ប្រជាជនរិះគន់មន្ត្រីសាខាពន្ធដា អគ្គនាយកដ្ឋានពន្ធដាពន្យល់
មន្ត្រីសាខាពន្ធដាខណ្ឌទួលគោក រាជធានីភ្នំពេញ ដែលទៅធ្វើការមិនទៀងទាត់ពេលវេលា និងធ្វើឱ្យប្រជាជនពិបាកបង់ពន្ធ រងពាក្យរិះគន់ធ្ងន់ៗពីអ្នកអាជីព តាមរយៈបណ្ដាញសង្គម។ លោក គង់ វិបុល អគ្គនាយកនៃអគ្គនាយកដ្ឋានពន្ធដាកម្ពុជា បានដឹង និងទទួលស្គាល់ករណីនេះ ប៉ុន្តែទន្ទឹមនឹងនេះ លោកឆ្លៀតពន្យល់បន្ថែមអំពីវិធានការដែលអគ្គនាយកដ្ឋានពន្ធដាបានធ្វើកន្លងទៅ ទាក់ទងនឹងរឿងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
នៅលើបណ្ដាញសង្គមហ្វេសប៊ុក លោក អាក់តែល ម៉ាកស៊ីស ( Aktel Maxis) បានទាមទារឱ្យលោក គង់ វិបុល អគ្គនាយកពន្ធដាកម្ពុជា កំណត់ម៉ោងធ្វើការរបស់មន្ត្រីពន្ធដាឱ្យបានច្បាស់ បន្ទាប់ពីម្ចាស់អាជីវកម្មរូបនេះទៅអង្គុយចាំបង់ពន្ធនៅសាខាពន្ធដាខណ្ឌទួលគោក តែមិនឃើញមានមនុស្សធ្វើការ។ លោក អាក់តែល ម៉ាកស៊ីស ដែលធ្វើការនៅអង្គការវិនិយោគយុវជនកម្ពុជាផង បានចោទសួរថា«តើអោយប្រជាជនមានកំលាំងចិត្ត[ឯ]ណាទៅបង់ពន្ឋជូនរដ្ឋទៀត»។
សាររបស់គាត់ផ្សាយជាចំហរតាំងពីថ្ងៃ១៨ ខែកញ្ញាមែន ប៉ុន្តែនៅថ្ងៃចន្ទ ទី២១ ខែកញ្ញា លោក សុខ គួង ( Sok Kuong) ដែលជាប្រធានគម្រោងនៅទីភ្នាក់ងារឧត្តមសិក្សាប្រើប្រាស់ភាសាបារាំងប្រចាំកម្ពុជាបានចែកផ្សាយបន្ត ដោយបន្ថែមអត្ថាធិប្បាយថា «គឺនៅពន្ធដាខ័ណ្ឌទួលគោកនេះហើយ» ដែលគាត់ទៅបង់ពន្ធពីរថ្ងៃមិនបាន។ លោក សុខ គួង ដែលបានសង្កេតឃើញប្រជាជនរាប់សិបនាក់រង់ចាំបង់ពន្ធ បានសរសេរថា«មានយុវជនតែម្នាក់គត់ធ្វើការ ឯមនុស្សដទៃទៀតនៅក្នុងការិយាល័យអង្គុយដូចទីងមោង»។
ចំពោះករណីនេះ លោក គង់ វិបុល អគ្គនាយកពន្ធដាកម្ពុជា បានថ្លែងថា ជាច្រើនឆ្នាំមកហើយដែលអគ្គនាយកដ្ឋានពន្ធដាបានប្តូរម៉ោងធ្វើការឱ្យដូចវិស័យឯកជន ពោលគឺមិនបិទពេលថ្ងៃត្រង់ បានប្រើម៉ាស៊ីនស្កែនមេដៃត្រួតពិនិត្យវត្តមាន និងម៉ោងចេញចូលនៅគ្រប់កន្លែង ព្រមទាំងបានប្រើកម្មវិធីវាយតម្លៃការងាររបស់មន្ត្រីពន្ធដាផង។
សូមបញ្ជាក់ថា អគ្គនាយកដ្ឋានពន្ធដាបានបង្កើនការផ្តល់សេវាដល់អ្នកជាប់ពន្ធឲ្យបានប្រសើរ ងាយស្រួល ឆាប់រហ័សនៅគ្រប់ទីកន្លែង និងអនុវត្តវិធានការនានា សំដៅធ្វើឲ្យបានសម្រេចគោលដៅចំណូលឆ្នាំ២០១៥។
តាមស្ថិតិ ក្នុងរយៈពេល ប្រាំបីខែនៃឆ្នាំ២០១៥ អគ្គនាយកដ្ឋានពន្ធដាកម្ពុជាប្រមូល ចំណូលពន្ធ អាករ គ្រប់ប្រភេទ បានសរុបចំនួនប្រមាណ ៨៩៧,៥៣ លានដុល្លារ ស្មើនឹង៧៧,០៥% នៃគោលដៅកំណត់ដោយច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ