លោកគង់ វិបុល៖ រថយន្តប្រមាណជា៥ម៉ឺនគ្រឿងទៀតនៅមិនទាន់បង់ពន្ធសម្រាប់ឆ្នាំ២០១៥នេះ
រហូតមកទល់នឹងថ្ងៃ៨ធ្នូនេះ មានរថយន្តជាង៣៥ម៉ឺនគ្រឿង បានទៅបង់ពន្ធតាមកាលកំណត់របស់ក្រសួងសេដ្ឋកិច្ច និងហិរញ្ញវត្ថុ។ ដោយឡែករថយន្តប្រមាណជា៥ម៉ឺនគ្រឿងទៀត នៅមិនទាន់បានបង់ពន្ធសម្រាប់ឆ្នាំ២០១៥នេះទេ។ នេះគឺជាការបញ្ជាក់របស់លោក គង់ វិបុល អគ្គនាយក នៃអគ្គនាយកដ្ឋានពន្ធដារ។ លោកបានបន្តឲ្យដឹងទៀតថា ការប្រមូលពន្ធនៅក្នុងឆ្នាំ២០១៥នេះ មានការកើនឡើង៥ភាគរយ ប្រៀបធៀបនឹងឆ្នាំ២០១៤។
ចុះផ្សាយនៅថ្ងៃ៖
ស្តាប់ - ០២:១២
ប្រាក់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៥ ដែលអគ្គនាយកដ្ឋានពន្ធដារប្រមូលមានចំនួន ១២០ពាន់លានរៀល កើនឡើងចំនួន៥% ប្រៀបធៀបនឹងឆ្នាំ២០១៤ ដែលមានចំនួន១១៤ពាន់លានរៀល។ នេះបើតាមការឲ្យដឹងពីលោក គង់ វិបុល អគ្គនាយកនៃអគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ។
លោកអគ្គនាយកបានបន្តឲ្យដឹងទៀតថា រហូតមកទល់នឹងពេលនេះ មានរថយន្តចំនួន៣៥០,៧៥៦ គ្រឿងបានទៅបង់ពន្ធសម្រាប់ឆ្នាំ២០១៥នេះ រួចរាល់ហើយ។ ហើយតាមការប៉ាន់ស្មានរបស់អគ្គនាយកដ្ឋានពន្ធដារ គឺនៅមានរថយន្តប្រមាណជា៥ម៉ឺនគ្រឿងបន្ថែមទៀត ដែលមិនទាន់បានទៅបង់ពន្ធ។
លោកគង់ វិបុល ក៏បានអំពាវនាវឲ្យម្ចាស់រថយន្តទាំងអស់ដែលមិនទាន់បានទៅបង់ពន្ធ សូមទៅបង់ពន្ធ និងប្រាក់ពិន័យ ក្នុងទឹកប្រាក់មួយគុណនឹងពីរ នៅតាមសាខាពន្ធដារខេត្ត ខណ្ឌទាំងអស់ ធនាគារកាណាឌីយ៉ា និងធនាគារអេស៊ីលីដា ចាប់ពីថ្ងៃទី០១ ដល់ថ្ងៃទី៣១ ធ្នូ ឆ្នាំ២០១៥ ដើម្បីកុំឲ្យរំខានអារម្មណ៍នៅពេលធ្វើដំណើរតាមដងផ្លូវ ហើយត្រូវសមត្ថិកិច្ចឃាត់រថយន្តទាំងកណ្តាលផ្លូវនោះ។ ព្រោះថាចាប់ពីថ្ងៃទី០១ មករាឆ្នាំ២០១៦ទៅ អគ្គនាយកដ្ឋានពន្ធដារនឹងដឹកនាំក្រុមការងារចម្រុះ សហការជាមួយនឹងអាជ្ញាធរមូលដ្ឋាន ដើម្បីត្រួតពិនិត្យ និងឃាត់រថយន្តណាដែលមិនទាន់បានបង់ពន្ធ ហើយចាប់ពិន័យជាទឹកប្រាក់បង់ពន្ធមួយគុណនឹងពីរ។
សូមរំលឹកជូនថា រយៈពេលនៃការប្រកាសបង់ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទសម្រាប់ឆ្នាំ២០១៥ ត្រូវបានបិទបញ្ចប់ជាស្ថាពរហើយ កាលពីថ្ងៃទី៣០ វិច្ឆិកា ឆ្នាំ២០១៥ កន្លងទៅនេះ។ ប៉ុន្តែកាលពីថ្ងៃទី៣ធ្នូ កន្លងទៅថ្មីៗនេះ អគ្គនាយកដ្ឋានពន្ធដារ បានចេញសេចក្តីជូនដំណឹងដល់គ្រប់សាខាពន្ធដារខេត្ត ខណ្ឌ និងស្នើសាខាធនាគារកាណាឌីយ៉ា និងសាខាធនាគារអេស៊ីលីដា ឲ្យបន្តទទួលយកការដាក់លិខិតប្រកាសបង់ប្រាក់ពន្ធ និងប្រាក់ពិន័យចំពោះម្ចាស់រថយន្ត ដែលមិនបានបង់ពន្ធកាលពីមុន ចាប់ពីថ្ងៃទី០១ដល់៣១ ធ្នូ ឆ្នាំ២០១៥នេះ។
សូមបញ្ជាក់ផងដែរថា កាលពីឆ្នាំ២០១៤ មានរថយន្តចំនួន៣៤៧,៦៤៨គ្រឿងបានទៅបង់ពន្ធជូនរដ្ឋ ដែលមានទឹកប្រាក់ចំនួន ១១៤ពាន់លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ