អង្គការសហប្រជាជាតិកំណត់ទិសដៅអភិវឌ្ឍន៍១៧ចំណុច
បន្ទាប់ពីបានបិទបញ្ចប់ថ្ងៃទីមួយ នៃមហាសន្និបាទប្រចាំឆ្នាំ នៅក្រុងញូយ៉ក កាលពីថ្ងៃសុក្រម្សិលមិញ អង្គការសហប្រជាជាតិ ក៏ដូចជាប្រទេសសមាជិកទាំងអស់ បានសម្រេចព្រមព្រៀងគ្នា ជាឯកច្ឆ័ន្ទ ក្នុងការកំណត់យកទិសដៅអភិវឌ្ឍន៍ ទាំងអស់ ១៧ចំណុច ដើម្បីកាត់បន្ថយភាពក្រីក្រ ភាពមិនស្មើរភាពគ្នា និងជាពិសេស គឺបញ្ហាបម្រែបម្រួលអាកាសធាតុ ដែលភពផែនដីកំពុងតែប្រឈមមុខ។
ចុះផ្សាយនៅថ្ងៃ៖
ស្តាប់ - ០១:៥៩
លោក បាន គីមូន អគ្គលេខាធិការអង្គការសហប្រជាជាតិ បានថ្លែងទាំងទឹកមុខញញឹមថា នេះជាលើកទីមួយហើយ ដែលពិភពលោកយើង ចាប់ដៃគ្នា កំណត់យកទិសដៅសកល ក្នុងការអភិវឌ្ឍន៍ ដែលប្រទេសសមាជិកទាំងអស់ បានសុខចិត្តទទួលយកទៅអនុវត្ត ដើម្បីអាណាគតរបស់មនុស្សជាតិ។
ជាការពិតណាស់ ទិសដៅទាំង១៧ចំណុច នេះ ផ្តោតសំខាន់ លើការកាត់បន្ថយភាពក្រីក្រតោកយ៉ាក គម្លាតរវាងអ្នកមាន និងអ្នកក្រ ហើយជាពិសេស គឺកត្តាអាកាសធាតុ ដែលកំពុងតែចោទឡើង ទូទាំងពិភពលោក ហើយដែលប្រជាជនក្រីក្រ គឺជាអ្នកប្រឈមមុខ ខ្លាំងជាងគេ។ ផែនការអភិវឌ្ឍន៍ ដែលគេដាក់នាមថា ទិសដៅអភិវឌ្ឍន៍ប្រកបដោយចីរភាព គឺជាការក្រសោបរួម នូវបញ្ហាថែររក្សាបរិស្ថាន ធនធានធម្មជាតិ និងការកាត់បន្ថយការកើនឡើងកំដៅផែនដី ដែលកត្តាទាំងនេះ និងជម្រុញ ឲ្យប្រជាជនក្រីក្រ អាចគេចផុត ពីគ្រោះថ្នាក់ ដូចជាមហន្តរាយធម្មជាតិ រឺគ្រោះរាំងស្ងួតជាដើម។
តាមការវាយតម្លៃ ផែនការទាំង១៧ចំណុចនេះ គឺ មានលក្ខណៈល្អប្រសើរ និងក្តោបរួម ជាងទិសដៅសហសវត្សទាំង៨ចំណុច ដែលបានដាក់ចុះ កាលពី ឆ្នាំ២០០០ ព្រោះថា ផែនការថ្មីនេះ នឹងត្រូវអនុវត្ត ទៅឲ្យដល់រិះគល់ ដែលជាប្រភពនៃភាពក្រីក្រតោកយ៉ាក ហើយម្យ៉ាងទៀត គឺវាមិនមែនអនុវត្ត តែនៅតាមបណ្តាប្រទេសកំពុងអភិវឌ្ឍន៍ទេ គឺវាមានតម្លៃអនុវត្តជាសកល។
កាត់បន្ថយភាពក្រីក្រ បំបាត់គម្លាតរវាងអ្នកមាននិងអ្នកក្រ ភាពមិនស្មើរគ្នារវាងប្រទេសនិងប្រទេស បំបាត់គ្រោះទុរភិក្ខ ជំរុញសមភាពរវាងបុរសនិងស្ត្រី គ្រប់គ្រងធនធានទឹកឲ្យមានប្រសិទ្ធិភាព អភិវឌ្ឍន៍ការផលិតថាមពល ដែលមិនបំផ្លាញដល់ធម្មជាតិ ទាំងអស់នេះហើយ គឺជាទិសដៅរួម ដែលប្រទេសទាំងអស់ ត្រូវអនុវត្ត។
សម្តេចប៉ាប ប្រមុខសង្ឃកាតូលិក ដែលមានវត្តមាន នៅក្នុងមហាសន្និបាត បានមានប្រសាសន៍ថា ទាំងអស់នេះ គឺជាសញ្ញា នៃសេចក្តីសង្ឃឹម ដែលបញ្ជាក់ពីសាមគ្គីភាព របស់មនុស្សជាតិទាំងអស់គ្នា។ ប៉ុន្តែព្រះអង្គបានអំពាវនាវ ឲ្យដាក់ចុះនូវវិធានទាំងឡាយណា ដែលច្បាស់លាស់ មានប្រសិទ្ធិភាព ហើយឲ្យឆាប់ទាន់ពេលវេលា កុំបង្អែរបង្អង់។ ដោយឡែក លោក នាយករដ្ឋមន្ត្រី ន័រវេហ្ស វិញ បានសម្តែងការអបអរដែរ ប៉ុន្តែបានឆ្លៀតបន្ថែមថា យើងគួរតែធ្វើឲ្យបានច្រើន ជាជាងការរវល់ជជែកតែគ្នា ដោយឥតបានការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ