រដ្ឋមន្ត្រីក្រសួងអប់រំ និងសុខាភិបាល បំភ្លឺថាវិទ្យាសា្ថនវិទ្យាសាស្ត្រអន្តរជាតិ គ្មានច្បាប់អនុញ្ញាតពីក្រសួងទាំង២
រដ្ឋមន្ត្រីក្រសួងអប់រំយុវជន និងកីឡា និងរដ្ឋមន្ត្រីក្រសួងសុខាភិបាល បានឆ្លើយបំភ្លឺទៅកាន់អង្គភាពប្រឆាំងអំពើពុករលួយ (ACU) ថាវិទ្យាសា្ថនវិទ្យាសាស្ត្រអន្តរជាតិ ពុំទាន់មានអាជ្ញាប័ណ្ណ និងច្បាប់អនុញ្ញាតត្រឹមត្រូវពីក្រសួងទាំង២ នោះទេ។ សេចក្តីនេះ ត្រូវបានបង្ហាញដោយ ACU នៅថ្ងៃទី ៧សីហានេះ។ ការបំភ្លឺនេះ គឺបន្ទាប់ពីនិស្សិតនៅវិទ្យាស្ថាននេះ បានប្តឹងទៅ ACU ពីភាពមិនប្រក្រតីរបស់វិទ្យាស្ថាន ដែលបណ្តុះបណ្តាលលើវិជ្ជាសុខាភិបាលនេះ កាលពីពេលកន្លងមក។
ចុះផ្សាយនៅថ្ងៃ៖
ស្តាប់ - ០២:០៤
អង្គភាពប្រឆាំងអំពើពុករលួយ ហៅកាត់ថា ACU នៅថ្ងៃទី ៧សីហានេះ បានបង្ហាញពីសេចក្តីបំភ្លឺរបស់រដ្ឋមន្ត្រីក្រសួងអប់រំយុវជន និងកីឡា និងរដ្ឋមន្ត្រីក្រសួងសុខាភិបាល ពាក់ព័ន្ធនឹងភាពមិនប្រក្រតីក្នុងវិទ្យាស្ថានវិទ្យាសាស្ត្រអន្តរជាតិ។ វិទ្យាសា្ថនវិទ្យាសាស្ត្រអន្តរជាតិ ដែលកន្លងមកត្រូវបានក្រុមនិស្សិតប្តឹងទៅ ACU ដោយចោទប្រកាន់ថា មិនផ្តល់ការចុះកម្មសិក្សាដល់ក្រុមនិស្សិតរៀនឆ្នាំទី១ ដល់ឆ្នាំទី៣ ហើយតម្រូវឲ្យនិស្សិត ត្រូវចំណាយលុយពេលចុះកម្មសិក្សា។ ក្នុងនោះ ក៏មានការចោទថា វិទ្យាស្ថានមិនមានគ្រូបង្រៀនគ្រប់គ្រាន់ ព្រមទាំងមិនមានលិខិតអនុញ្ញាត ឬអាជ្ញាបណ្ណពីក្រសួងសុខាភិបាល និងក្រសួងអប់រំទៀត។
បំភ្លឺជុំវិញបញ្ហានេះ ក្រសួងទាំងពីរ បានបញ្ជាក់ថា វិទ្យាស្ថានវិទ្យាសាស្ត្រអន្តរជាតិ មិនទាន់បានសុំការអនុញ្ញាតពីក្រសួងទាំង ២នេះ នៅឡើយទេ។ ដូច្នេះ ក្រសួងទាំងពីរ ក៏មិនអាចអនុញ្ញាតឲ្យនិស្សិតនៃវិទ្យាសា្ថននេះ ចុះកម្មសិក្សានៅតាមមន្ទីរពេទ្យនានា បាននោះដែរ។ ហើយការតម្រូវឲ្យនិស្សិតបង់ថ្លៃពេលចុះកម្មសិក្សា ក៏មិនមែនជាគោលការណ៍របស់ក្រសួងទាំង ២ដែរ តែជាការប្រព្រឹត្តរបស់ម្ចាស់វិទ្យាស្ថានផ្ទាល់។ ហើយក្រសួងទាំង២ ក៏មិនអាចផ្តល់អាជ្ញាបណ្ណ ដល់វិទ្យាស្ថាននេះ បានដោយសារបញ្ហាកង្វះគ្រូបង្រៀនគ្រប់គ្រាន់ ។
ក្រសួងទាំង ២ បានបញ្ជាក់ថា គេធ្លាប់បានចេញលិខិតបញ្ឃប់ការប្រឡង ឬការជ្រើសរើសនិស្សិតចូលរៀនថ្នាក់បរិញ្ញាបត្ររងផ្នែកគិលានុបដ្ឋាក នៅវិទ្យាស្ថានវិទ្យាសាស្ត្រអន្តរជាតិនេះហើយ។ ហើយក៏បានចេញលិខិតជាបន្តបន្ទាប់ ឲ្យបញ្ឃប់ដំណើរការបណ្តុះបណ្តាល ឬការជ្រើសរើសនិស្សិត និងបញ្ឃប់ការផ្សព្វផ្សាយពាណិជ្ជកម្មទាក់ទាញសិស្ស ផងដែរ។ ការចេញលិខិត ដែលបានធ្វើឡើង បន្ទាប់ពីមានការជួបប្រជុំ និងការដាក់ញ្ញត្តិ ពីសមាគមសម្ព័ន្ធនិស្សិតបញ្ញវ័ន កាលពីពេលកន្លងមក។
លើសពីនេះ ក្រសួងទាំង ២ ក៏បានរកដំណោះស្រាយ សម្រាប់និស្សិតដែលបានចំណាយពេលរៀននៅវិទ្យាសា្ថននេះផងដែរ។ ដំណោះស្រាយ គឺនិស្សិតដែលបានរៀនពិតប្រាកដ អាចជ្រើសរើសគ្រឹះស្ថានបណ្តុះបណ្តាល បន្ទាប់ពីការធ្វើតេស្តជាមុនសិន ដើម្បីវាស់ស្ទង់ចំណេះដឹង។ បន្ទាប់មកនិស្សិតទាំងនោះ អាចជ្រើសរើស បង់ថ្លៃរៀននៅសាលាបច្ចេកទេសថែទាំវេជ្ជសាស្ត្រ នៃសាកលវិទ្យាល័យសុខាភិបាល ឬអាចបង់ថ្លៃចូលរៀន តាមគ្រឹះស្ថានបណ្តុះបណ្តាលសុខាភិបាលផ្សេងទៀត។ ក្នុងនោះ ពួកគេក៏អាចស្នើសុំទៅសិក្សានៅសាលាមធ្យមសិក្សាសុខាភិបាលភូមិភាគ តាមបណ្តាខេត្តមួយចំនួន ដោយពុំចាំបាច់បង់ថ្លៃសិក្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ