ទឹកភ្លៀងដែលធ្លាក់ចុះយ៉ាងគំហុកនៅរាជធានីភ្នំពេញ នៅដើមខែវស្សានេះ បានបណ្ដាលឲ្យទីក្រុងភ្នំពេញលិចលង់ទៅក្នុងជំនន់ទឹកភ្លៀង។ ជំនន់ទឹកភ្លៀងលិចក្រុងភ្នំពេញជារៀងរាល់ឆ្នាំ ត្រូវបានប្រជាពលរដ្ឋបន្ទោសទៅលើប្រព័ន្ធលូចាស់ទ្រុឌទ្រោម និងជាពិសេសការចាក់លុបបឹងនៅជុំវិញទីក្រុង។ សំណួរដដែលៗចោទឡើងជាថ្មីថា តើពេលណាទើបទីក្រុងភ្នំពេញលែងលិចទឹកដោយសារតែជំនន់ទឹកភ្លៀង?
មិនខុសពីឆ្នាំមុនៗទេ ភ្នំពេញ ទីក្រុងគុជ នៅតែលិចទឹកនៅដើមរដូវវស្សានេះ។ កំណាត់ផ្លូវតូចធំសុទ្ធតែលិចលង់ក្រោមជំនន់ទឹកភ្លៀង ខណៈដែលកន្លែងខ្លះទៀត ទឹកភ្លៀងលាយឡំនឹងទឹកលូ បានហូរចូលផ្ទះប្រជាពលរដ្ឋ។ ជំនន់ទឹកភ្លៀងដែលកើតឡើងដដែលៗពីមួយឆ្នាំទៅមួយឆ្នាំដូចនេះ បានបង្កើតឲ្យមានការរិះគន់យ៉ាងចាស់ដៃចំពោះអាជ្ញាធររាជធានីភ្នំពេញ។ លើសពីការរអ៊ូរទាំ ពលរដ្ឋមួយចំនួនទៀតបានចោទជាសំណួរថា តើពេលណាទើបទីក្រុងភ្នំពេញ លែងលិចទឹកដោយសារតែជំនន់ទឹកភ្លៀង?
មុននឹងឆ្លើយនឹងសំណួរនេះ គេចាំបាច់ត្រូវយល់ពីមូលហេតុសំខាន់ៗមួយចំនួន ដែលធ្វើឲ្យភ្នំពេញលិចលង់នៅពេលមានភ្លៀងធំម្ដងៗ។
មូលហេតុទី១ គឺការប្រែប្រួលអាកាសធាតុ ដែលធ្វើឲ្យមានភ្លៀងធ្លាក់យ៉ាងគំហុកខុសពីធម្មតា។ រាជធានីភ្នំពេញដែលមានរាងជាបាតខ្ទះ និងដែលមានភូមិសាស្ត្រទាបជាងនីវូទឹកទន្លេ ជាធម្មតាត្រូវលិច ប្រសិនបើទឹកភ្លៀងមានកម្រិតប្រមាណ៣០មីលីម៉ែត្រ។ មានន័យថា នៅពេលកម្រិតទឹកភ្លៀងកើនឡើងលើសពី៣០មីលីម៉ែត្រ ទីក្រុងភ្នំពេញនឹងត្រូវរងការជន់លិច។
មូលហេតុទី២ គឺការចាក់លុបបឹង និងការរំលោភបំពានលើប្រឡាយរំដោះទឹក។ ជាការពិតហើយថា រាជធានីភ្នំពេញ បានស្គាល់អភិវឌ្ឍជាវិជ្ជមានជាច្រើន។ ចំណែកអាជ្ញាធររាជធានីភ្នំពេញវិញ ក៏បានខិតខំប្រឹងប្រែងដោះស្រាយបញ្ហាស្ទះលូនៅក្នុងទីក្រុងផងដែរ ដោយមានជំនួយពីអង្គការ JICA របស់ជប៉ុន។ ប៉ុន្តែទន្ទឹមនឹងការខិតខំប្រឹងប្រែងអស់ទាំងនេះ បឹងធម្មជាតិជាច្រើន ដែលជាទីកន្លែងសម្រាប់រំដោះទឹកកុំឲ្យលិចទីក្រុង ត្រូវបានក្រុមហ៊ុនឯកជនចាក់ដីលុប ដើម្បីសាងសង់សំណង់លំនៅដ្ឋាន។ ជាមួយគ្នានេះ ប្រឡាយរំដោះទឹកកាត់ទីក្រុងមួយចំនួន ក៏ត្រូវបានរំលោភបំពាន។ រីឯប្រឡាយមួយចំនួនទៀត មានសភាពគោករាក់រួមតូចជាដើម។
មូលហេតុទី៣ គឺប្រព័ន្ធលូរំដោះទឹក។ ប្រព័ន្ធលូដែលមានទំហំតូច មិនគ្រប់គ្រាន់ និងមានសភាពចាស់ទ្រុឌទ្រោម ពិបាកទប់ទល់នឹងទឹកភ្លៀង ដែលធ្លាក់យ៉ាងគំហុកខុសពីធម្មតាដូចសព្វថ្ងៃនេះណាស់។
និងមូលហេតុទី៤ គឺដង់ស៊ីតេប្រជាជនរស់នៅទីក្រុង ដែលកើនឡើងទន្ទឹមគ្នានឹងកំណើនកាកសំណល់។ កាកសំណល់ដែលកើនឡើង ជាពិសេសការចោលសម្រាបពាសវាលពាសកាល ឬភាពយឺតយ៉ាវនៃក្រុមហ៊ុនប្រមូលសម្រាម បានរួមចំណែកធ្វើឲ្យលូកកស្ទះ មិនអាចរំដោះជំនន់ទឹកភ្លៀងបានទាន់ពេលវេលា។
ទោះបីជាអាជ្ញាធររាជធានីភ្នំពេញបានខិតខំប្រឹងប្រែងដោះស្រាយបញ្ហាជំនន់ទឹកភ្លៀងនៅរាជធានីភ្នំពេញជាបន្តបន្ទាប់យ៉ាងណាក៏ដោយ ក៏បញ្ហានេះ នៅតែចោទឡើងជាប្រចាំ។ បើនិយាយពីប្រព័ន្ធលូ និងអាងរំដោះទឹក ជាការពិតណាស់ វាគឺជាការទទួលខុសត្រូវរបស់អាជ្ញាធរ។ ប៉ុន្តែបើនិយាយពីបញ្ហាជំនន់ទឹកភ្លៀងលិចទីក្រុងភ្នំពេញ វាគឺជាការទទួលខុសត្រូវរបស់ប្រជាពលរដ្ឋទាំងអស់គ្នា។ ប្រជាពលរដ្ឋគ្រប់គ្នា ដែលត្រូវតែចូលរួមថែរក្សាអនាម័យ ទុកដាក់សំរាមឲ្យបានត្រឹមត្រូវ និងជាពិសេស កុំទម្លាក់ចូលតាមប្រឡាយនិងលូទឹក ចៀសវាងបញ្ហាកកស្ទះលូទៅថ្ងៃក្រោយ។ ជាមួយគ្នានេះ អាជ្ញាធររាជធានីភ្នំពេញ ត្រូវធ្វើយ៉ាងណារៀបចំប្រព័ន្ធលូថ្មីៗឲ្យបានគ្រប់គ្រាន់តាមតម្រូវការផងដែរ។
បញ្ហាប្រព័ន្ធប្រឡាយទឹក ប្រព័ន្ធលូ និងអាងរំដោះទឹក គឺជាការងារមួយដែលមានទំហំធំនិងពិបាក ព្រោះវាមិនមែនធ្វើសម្រាប់តែថ្ងៃស្អែកប៉ុណ្ណោះទេ។ ការងារនេះ ត្រូវការពេលវែង និងផែនការច្បាស់លាស់ ដើម្បីធានាឲ្យបាននូវការអភិវឌ្ឍប្រកបដោយនិរន្ដរភាព។ ដើម្បីឆ្លើយនឹងសំណួរថា តើពេលណាទើបភ្នំពេញ លែងលិចទឹកដោយសារតែជំនន់ទឹកភ្លៀង? គេត្រូវចាំមើលឆន្ទះរបស់អាជ្ញាធរពាក់ព័ន្ធ និងជាពិសេស ការរួមចំណែករបស់ពលរដ្ឋគ្រប់ៗគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ