ក្រសួងអប់រំបញ្ជាក់ពីភាពត្រឹមត្រូវនៃចំណាត់ការរបស់ខ្លួន នាសម័យប្រឡងបាក់ឌុបឆ្នាំនេះ
ក្រសួងអប់រំយុវជន និងកីឡា បានប្រកាសថាពាក្យបណ្តឹងបីប្រភេទដែលឳពុក ម្តាយ និងអាណាព្យាបាលសិស្សបានប្តឹងតវ៉ាកន្លងមក ត្រូវបានដោះស្រាយរួចរាល់ហើយ ដោយលទ្ធផលបង្ហាញនូវភាពត្រឹមត្រូវ តម្លាភាព និងឆ្លុះបញ្ចាំងនូវសមត្ថភាពរបស់បេក្ខជន ដែលបានចូលរួមប្រឡងសញ្ញាប័ត្របាក់ឌុបនៅឆ្នាំ២០១៥នេះ។
ចុះផ្សាយនៅថ្ងៃ៖
ក្រសួងអប់រំយុវជននិងកីឡា នៅថ្ងៃពុធទី១៤តុលានេះ បានប្រកាសថាការកែសន្លឹកកិច្ចការ និងការផ្តល់ពិន្ទុ នាពេលកន្លងមក ពិតជាត្រឹមត្រូវទៅតាមអត្រាកំណែ ដែលបានដាក់ចេញ។រីឯការអនុវត្តការងារបូកស្រង់ពិន្ទុរបស់បេក្ខជនដោយប្រព័ន្ធកុំព្យូទ័រ ពិតជាមានតម្លាភាព ហើយលទ្ធផលនៃការប្រឡងដែលបានប្រកាសគឺពិតជាឆ្លុះបញ្ចាំងទៅលើសមត្ថភាពរបស់បេក្ខជន។
ការប្រកាសនេះបានធ្វើឡើងបន្ទាប់ពីក្រសួងអប់រំ បានផ្តល់ដល់មាតា បិតា អាណាព្យាបាល ឬអ្នកពាក់ព័ន្ធ ដែលមិន ពេញចិត្តចំពោះលទ្ធផលប្រឡងសញ្ញាប័ត្រទុតិយភូមិ ឬបាក់ឌុបនៅឆ្នាំ២០១៥នេះ មានសិទ្ធិតវ៉ារយៈពេល៣០ថ្ងៃ គិតចាប់តាំងពីថ្ងៃប្រកាសលទ្ធផលប្រឡង កាលពីថ្ងៃទី១២-១៣កញ្ញាកន្លងទៅនេះ។
សូមបញ្ជាក់ថា ក្រសួងអប់រំបានបង្កើតក្រុមការងារកោសលវិច័យ ដើម្បីពិនិត្យយ៉ាងគ្រប់ជ្រុងជ្រោយ លើគ្រប់ពាក្យបណ្តឹងទាំងអស់ ដោយបែងចែកពាក្យបណ្តឹងជា៣ប្រភេទ គឺបណ្តឹងរបស់បេក្ខជន ដែលត្រូវប្រកាសថាប្រឡងធ្លាក់ ប្តឹងសុំពិនិត្យមើលពិន្ទុ។ ប្រភេទពាក្យបណ្តឹងរបស់បេក្ខជន មិនពេញចិត្តចំពោះនិទ្ទេស ដែលខ្លួនទទួលបាន និងប្រភេទពាក្យបណ្តឹងរបស់បេក្ខជន ដែលសុំឲ្យកែសន្លឹកកិច្ចការឡើងវិញ។
តាមក្រសួងអប់រំ ពាក្យបណ្តឹងខ្លះបានធ្វើស្របទៅតាមគោលការណ៍ណែនាំនៃស្មារតីប្រកាសត្រង់ប្រការ១១ ហើយពាក្យបណ្តឹងខ្លះទៀតមិនស្របតាមស្មារតីប្រកាសនេះទេ។
ការផ្តល់ឱកាសដល់មាតា បិតា អាណាព្យាបាល ក្នុងការដាក់ពាក្យបណ្តឹងតវ៉ាពីលទ្ធផលប្រឡងរបស់បេក្ខជននៅឆ្នាំនេះ ទទួលបានការអបអរពីមជ្ឈដ្ឋាននានា ដែលបានតាមដាន កំណែទម្រង់លើវិស័យអប់រំ ដោយសារកន្លងមកមិនមានការអនុញ្ញាតដូច្នេះទេ ពោលគឺការប្រកាសលទ្ធផលប្រឡង គឺជាការកំណត់ចុងក្រោយពីក្តីសង្ឃឹម និងបរាជ័យរបស់បេក្ខជន ដែលបានប្រឹងប្រែងខុសៗគ្នា អស់រយៈពេល១២ឆ្នាំកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ