ថ្ងៃទី១ ក្នុងនាមជាប្រធានបក្ស លោកកឹម សុខាត្រួតពិនិត្យបញ្ជីឈ្មោះបេក្ខជន
លោកកឹម សុខាដែលត្រូវតែងតាំងជាប្រធានគណបក្សសង្គ្រោះជាតិកាលពីថ្ងៃទី ០២ មីនានេះ មិនបានធ្វើដំណើរទៅកាន់មូលដ្ឋានក្រោយការតែងតាំងនោះទេ។ ប៉ុន្តែលោកនៅទីស្នាក់ការគណបក្សដើម្បីត្រួតពិនិត្យបញ្ជីឈ្មោះបេក្ខជនដើម្បីដាក់ជូនគណៈកម្មាធិការជាតិរៀបចំការបោះឆ្នោត។ គណបក្សសង្គ្រោះជាតិបានអះអាងថា បញ្ជីឈ្មោះបោះឆ្នោតមានសារៈសំខាន់ជាងសកម្មភាពមូលដ្ឋាន។
ចុះផ្សាយនៅថ្ងៃ៖
ស្តាប់ - ០២:១៧
លោកកឹម សុខានៅថ្ងៃទី ១ក្នុងនាមជាប្រធានបក្ស មិនបានទៅកាន់មូលដ្ឋាននោះទេ ប៉ុន្តែបានចំណាយពេលត្រួតពិនិត្យបញ្ជីឈ្មោះបេក្ខជនរបស់គណបក្សសម្រាប់ការបោះឆ្នោត។ បញ្ជីបេក្ខជនបោះឆ្នោតដែលគណបក្សនីមួយៗត្រូវប្រគល់ជូនគ.ជ.បពីថ្ងៃទី ០៣ មីនាដល់ថ្ងៃទី ០៥ មីនាខាងមុខ។ លោកអេង ឆៃអ៊ាង អនុប្រធានគណបក្សបានប្រាប់វិទ្យុបារាំងអន្តរជាតិថា ការងារត្រួតពិនិត្យបញ្ជីឈ្មោះបោះឆ្នោតគឺជារឿងសំខាន់បំផុត ហើយសំខាន់ជាងការចុះមូលដ្ឋានព្រោះថាបើគ្មានបញ្ជីឈ្មោះបោះឆ្នោតសម្រាប់ការបោះឆ្នោតនោះទេ ការចុះមូលដ្ឋានគឺគ្មានន័យនោះឡើយ។
ទន្ទឹមនឹងនេះ លោកស្រីមួរ សុខហួរ ដែលជាអនុប្រធានគណបក្សក៏បានប្រាប់វិទ្យុបារាំងដែរថា ក្បាលម៉ាស៊ីនថ្មីនេះ នៅមិនទាន់ទៅកាន់មូលដ្ឋាននោះទេដោយត្រូវរៀបចំបញ្ជីឈ្មោះបេក្ខជនឱ្យបានរួចរាល់សិនទើបទៅកាន់មូលដ្ឋានតាមក្រោយ។
លោកស្រីអនុប្រធានបក្សបានបន្តទៀតថា ការងារមូលដ្ឋានគឺជាការងារចាំបាច់ធម្មតារបស់គណបក្ស ហើយមេដឹកនាំថ្មីនេះ កំពុងសិក្សាពីពេលវេលាឆ្ពោះទៅកាន់មូលដ្ឋានដើម្បីបញ្ជ្រៀបគោលនយោបាយចំនួន ៥ចំណុច។ គោលការណ៍ទាំងប្រាំរួមមាន ការពង្រឹងសិទ្ធិអំណាចរបស់ពលរដ្ឋ ការលើកកម្ពស់ជីវភាពប្រជាជន និងអភិវឌ្ឍន៍ សេវាសាធារណៈ សន្តិសុខ រួមទាំងការធ្វើវិមជ្ឈការថ្នាក់ក្រោមដែលគណបក្សនឹងផ្តល់ថវិកាប្រមាណ ៥០ម៉ឺនដុល្លារសម្រាប់ការអភិវឌ្ឍឃុំសង្កាត់ជាដើម។
សូមរំលឹកថា លោកកឹម សុខា ត្រូវបានសមាជវិសាមញ្ញគណបក្សបានបោះឆ្នោតឱ្យឡើងជាប្រធានគណបក្សកាលពីថ្ងៃទី ០២មីនា បន្ទាប់ពីតំណែងប្រធានបក្សត្រូវទំនេរជាងកន្លះខែមក។ ក្រោយសមាជគណបក្ស លោកកឹម សុខា និងលោកស្រី ជូឡុង សូមួរ៉ាភរិយាលោកសម រង្ស៊ី រួមទាំងសហការីចំនួន ២នាក់ផ្សេងទៀតដែលមានលោកស្រី មួរ សុខហួរ និងកញ្ញាកឹម មនោវិទ្យា បានទទួលទានអាហារល្ងាចជាមួយគ្នា។ ជាអាហារនយោបាយដែលលោកស្រីជូឡុង សូមួរ៉ា បានពិភាក្សាជាមួយលោកកឹម សុខាប្រធានគណបក្សថ្មីស្តីយុទ្ធសាស្ត្ររបស់គណបក្សក្នុងរយៈពេល ៣ខែមុនការបោះឆ្នោត។ នេះបើតាមការបញ្ជាក់ពីលោកស្រីមួរ សុខហួរ អនុប្រធានគណបក្សដដែល។ យ៉ាងណាក៏ដោយការធ្វើសកម្មភាពនយោបាយថ្ងៃទី ១របស់ប្រធានបក្សលោកកឹម សុខានាពេលនេះ គឺដោយសារភាពចាំបាច់នៃបញ្ជីឈ្មោះបោះឆ្នោតដែលបក្សត្រូវផ្តល់ទៅឱ្យគ.ជ.ប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ