លោកហ៊ុន សែន៖ កម្ពុជាសម្រេចបានគោលដៅអភិវឌ្ឍន៍សហស្សវត្សរ៍លើការកាត់បន្ថយភាពក្រីក្រ
លោកនាយករដ្ឋមន្រ្តី ហ៊ុន សែន ថ្លែងជាលើកដំបូងពីការអភិវឌ្ឍរបស់កម្ពុជាទៅកាន់ គណៈប្រតិភូបរទេសនៅក្នុងកិច្ចប្រជុំកំពូលអង្គការសហប្រជាជាតិUN មុននឹងលោកប្រកាសគាំទ្រកិច្ចព្រមព្រៀងនិងរបៀបវារៈសកម្មភាព អាដីស អាបាបា។ លោកនាយករដ្ឋមន្រ្តីក៏បានស្នើឲ្យ UN បន្តការគាំទ្រថែមទៀតដល់ប្រទេសទន់ខ្សោយដើម្បីឈរជើងរឹងមាំសម្រាប់ការប្រកួតប្រជែងជាអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ការអភិវឌ្ឍរបស់កម្ពុជាដែលលោកនាយករដ្ឋមន្រ្តី ហ៊ុន សែន លើកឡើងនៅចំពោះមុខគណៈប្រតិភូបរទេសគឺស្ថិរភាពនយោបាយរឹងមាំ សន្តិសុខ និងសណ្ដាប់ធ្នាប់ល្អប្រសើរព្រមទាំងកំណើនសេដ្ឋកិច្ចខ្ពស់ក្នុងអត្រាជាមធ្យម៧,៧ ភាគរយក្នុងមួយឆ្នាំ។
លោក ហ៊ុន សែន បន្តថា មូលដ្ឋានអត្រានៃភាពក្រីក្របានធ្លាក់ចុះយ៉ាងលឿនពីជាង៥៣ភាគរយក្នុងឆ្នាំ២០០៤មកត្រឹម១៦ភាគរយនៅឆ្នាំ២០១៣ដែលធ្វើឲ្យកម្ពុជាសម្រេចបាននូវគោលដៅអភិវឌ្ឍន៍សហស្សវត្សរ៍លើការកាត់បន្ថយភាពក្រីក្រ។ ការបង្ហាញពីភាពរីកចម្រើនរបស់កម្ពុជាពីសំណាក់លោកនាយករដ្ឋមន្រ្តីមិនមែនជារឿងថ្មីទេសម្រាប់ប្រជាពលរដ្ឋកម្ពុជា។ តែនេះគឺជាការលើកឡើងដំបូងក្នុងកិច្ចប្រជុំកំពូលអង្គការសហប្រជាជាតិដើម្បីអនុម័តរបៀបវារៈអភិវឌ្ឍន៍ក្រោយឆ្នាំ២០១៥ ក្រោមប្រធានបទ «ការផ្លាស់ប្ដូរពិភពលោកតាមរយៈការសម្រេចបាននូវរបៀបវារៈអភិវឌ្ឍន៍ក្រោយឆ្នាំ២០១៥»។
ក្នុងន័យនេះលោក ហ៊ុន សែន ក៏បានគាំទ្រចំពោះកិច្ចព្រមព្រៀងនិងរបៀបវារៈសកម្មភាព អាដីស អាបាបា (Addis Abbaba Accord and Action Agenda) ដែលផ្ដោតលើការគៀរគរធនធានក្នុងស្រុកដើម្បីបម្រើឲ្យសេចក្ដីត្រូវការក្នុងការអភិវឌ្ឍន៍។ ជាមួយនិងការគាំទ្រនេះ លោក ហ៊ុន សែន បានស្នើសុំឲ្យUN បន្តគាំទ្រមួយថែមទៀតដល់ប្រទេសទន់ខ្សោយដែលទទួលបានជោគជ័យក្នុងការឈានឡើងទៅកាន់ដំណាក់កាលអភិវឌ្ឍន៍បន្តដើម្បីប្រទេសទាំងនោះអាចឈរជើងរឹងមាំសម្រាប់ការប្រកួតប្រជែងអន្តរជាតិតាមរយៈការបន្តផ្ដល់ហិរញ្ញប្បទានអភិវឌ្ឍន៍ផ្លូវការ ទាំងហិរញ្ញប្បទានឥតសំណងនិងឥណទានសម្បទាន។
ចុងក្រោយ លោក ហ៊ុន សែន ក៏បានផ្ដល់យោបល់ទៅលើរបៀបវារៈអភិវឌ្ឍន៍ក្រោយឆ្នាំ២០១៥ដែលប្រទេសជាសមាជិកអង្គការសហប្រជាជាតិទាំងអស់ត្រូវខិតខំរួមគ្នាគឺ ធានាឲ្យបាននូវការអនុវត្តកិច្ចសន្យាបន្តផ្ដល់ជំនួយពីសំណាក់ប្រទេសអ្នកផ្ដល់ជំនួយក្នុងទំហំ០,៧ភាគរយនៃចំណូលជាតិសរុបទៅដល់ប្រទេសកំពុងអភិវឌ្ឍន៍,បន្តលើកកម្ពស់គោលនយោបាយពាណិជ្ជកម្ម និងកិច្ចសម្រួលពាណិជ្ជកម្មនិងបន្តពង្រឹងស្ថេរភាពនិងពិពិធកម្មហិរញ្ញវត្ថុជាដើម។
តាមគម្រោងនាយករដ្ឋមន្រ្តីកម្ពុជា នឹងបន្តឡើងថ្លែងសុន្ទរកថានៅរាត្រីថ្ងៃទី២៧កញ្ញាស្តីពីសមភាពភេទ និងការលើកកម្ពស់ស្ត្រី។ សូមបញ្ជាក់ថា លោកនាយករដ្ឋមន្រ្តី ហ៊ុន សែន បានចាកចេញពីប្រទេសកម្ពុជាទៅចូលរួមកិច្ចប្រជុំកំពូលអង្គការសហប្រជាជាតិចាប់ពីថ្ងៃ២៥ ដល់ថ្ងៃ២៧ ខែកញ្ញាឆ្នាំ២០១៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ