ស្ថាប័នរដ្ឋគួរធ្វើគំរូគេក្នុងការធានានិរន្តរភាពមន្ទីរពេទ្យគន្ធបុប្ផា
ចុះផ្សាយនៅថ្ងៃ៖
ស្តាប់ - ០៤:៥១
រដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចកាត់យក២ដុល្លារ ដែលបានមកពីការតម្លើងថ្លៃសំបុត្រពីទេសចរណ៍បរទេសចូលមើលអង្គរវត្ត ផ្តល់ដល់មន្ទីរពេទ្យគន្ធបុប្ផា។ ទោះយ៉ាងនេះក្តី ការសម្រេចនេះ គ្រាន់តែជាផ្នែកមួយប៉ុណ្ណោះ ក្នុងការជួយសម្រាលការលំបាកលើបញ្ហាហិរញ្ញវត្ថុរបស់មន្ទីរពេទ្យ។ អ្វីដែលគួរធ្វើ គឺទាំងអស់គ្នាត្រៀមខ្លួនឲ្យហើយ ដើម្បីធានានិរន្តរភាពមន្ទីរពេទ្យសប្បុរសនេះ នៅពេលដែលលោកវេជ្ជបណ្ឌិត Beat Richner អស់លទ្ធភាពរកលុយនៅពេលខាងមុខ។
រដ្ឋាភិបាលកម្ពុជានឹងតម្លើងថ្លៃលើបណ្ណចូលទស្សនារមណីយដ្ឋានអង្គរ ចំពោះភ្ញៀវទេសចរបរទេសម្នាក់ៗក្នុងចំនួន២ដុល្លារ ដែលនឹងត្រូវអនុវត្តចាប់ពីខែកុម្ភៈឆ្នាំ២០១៧តទៅ។ ថវិការ២ដុល្លារនេះត្រូវបានក្រសួងសេដ្ឋកិច្ចនិងហិរញ្ញវត្ថុ ប្រាប់ទៅលោកវេជ្ជបណ្ឌិត Beat Richner ស្ថាបនិកមូលនិធិគន្ធបុប្ផា តាមរយៈលិខិតជាលាយលក្ខណ៍អក្សរមួយកាលពីថ្ងៃទី៨ខែសីហាថា នឹងផ្តល់ជូនមន្ទីរពេទ្យគន្ធបុប្ផា បន្ថែមពីលើថវិកាបដិភាគរបស់រដ្ឋាភិបាលកម្ពុជាដែលមានប្រមាណ៣លានដុល្លារក្នុង១ឆ្នាំ។
ការសម្រេចចិត្តរបស់រដ្ឋាភិបាលបង្កើនប្រាក់សម្រាប់ទ្រទ្រង់មន្ទីរពេទ្យគន្ធបុប្ផា ត្រូវបានគេ មើលឃើញថាជាកាយវិការវិជ្ជមានមួយបន្ថែមទៀត ខណៈដែលលោកវេជ្ជបណ្ឌិត Beat Richner បានថមថយកម្លាំងនិងមានវ័យកាន់តែចាស់ទៅហើយនោះ។ ម្យ៉ាងទៀត រដ្ឋាភិបាលគួរតែធ្វើជាគំរូដូច្នេះ ដើម្បីបង្ហាញថាវាសនារបស់កូនខ្មែរក្រីក្រ គ្មានលទ្ធភាពទទួលបានសេវាសុខភាពកម្រិតខ្ពស់នៅតែមានក្តីសង្ឃឹម។
ជាការពិត លោកវេជ្ជបណ្ឌិត Beat Richner បានសរសេរនៅក្នុងគេហទំព័រវេបសាយផ្ទាល់ខ្លួនរបស់លោក ថាចាប់តាំងពីឆ្នាំ១៩៩២មក មូលនិធិគន្ធបុប្ផាបានចំណាយថវិកាអស់៥៦០លានដុល្លារ ក្នុងនោះ ៣,២ភាគរយ បានមកពីរដ្ឋាភិបាលកម្ពុជា ៤,៣ភាគរយ ជួយដោយ របស់រដ្ឋាភិបាលស្វីស និង៩២,៥ភាគរយ គឺជាថវិកាដែលបានមកពីសប្បុរសជន។ ជាមធ្យមមន្ទីរពេទ្យគន្ធបុប្ផាទាំង៥ ចំណាយថវិកាប្រមាណ១២ម៉ឺនដុល្លារក្នុងមួយថ្ងៃ។ រយៈពេល២៤ឆ្នាំមកនេះ មន្ទីរពេទ្យបានពិនិត្យព្យាបាលអ្នកជំងឺជាកុមារបានចំនួន១៦លាននាក់ និងទទួលកុមារឲ្យសម្រាកពេទ្យចំនួន១,៦លាននាក់។
អ្វីដែលជាការកត់សម្គាល់គឺ ក្រៅពីការប្រកាសរបស់ស្ថាបនិកមន្ទីរពេទ្យគន្ធបុប្ផាលោកវេជ្ជបណ្ឌិត Beat Richner កាលពីឆ្នាំកន្លងទៅពីការធ្លាក់ចុះនូវលទ្ធភាពផ្គត់ផ្គង់របស់លោក ចំនួនអ្នកជំងឺធ្ងន់ៗ ដែលជាកុមារភាគច្រើនមកពីខេត្តនានា និងទីជនបទ មានការកើនឡើងជារៀងរាល់ឆ្នាំ។
ប្រឈមនឹងបញ្ហានេះ កន្លងមកក៏ដូចជាបច្ចុប្បន្ន មានអង្គការមហាជន ប្រជាពលរដ្ឋខ្មែរទាំងក្នុងនិងក្រៅប្រទេស សប្បរសជននានា អ្នកមានធនធាន និងអ្នកក្រក្សត់ពង្រាត់ពីមាត់ពីកផងដែរ បានស្វះស្វែង គគ្រឹកគគ្រេងយកថវិកាដែលប្រមូលបានជាក្រុមជាពួកទៅជូនដល់មន្ទីរពេទ្យគន្ធបុប្ផាដោយផ្ទាល់ៗ។ ក៏ប៉ុន្តែសកម្មភាពនេះហាក់ដូចជាភ្លើងចំបើង ដែលមិនអាចធានានិងឆ្លើយតបទៅនឹងតម្រូវការថវិកាដែលបានចំណាយលើមន្ទីពេទ្យសប្បុរសធម៌មួយនេះ ក្នុងមួយឆ្នាំៗ។
ដំណើរការជាង២០ឆ្នាំមកនេះ រដ្ឋាភិបាលស្វីស និងសប្បរសជនរបស់គេបានផ្តល់ជំនួយយ៉ាងទៀតទាត់ ជាហេតុធ្វើឲ្យកុមារខ្មែរជាច្រើនមានសង្ឃឹម និងរួចផុតពីគ្រោះថ្នាក់ដោយជំងឺ។ ក៏ប៉ុន្តែការផ្តល់ជំនួយរបស់ស្វីសក៏មានពេលវេលាកំណត់ផងដែរ។ ដូច្នេះដើម្បីចៀសវាងពាក្យថារដ្ឋាភិបាល និងប្រជាជនស្វីស ស្រលាញ់ខ្មែរជាងខ្មែរ គប្បីខ្មែរត្រូវមានការត្រៀមលក្ខណៈមុនពេលដែលលោកវេជ្ជបណ្ឌិត Beat Richner អស់លទ្ធភាពក្នុងការជួយ។
ជាដំណោះស្រាយ គួររដ្ឋាភិបាលកម្ពុជាបង្ហាញភាពជាគំរូដូចជាករណី ដែលមានការសម្រេចចិត្តនៅពេលនេះ ដកចំណូលពីទេសចរណ៍មួយភាគតូចជួយទៅដល់មន្ទីរពេទ្យគន្ធបុប្ផា។ មិនគ្រប់គ្រាន់ទេ ត្រូវមានការសិក្សាពីចំណូលបន្ថែម ទៅលើផ្នែកឬសេវាកម្មប្រាក់ចំណេញផ្សេងៗទៀតរបស់រដ្ឋ ដើម្បីបង្កើនការផ្តល់ជំនួយដល់មន្ទីរពេទ្យមួយនេះ បើទោះណាជារដ្ឋមានមន្ទីរពេទ្យធំៗ និងមន្ទីរពេទ្យបង្អែកជាច្រើនហើយក៏ដោយ។
ជាមួយគ្នានេះ ប្រជាពលរដ្ឋខ្មែរ អង្គការ សមាគមជាតិ រួមមានកាកបាទក្រហមជាដើម ក៏ត្រូវមានវប្បធម៌ចែករំលែកសម្រាប់មន្ទីរពេទ្យគន្ធបុប្ផាដែរ ហើយការផ្តល់ថវិកានេះគួរត្រូវបានធ្វើឡើងជាអចិន្ត្រៃយ៍។ ទាំងស្ថាប័នរដ្ឋនិងសហគ្រាសឯកជន រួមជាមួយនឹងប្រជាពលរដ្ឋខ្មែរ គួរតែបង្កើនការយកចិត្តទុកដាក់លើអនាគតរបស់មន្ទីរពេទ្យគន្ធបុប្ផានេះ ឲ្យកាន់តែខ្លាំងបន្ថែមទៀត។ យកចិត្តទុកដាក់ដោយហេតុថា បញ្ហាប្រឈមរបស់សង្គមខ្មែរលើវិស័យសុខុមាលភាពរបស់កុមារនឹងមានសភាពគួរឲ្យព្រួយបារម្ភ ប្រសិនបើគ្មានវត្តមានមន្ទីរពេទ្យគន្ធបុប្ផានៅថ្ងៃក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ