ក្រសួងមហាផ្ទៃបានទទួលលក្ខន្តិកៈរបស់បក្សប្រឆាំង
នៅថ្ងៃទី ០៣ ខែឧសភា នេះលោកស ខេង រដ្ឋមន្ត្រីក្រសួងមហាផ្ទៃបានតបលិខិតមួយមកលោកយឹម សុវណ្ណ ប្រធានគណៈកម្មាធិការប្រតិបត្តិគណបក្សប្រឆាំងថា ក្រសួងមហាផ្ទៃបានទទួលរួចហើយនូវលិខិតស្នើសុំតម្កល់លក្ខន្តិកៈគណបក្សប្រឆាំង ក្រោយពីគណបក្សនេះធ្វើវិសោធនកម្មកាលពីថ្ងៃទី ២៥ ខែមេសា។ អ្នកនាំពាក្យក្រសួងមហាផ្ទៃបន្ថែមថាក្រសួងបានទទួលជាផ្លូវការនូវលក្ខខន្តិកៈរបស់បក្សប្រឆាំងហើយ។
ចុះផ្សាយនៅថ្ងៃ៖
ស្តាប់ - ០២:០១
លិខិតចុះថ្ងៃទី ០៣ ខែឧសភា របស់លោកស ខេងរដ្ឋមន្ត្រីក្រសួងមហាផ្ទៃបានឲ្យដឹងថាក្រសួងមហាផ្ទៃបានទទួលរួចហើយនូវលិខិតរបស់គណបក្សសង្រ្គោះជាតិពាក់ព័ន្ធនឹងសំណើសុំតម្កល់លក្ខខន្តិកៈគណបក្សសង្រ្គោះជាតិ ដែលមានសមាជវិសាមញ្ញគណបក្សបានធ្វើវិសោធនកម្មលើប្រការ ៤៧ (ថ្មី) ទៅជាប្រការ ៤៧ថ្មី(មួយ) និងបានអនុម័តកែតម្រូវលេខរៀងជំពូកទី ១០ ទៅជាជំពូកទី ៩វិញ។
អ្នកនាំពាក្យក្រសួងមហាផ្ទៃលោកខៀវ សុភ័គ បានថ្លែងប្រាប់វិទ្យុបារាំងអន្តរជាតិ នៅថ្ងៃទី ៣ ខែឧសភា ថាខ្លឹមសារនៃលិខិតនេះ គឺក្រសួងមហាផ្ទៃបានទទួលជាផ្លូវការនូវលក្ខខន្តិកៈរបស់គណបក្សសង្រ្គោះជាតិ។ លោកលើកឡើងថារដ្ឋមន្ត្រីក្រសួងមហាផ្ទៃបានចុះហត្ថលេខាលើលក្ខន្តិកៈរបស់គណបក្សប្រឆាំង ហើយចាប់ពីពេលនេះតទៅគណបក្សសង្រ្គោះជាតិអាចធ្វើតាមលក្ខន្តិកៈរបស់ខ្លួន ដែលដាក់តម្កល់នៅក្រសួងមហាផ្ទៃ។ ប៉ុន្តែលោកផ្តាំទៅគណបក្សសង្រ្គោះជាតិថា ប្រយ័ត្នធ្វើខុសពីលក្ខន្តិកៈរបស់ខ្លួនទៀត។
លោកយឹម សុវណ្ណ ប្រធានគណៈកម្មាធិការប្រតិបត្តិគណបក្សប្រឆាំងបានលើកថា ក្នុងលិខិតរបស់រដ្ឋមន្ត្រីក្រសួងមហាផ្ទៃមិនមានជំទាស់អ្វីទៅនឹងលក្ខន្តិកៈរបស់គណបក្សសង្រ្គោះជាតិទៀតទេ ហើយចាប់ពីពេលនេះទៅគណបក្សនឹងអនុវត្តទៅតាមលក្ខន្តិកៈ ដែលបានតម្កល់នៅក្រសួងមហាផ្ទៃ។
គួរជម្រាបជូនគណបក្សសង្គ្រោះជាតិ និងក្រសួងមហាផ្ទៃ បានកើនភាពតានតឹងជាមួយគ្នាយ៉ាងខ្លាំង ក្រោយពីគណបក្សប្រឆាំងមួយនេះ បានធ្វើសមាជរបស់ខ្លួន ដើម្បីជ្រើសរើសថ្នាក់ដឹកនាំ បន្ទាប់ពីលោកសម រង្ស៊ី លាលែងពីប្រធានគណបក្ស។ ក្រសួងមហាផ្ទៃ និងគណបក្សប្រឆាំងបានខ្វែងគ្នាលើលក្ខន្តិកៈរបស់គណបក្សប្រឆាំងត្រង់ប្រការ ៤៧(ថ្មី) ដែលនិយាយពីការជ្រើសរើសអនុប្រធានគណបក្សថ្មី។
គណបក្សសង្រ្គោះជាតិកាល ពីសមាជថ្ងៃទី ២៥ ខែមេសា បានឲ្យដឹងថា គណបក្សនឹងសម្រេចជ្រើសរើសអនុប្រធានថ្មី ក្រោយពីក្រសួងមហាផ្ទៃទទួលស្គាល់លក្ខន្តិកៈ។ ប៉ុន្តែលោកយឹម សុវណ្ណលើកឡើងនៅថ្ងៃទី ៣ ខែឧសភា ថាការជ្រើសរើសអនុប្រធាន មិនទាន់បានកំណត់ពេលវេលានៅឡើយទេ។ ចំពោះសមាសភាពអនុប្រធានគឺមានលោក អេង ឆៃអ៊ាង លោកស្រីមូរ សុខហួរ និងលោកប៉ុល ហំម ដែលគណបក្សបានជ្រើសរើសកាលពីថ្ងៃទី ២ មីនា កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ