យុទ្ធនាការអក្ខរកម្មជាតិឆ្នាំ ២០១៥ សម្រេចបានជាង ៧០ភាគរយ
បន្ទាប់ពីបានចាប់ផ្តើមកាលពីខែកុម្ភៈឆ្នាំនេះមក យុទ្ធនាការអក្ខរកម្មជាតិឆ្នាំ ២០១៥ អាចសម្រេចបានជាង ៧០ភាគរយ ឬស្មើនឹងចំនួនពលរដ្ឋ ដែលមកចុះឈ្មោះចូលរៀនថ្នាក់អក្ខរកម្មប្រមាណ ៧ម៉ឺននាក់។ តាមគម្រោងយុទ្ធនាការនេះ គ្រោងពន្លឿនលទ្ធផលអត្រាអក្ខរកម្មជនពេញវ័យពីអាយុ ១៥ឆ្នាំឡើងទៅ ឲ្យបាន ៨៤.៤០ភាគរយ ឬស្មើនឹងចំនួនមនុស្ស ៩ម៉ឺន២ពាន់នាក់ នៅចុងឆ្នាំ ២០១៥។ នេះគឺជាលទ្ធផល ដែលត្រូវបានបង្ហាញនៅក្នុងពិធីសំណេះសំណាលជាមួយអ្នកស្ម័គ្រចិត្តយុទ្ធនាការអក្ខរកម្មជាតិឆ្នាំ ២០១៥ ដែលបានធ្វើឡើងនៅ មជ្ឈមណ្ឌលសហប្រតិបត្តិការកម្ពុជា កូរ៉េ នៃសកលវិទ្យាល័យភូមិន្ទភ្នំពេញ ឬ CKCC នាព្រឹកថ្ងៃទី ០៦តុលានេះ។
ចុះផ្សាយនៅថ្ងៃ៖
ស្តាប់ - ០២:៣៧
នៅក្នុងពិធីសំណេះសំណាលជាមួយអ្នកស្ម័គ្រចិត្តយុទ្ធនាការអក្ខរកម្មជាតិឆ្នាំ ២០១៥ លោកយិនសៀង សុមេធ មន្ត្រីសម្របសម្រួលយុទ្ធនាការនេះ បានឲ្យដឹងថា ក្រោយពីដំណើរការយុទ្ធនាការនេះជិត ៩ខែមក កម្ពុជាទទួលបានអ្នកចុះឈ្មោះចូលរៀនក្នុងថ្នាក់អក្ខរកម្ម ប្រមាណ ៧ម៉ឺននាក់ ដែលស្មើនឹង ៧០ភាគរយ នៃគោលការណ៍ ដែលយុទ្ធនាការចង់បានគឺ ៨៤.៤០ភាគរយ ឬស្មើនឹង ៩ម៉ឺន២ពាន់។
យុទ្ធនាការអក្ខរកម្មជាតិឆ្នាំ២០១៥ ត្រូវបានធ្វើពីធីផ្សព្វផ្សាយ កាលពីថ្ងៃទី២ ខែមីនាឆ្នាំ២០១៥ កន្លងទៅ។ យុទ្ធនាការនេះ មានគោលដៅពន្លឿននូវការសម្រេចលទ្ធផលអត្រាអក្ខរកម្មជនពេញវ័យពីអាយុ ១៥ឆ្នាំឡើង ឲ្យបាន ៨៤,៤០ភាគរយ នៅឆ្នាំ២០១៥។ តាមអង្គការយូណេស្កូ សព្វថ្ងៃថ្នាក់អក្ខរកម្ម មានសរុបចំនួន ៣១៥១ ថ្នាក់ ដែលកំពុងដំណើរការ នៅទូទាំងប្រទេស។
កន្លងមក មានបេក្ខជនសរុបចំនួន ១៨៨នាក់ បានដាក់ពាក្យធ្វើជាអ្នកស្ម័គ្រចិត្ត សម្រាប់យុទ្ធនាការអក្ខរកម្មជាតិ២០១៥។ ក៏ប៉ុន្តែដោយសារចំនួន និងទីតាំងថ្នាក់អក្ខរកម្ម មានកំណត់ ដូច្នេះមានតែអ្នកស្ម័គ្រចិត្តចំនួន ៨៨នាក់ប៉ុណ្ណោះ ត្រូវបានជ្រើសរើសចុងក្រោយ សម្រាប់យុទ្ធនាការឆ្នាំនេះ។ អ្នកស្ម័គ្រចិត្តទាំងអស់នោះ មាននៅក្នុងខេត្តកណ្តាល បន្ទាយមានជ័យ កំពង់ស្ពឺ ព្រះវិហារ ព្រៃវែង និងរាជធានីភ្នំពេញ។
តួនាទីរបស់អ្នកស្ម័គ្រចិត្តទាំងនោះ គឺជួយគាំទ្រ និងលើកកម្ពស់ការយល់ដឹងពីសកម្មភាពយុទ្ធនាការអក្ខរកម្មជាតិ ក៏ដូចជាចុះជួយគាំទ្រដំណើរការថ្នាក់រៀនអក្ខរកម្ម។ អ្នកស្ម័គ្រចិត្ត ត្រូវចំណាយពេលវេលាផ្ទាល់ខ្លួន ចុះជួយថ្នាក់អក្ខរកម្មនៅតាមសហមគមន៍របស់គេ ២ដង ក្នុងមួយសប្តាហ៍។ ហើយពួកគេ ត្រូវជួយគ្រូអក្ខរកម្ម ក្នុងការដំណើរការថ្នាក់រៀន និងជួយ បង្រៀនសិស្សអក្ខរកម្ម។
តាមលោកយិនសៀង សុមេធ នេះគឺជាយុទ្ធនាការលើកទី១ ដែលអង្គការយូណេស្គូ និងក្រុមហ៊ុនឯកជនមួយ បានសហការជាមួយនឹងក្រសួងអប់រំ យុវជន និងកីឡាកម្ពុជា ផ្តើមគម្រោងនេះ។ ហើយប្រសិនជាទទួលបានជោគជ័យ នោះគេត្រូវចាំការពិចារណា ពីរដ្ឋាភិបាលសិនថា តើគួរត្រូវមានយុទ្ធនាការបែបនេះបន្តទៀត ឬយ៉ាងណា។ លោកសុមេធ បានបញ្ជាក់ថា អ្នកស្ម័គ្រចិត្តក្នុងយុទ្ធនាការនេះ នឹងទទួលបានគុណតំលៃក្នុងការយល់ដឹងពីការប្រាស្រ័យទាក់ទងគ្នា ហើយអង្គការយូណេស្កូ នឹងចេញវិញ្ញាបនប័ត្របញ្ជាក់ពីស្នាដៃរបស់ពួកគេ ក្រោយពេលបញ្ចប់យុទ្ធនាការ។
បើផ្អែកតាមឯកសារវិទ្យាស្ថានស្ថិតិរបស់អង្គការ យូណេស្កូ សម្រាប់ប្រទេសក្នុងសមាគមអាស៊ាន ប្រទេសកម្ពុជា មានអត្រាអក្ខរកម្មអាយុ ១៥ឆ្នាំ ឡើងខ្ពស់ជាង ប្រទេសឡាវ ប៉ុន្តែនៅមានកម្រិតទាបជាងប្រទេសមួយចំនួនដូចជា ឥណ្ឌូនេស៊ី ម៉ាឡេស៊ី ភូមា វៀតណាម និងថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ