនទែនទៅ ការប្រព្រឹត្តិខុសធម៌វិន័យរបស់សង្ឃមួយចំនួនជាលក្ខណៈ បុគ្គលតែប៉ុណ្ណោះ ប៉ុន្តែវាកំពុងតែបង្កអោយមានការព្រួយបារម្ភអំពីការធ្លាក់ចុះនៃ ការគោរព និងជឿជាក់ទៅលើវិស័យព្រះពុទ្ធសាសនាទាំងមូល។
ក្នុងន័យនេះ អ្នកតាមដាន ការវិវត្តរបស់សង្គមកម្ពុជាមួយចំនួនបានបង្ហាញ អំពីការបារម្ភតិច ឬច្រើនទៅលើការធ្លាក់ចុះនៃជំនឿទៅលើព្រះពុទ្ធសាសនា ដែលគេហាក់ពុំឃើញមានការចាត់វិធានការ ឬដំណោះស្រាយចំពោះបញ្ហាទាំងអម្បាលដែលត្រូវបានរៀបរាប់ពីខាងដើម។ ចំណែកក្រុមសង្គមវិទូវិញ បានអំពាវនាវឲ្យក្រសួងពាក់ព័ន្ធ តាមរយៈគណៈគ្រប់គ្រងព្រះសង្ឃ ត្រូវបញ្ចេញ វិធានការពង្រឹងវិន័យព្រះសង្ឃឡើងវិញ។
ជាការពិតហើយថា សាសនា គឺជាជំនឿដែលគង់តែត្រូវផុតរលត់វិញនៅថ្ងៃណាមួយ។ ប៉ុន្តែ បើទោះបីជាយ៉ាងដូច្នេះក៏ដោយ ក៏គេមិនអាចបណ្ដោយឲ្យសាសនារបស់រដ្ឋមួយ សាបរលាបទៅតាមយថាកម្មនោះដែរ។ សម្រាប់ក្រុមអ្នកវិភាគតាមដានសង្គមកម្ពុជា ការពង្រឹងព្រះពុទ្ធសាសនាគឺជាកិច្ចការដែលមិនអាចមើលរំលងបានឡើយ។
ក្រសួងធម្មការ និងកិច្ចការសាសនាត្រូវតែមានវិធានការច្បាស់លាស់ចំពោះការពង្រឹងធម្មវិន័យក្នុងចំណោមអ្នកបួសជាសង្ឃ។ មានន័យថា ព្រះសង្ឃត្រូវតែជាអ្នកគោរពនិងប្រតិបត្តិយ៉ាងខ្ជាប់ខ្ជួននូវពុទ្ធវិន័យ។ ទង្វើប្រាសចាកធម្មវិន័យព្រះពុទ្ធសាសនា គួរត្រូវបានចាត់វិធានការយ៉ាងម៉ឺងម៉ាត់ ដើម្បីធានានូវសេចក្ដីទុកចិត្ត ក៏ដូចជាជំនឿរបស់ពុទ្ធបរិស័ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ