ក្រសួងអប់រំ ហាមអង្គការសមាគម និងបុគ្គលិកអប់រំ ធ្វើសកម្មភាពឃោសនានយោបាយ
ក្រសួងអប់រំ ហាមអង្គការសមាគម និងបុគ្គលិកអប់រំ ធ្វើសកម្មភាពឃោសនានយោបាយ តាមគ្រឹះស្ថានសិក្សាសាធារណៈ និងឯកជន។ នៅក្នុងសេចក្ដីណែនាំ ចុះថ្ងៃទី១១សីហា ក្រសួងអប់រំបានលើកឡើងថា ការឃោសនានយោបាយ បានធ្វើឲ្យប៉ះពាល់ដល់សណ្ដាប់ធ្នាប់ក្នុងគ្រឹះស្ថានសិក្សា ដែលផ្ទុយនឹងគោលការណ៍អព្យាក្រឹត្យភាពរបស់គ្រឹះស្ថានសិក្សា ជាពិសេស ផ្ទុយពីច្បាប់ស្ដីពីការអប់រំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ការធ្វើសកម្មភាព ឬឃោសនានយោបាយនៅតាមគ្រឹះស្ថានសិក្សា ទាំងសាធារណៈ ទាំងឯកជន គឺមិនមែនជារឿងថ្មីទេសម្រាប់កម្ពុជា។ នេះគឺជាការអះអាងរបស់លោក ហង់ ជួនណារ៉ុន រដ្ឋមន្ដ្រីក្រសួងអប់រំ។ ថ្លែងប្រាប់វិទ្យុបារាំងអន្ដរជាតិនៅថ្ងៃពុធនេះ លោករដ្ឋមន្ដ្រីបានលើកឡើងថា កន្លងមក សមាគម អង្គការ បុគ្គលិកអប់រំ និងគ្រូបង្រៀនជាប់កិច្ចសន្យាមួយចំនួន បានធ្វើសកម្មភាពមិនប្រក្រតី ឃោសនាបំផុសគំនិតបុគ្គលិកអប់រំ និងសិស្សានុសិស្ស ឲ្យចូលរួមសកម្មភាពនយោបាយ។
បើតាមលោក ហង់ ជួនណារ៉ុន ការឃោសនានយោបាយ បានធ្វើឲ្យប៉ះពាល់ដល់សណ្ដាប់ធ្នាប់ក្នុងគ្រឹះស្ថានសិក្សា ដែលផ្ទុយនឹងគោលការណ៍អព្យាក្រឹត្យភាពរបស់គ្រឹះស្ថានសិក្សា ជាពិសេស ផ្ទុយពីច្បាប់ស្ដីពីការអប់រំ។ ខណៈដែលបញ្ហានយោបាយកំពុងតែឡើងកម្ដៅនាពេលសព្វថ្ងៃនេះ ក្រសួងអប់រំ សម្រេចចេញសេចក្ដីណែនាំចំនួន៤ចំណុច ធ្វើយ៉ាងណាទប់ស្កាប់រាល់ភាពមិនប្រក្រតី និងការធ្វើសកម្មភាពឬឃោសនានយោបាយនៅតាមគ្រឹះស្ថានសិក្សា ឲ្យមានប្រសិទ្ធភាព និងឲ្យស្របតាមច្បាប់ស្ដីពីការអប់រំ។
ក្នុងនោះ ក្រសួងមិនអនុញ្ញាតឲ្យសមាគម អង្គការ ឬភ្នាក់ងារណាមួយ ធ្វើសកម្មភាពនៅក្នុងគ្រឹះស្ថានសិក្សាដោយគ្មានការអនុញ្ញាតពីក្រសួងឡើយ។ ការធ្វើសកម្មភាពនិងការឃោសនានយោបាយឲ្យគណបក្សនយោបាយណាមួយ នៅក្នុងគ្រឹះស្ថានសិក្សា ឬស្ថានប័នអប់រំ ក៏ត្រូវបានហាមឃាត់ផងដែរ ស្របតាមមាត្រា៣៤នៃច្បាប់ស្ដីពីការអប់រំ។ ដោយឡែក ការផ្សព្វផ្សាយព័ត៌មានអប់រំនៅក្នុងបរិវេណគ្រឹះស្ថានសាធារណៈ ចាំបាច់ត្រូវមានការអនុញ្ញាតពីអាជ្ញាធរមានសមត្ថកិច្ច ឬក្រសួងអប់រំ ស្របតាមមាត្រា៤២ នៃច្បាប់ស្ដីពីការអប់រំ។
ក្នុងករណីបុគ្គលិកអប់រំ ធ្វើសកម្មភាពឲ្យប៉ះពាល់ដល់អព្យាក្រឹត្យភាពរបស់ស្ថាប័នអប់រំ និងគ្រឹះស្ថានសិក្សា ត្រូវទទួលពិន័យជាប្រាក់ពី១លាន ដល់៥លានរៀល ឬគុណទ្វេដង ប្រសិនបើមិនរៀងចាល។ ហើយប្រសិនបើអ្នកប្រព្រឹត្តជានីតិបុគ្គល គឺត្រូវទទួលពិន័យជាប្រាក់ពី១០លានរៀល ទៅ២០លានរៀល ឬគុណទ្វេដង ប្រសិនបើមិនរៀងចាល។ ក្នុងករណីនៅតែមិនរាងចាលទៀត ក្រសួងអប់រំព្រមានថា នឹងព្យួរ ឬដកហូតអាជ្ញាបណ្ណអប់រំរបស់ស្ថាប័នអប់រំ ឬគ្រឹះស្ថានសិក្សានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ