៥ចំណុចបានដាក់លើតុពិភាក្សាក្នុងជំនួប ស ខេង-កឹម សុខា
របៀបវារៈចំនួន៥ បានត្រូវពិភាក្សាកាលពីល្ងាចថ្ងៃចន្ទ នៅក្នុងជំនួបពិភាក្សារវាង លោក ស ខេង និង លោក កឹម សុខា។ ជាជំនួបក្នុងនាមតំណាងមតិភាគតិចនិងមតិភាគច្រើននៃរដ្ឋសភា។ ជំនួបនេះក៏ស្របពេលដែលសកម្មជនគណបក្សសង្គ្រោះជាតិត្រូវបានចាប់ខ្លួនជាបន្តបន្ទាប់ផងដែរ។
ចុះផ្សាយនៅថ្ងៃ៖
ស្តាប់ - ០១:៥៣
របៀបទាំង៥នោះ រួមមាន៖
ទី១-ការចាប់ឃុំសកម្មជនគណបក្សសង្គ្រោះជាតិ
ទី២-បញ្ហាព្រំដែន
៣-ពិភាក្សាបន្ថែមទៅលើច្បាប់ស្ដីពីសមាគមនិងអង្គការក្រៅរដ្ឋាភិបាល
ទី៤-កំណត់ថ្ងៃបោះឆ្នោតថ្នាក់ជាតិនិងថ្នាក់ឃុំ
និងទី៥-ពិនិត្យលទ្ធផលដែលសម្រេចបានក្រោយថ្ងៃទី២២កក្កដានិងវប្បធម៌សន្ទនាបង្កើតឡើងដោយ លោក ហ៊ុន សែន និង លោកសម រង្ស៊ី។
ក្រោយជំនួបជាងមួយម៉ោងគណបក្សប្រជាជននិងគណបក្សសង្គ្រោះជាតិបានធ្វើសន្និសីទកាសែតរួមគ្នានៅវិមានរដ្ឋសភា។ លោក សក់ សេដ្ឋា តំណាងគណបក្សប្រជាជនកម្ពុជាបញ្ជាក់ថា ការជាប់ឃុំរបស់សកម្មជនគណបក្សសង្គ្រោះជាតិនិងការស្វែងរកអន្តរាគមន៍នោះគឺជានីតិវិធីរបស់តុលាការ។ គណបក្សប្រជាជនជំរុញឲ្យសង្គ្រោះជាតិប្ដឹងបន្តទៅតុលាការឧទ្ធរណ៍និងរកមេធាវីការពារក្ដីចំពោះសកម្មជន៣នាក់ដែលត្រូវបានឃុំខ្លួនកាលពីប៉ុន្មានថ្ងៃមុន។
លោក សក់ សេដ្ឋាបន្តថា រឿងរ៉ាវព្រំដែនវិញគណបក្សទាំងពីរបានស្នើសុំគ្នាកុំយកបញ្ហានេះក្នុងរូបភាពកេងចំណេញនយោបាយព្រោះព្រំដែនជាអាយុជីវិតរបស់ប្រទេសជាតិ។ ជុំវិញច្បាប់អង្គការក្រៅរដ្ឋាភិបាលនិងសមាគមដែលពេលនេះកំពុងស្ថិតនៅក្នុងការត្រួតពិនិត្យធម្មនុញ្ញភាពដោយក្រុមប្រឹក្សាធម្មនុញ្ញគឺលោក សក់ សេដ្ឋា អះអាងថា ប្រសិនបើការអនុវត្តមានការរឹតត្បិតដល់សិទ្ធសេរីភាពរបស់សង្គមស៊ីវិលនិងធ្វើវិសោធកម្មឡើងវិញ។ ចុងក្រោយចំពោះការកំណត់ថ្ងៃបោះឆ្នោតគណបក្សទាំងពីរនឹងជួបពិភាក្សាគ្នាលើកក្រោយបន្ទាប់ពីការប្រកាសដាច់ណាត់របស់លោកនាយករដ្ឋមន្ត្រីថានឹងយកតាមច្បាប់ចាស់នោះ។
ដោយឡែកចំពោះលទ្ធផលនៃកិច្ចព្រមព្រៀង២២កក្ដដានិងវប្បធម៌សន្ទនាត្រូវបានមន្ត្រីជាន់ខ្ពស់គណបក្សថា សម្រេចបានគួរឲ្យកត់សម្គាល់តាមរយៈការបង្កើតច្បាប់បោះឆ្នោតថ្មីដើម្បីឈានទៅដល់ការបង្កើតក្បាលម៉ាស៊ីនគ.ជ.ប.ថ្មីដូចគ្នា។
យ៉ាងណាក៏ដោយសន្និសីទកាសែតរវាងមន្ត្រីជាន់ខ្ពស់ទាំងពីរមិនបានលម្អិតឲ្យបានស៊ីជម្រៅប៉ុន្មាននោះទេចំពោះលទ្ធផលនៃជំនួបនេះ។ ជាក់ស្ដែង អេង ឆៃអ៊ាង ដែលជាតំណាងគណបក្សសង្គ្រោះជាតិមិនបានលើកឡើងបន្ថែមអ្វីឡើយក្រៅតែពីការឯកភាពទៅតាមលោក សក់ សេដ្ឋា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ