ក្រសួងមហាផ្ទៃមិនទទួលស្គាល់បេក្ខភាពប្រធាន-អនុបក្សសង្គ្រោះជាតិ
ក្នុងលិខិតចេញកាលពីថ្ងៃម្សិលមិញ ក្រសួងមហាផ្ទៃ បានជម្រាបមកគណបក្សសង្គ្រោះជាតិថាការជ្រើសរើសក្បាលម៉ាស៊ីនគណបក្សតាមរយៈសមាជវិសាមញ្ញ ផ្ទុយទៅនឹងលក្ខន្តិកៈខ្លួនឯងដែលក្រសួងមិនអាចផ្តល់សុពលភាពបាននោះទេ។ បន្ថែមពីនេះ ក្រសួងមហាផ្ទៃក៏បានស្នើឱ្យបក្សប្រឆាំងដកពាក្យស្លោករបស់ខ្លួនផងដែរព្រោះខុសនឹងច្បាប់រដ្ឋធម្មនុញ្ញ។
ចុះផ្សាយនៅថ្ងៃ៖
ស្តាប់ - ០៣:០៣
ប្រការ ៤៧ ត្រេទី ២ ជាចំណុចដែលក្រសួងមហាផ្ទៃបញ្ជាក់ថាគណបក្សសង្រ្គោះជាតិបានអនុវត្តផ្ទុយទៅនឹងលក្ខន្តិកៈខ្លួនឯង ហើយក្រសួងមិនទាន់អាចផ្តល់សុពលភាពដល់បេក្ខភាពប្រធាន និងអនុប្រធានបក្សបានទេ។
ថ្លែងប្រាប់វិទ្យុបារាំងលោក ខៀវ សុភ័គ អ្នកនាំពាក្យក្រសួងមហាផ្ទៃ៖
ប្រការ ៤៧ តម្រូវឱ្យអនុប្រធានគណបក្សគឺលោកកឹម សុខាឡើងធ្វើជាប្រធានស្តីទីខណៈដែលលោកសម រង្ស៊ីលាលែងតិចជាង ១៨ខែ ហើយគណបក្សត្រូវជ្រើសរើសអនុប្រធានថ្មីមួយរូបទៀតចេញពីគណៈកម្មាធិការនាយកគណបក្សដើម្បីជួយការងារប្រធានស្តីទី ហើយក្នុងរយៈពេលលើស ១៨ខែទើបគណបក្សអាចធ្វើសមាជសាមញ្ញដើម្បីជ្រើសរើសប្រធាន និងអនុប្រធានបានដើម្បីដឹកនាំរហូតដល់ចប់អាណត្តិ។
សូមរំលឹកថា គណបក្សសង្គ្រោះជាតិកាលពីថ្ងៃទី ០២ មីនាកន្លងទៅបានធ្វើសមាជវិសាមញ្ញផ្លាស់ប្តូរលក្ខន្តិកៈគណបក្ស និងជ្រើសរើសក្បាលម៉ាស៊ីនថ្មីដើម្បីជំនួសលោកសម រង្ស៊ីដែលបានលាលែង។ ប៉ុន្តែការកែប្រែលក្ខន្តិកៈថ្មី និងជ្រើសរើសក្បាលម៉ាស៊ីនថ្មីក្នុងថ្ងៃតែមួយនេះ គឺបានផ្ទុយទៅតាមលក្ខន្តិកៈដែលបានតម្កល់ទុកស្របច្បាប់នៅក្រសួងមហាផ្ទៃ។ ត្រង់ចំណុចនេះហើយដែល អ្នកនាំពាក្យក្រសួងមហាផ្ទៃ សង្កត់ធ្ងន់ថា គណបក្សប្រឆាំងត្រូវធ្វើសំណើរមកកាន់ក្រសួងមហាផ្ទៃឱ្យទទួលស្គាល់លក្ខន្តិកៈថ្មី សិន ទើបគណបក្សអាចជ្រើសរើសក្បាលម៉ាស៊ីនថ្មីដែលមានប្រធាន ១រូប និងអនុប្រធាន ៣រូបដូចបច្ចុប្បន្នបាន។
រហូតមកដល់ពេលនេះ គណបក្សសង្គ្រោះជាតិមិនទាន់ឆ្លើយតប និងអត្ថាធិប្បាយចំពោះលិខិតរបស់ក្រសួងមហាផ្ទៃនៅឡើយទេ។ ប៉ុន្តែកាលពីពេលថ្មីៗកន្លងទៅនេះ លោក សុន ឆ័យប្រធានក្រុមតំណាងរាស្ត្រគណបក្សសង្គ្រោះជាតិ បានលើកឡើងថា ការធ្វើសមាជវិសាមញ្ញជ្រើសរើសនេះ គឺធ្វើឡើងស្របទៅច្បាប់ស្តីពីគណបក្សដែលទើបវិសោធនកម្ម ដូចនេះគណបក្សមិនមានអ្វីត្រូវបារម្ភនោះទេបើទោះណាក្រសួងមហាផ្ទៃមិនទាន់ផ្តល់សុពលភាពដល់ក្បាលម៉ាស៊ីនរបស់បក្សប្រឆាំងក៏ដោយ។
ក្រៅពីបញ្ហាខាងលើ ក្រសួងមហាផ្ទៃ ក៏បានស្នើឱ្យគណបក្សសង្គ្រោះជាតិដកចេញពាក្យស្លោក “ដូរមេឃុំបម្រើបក្ស ដាក់មេឃុំបម្រើរាស្ត្រ”ផងដែរ។ បើតាមក្រសួងមហាផ្ទៃ ពាក្យស្លោកនេះគឺផ្ទុយនឹងស្មារតីរដ្ឋធម្មនុញ្ញឆ្នាំ ១៩៩៣ ច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់ ពិសេសរបបប្រជាធិបតេយ្យសេរីពហុបក្សនៅកម្ពុជា និងគោលការណ៍នៃប្រព័ន្ធបោះឆ្នោតសមាមាត្រផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ