ការចូលរួមរបស់ពលរដ្ឋ រួមនឹងការបន្ថែមល្បឿនផ្សព្វផ្សាយជាកត្តាអាចកាត់បន្ថយអគ្គិភ័យ
ចុះផ្សាយនៅថ្ងៃ៖
ស្តាប់ - ០៤:៥៨
របាយការណ៍របស់ប៉ូលិសបង្ហាញថាអគ្គិភ័យបានកើតឡើងកាន់តែច្រើនៗពីមួយឆ្នាំទៅមួយឆ្នាំ។ ការឆ្លងចរន្តអគ្គិសនី និងការធ្វេសប្រហែសគឺជាហេតុផលចំបង ដែលបង្កឲ្យកើតមានអគ្គិភ័យឥតឈប់ឈរ។ ដើម្បីទប់ស្កាត់កំណើនអគ្គិភ័យ ដែលធ្វើឲ្យបាត់បង់ជីវិតមនុស្សនិងបំផ្លាញទ្រព្យសម្បតិសន្ធឹកសន្ធាប់នោះ គប្បីបង្កើនការផ្សព្វផ្សាយអប់រំ ត្រួតពិនិត្យនិងរៀបចំខ្សែភ្លើងដែលបំពាក់នៅលើសំណង់ទាំងចាស់ទាំងថ្មី ព្រមទាំងបំផុសឲ្យប្រជាពលរដ្ឋចេះការពារដោយខ្លួនឯងជាបឋម ដោយប្រើប្រាស់បំពង់ពន្លត់ភ្លើងជាដើម។
បញ្ហាអគ្គិភ័យនៅក្នុងប្រទេសកម្ពុជាទំនងមានស្ថានភាពកាន់តែធ្ងន់ធ្ងរទៅៗហើយ ដោយសារតែការបំផ្លាញដោយសារភ្លើងបានកើតឡើងស្ទើរមិនលោះថ្ងៃ ចាប់តាំងពីដើមឆ្នាំ២០១៦មក។ កាលពីថ្ងៃទី២២កុម្ភៈកន្លងទៅនេះ បញ្ហាអគ្គិភ័យ ត្រូវបានចាត់ទុកជាទិវាជាតិជាលើកដំបូង ប្រយោជន៍ដើម្បីធ្វើឲ្យមហាជនចាប់អារម្មណ៍ និងចូលរួមទាំងអស់គ្នាក្នុងការបង្ការនិងទប់ស្កាត់អគ្គិភ័យ ដែលកំពុងកើតឡើងគួរឲ្យព្រួយបារម្ភ។
កាលពីឆ្នាំ២០១៥ ចំនួនអគ្គិភ័យ បានកើតឡើងនៅទូទាំងប្រទេសចំនួន ៥៩០លើក គឺកើនឡើង៧៦លើក ធៀបទៅនឹងឆ្នាំ២០១៤ បណ្តាលឲ្យមនុស្សស្លាប់៣៥នាក់ របួស២៥នាក់ និងខូចខាតសម្ភារៈជាច្រើនផ្សេងទៀត។ ហើយនៅដើមឆ្នាំ២០១៦នេះ គ្រាន់តែរយៈពេល៣ថ្ងៃនៃពិធីបុណ្យចូលឆ្នាំចិនអគ្គិភ័យបានកើតឡើងជាង១០លើកទៅហើយ នេះមិនទាន់គិតពីការឆេះជាប្រចាំសម្រាប់ថ្ងៃផ្សេងពីនេះផង។
មូលហេតុ ដែលបង្កឲ្យមានអគ្គិភ័យភាគច្រើនគឺការឆ្លងចរន្តអគ្គិសនី ឬភាសាសាមញ្ញ«ទូស្សេខ្មែរភ្លើង» ដែលត្រូវបានរកឃើញថាមានប្រមាណជាជិត៥០ភាគរយ។ ក្រៅពីនេះ នៅមានការធ្វេសប្រហែសដែលមានប្រហែល២៨ភាគរយ ការមិនយកចិត្តទុកដាក់ពីសំណាក់ប្រជាពលរដ្ឋមួយចំនួនលើការប្រើប្រាស់ចង្កា្រនជើងឆ្នាំ និងការអុចធូបទៀន ដែលមិនមានការប្រុងប្រយ័ត្ន។
តើគេអាចការពារនិងទប់ស្កាត់មិនឲ្យកើតមានអគ្គិភ័យបានយ៉ាងដូចម្តេច សម្រាប់ប្រទេសកម្ពុជា? បើនិយាយរឿងអគ្គិភ័យបង្កឡើងដោយការឆ្លងចរន្តអគ្គិសនី គេត្រូវចាប់អារម្មណ៍ពីបញ្ហាសំណង់។ បន្ទាប់ពីកើតមានភាពចលាចលនយោបាយ ជាច្រើនទសវត្សកន្លងមក សំណង់អគាលំនៅដ្ឋាននានា នៅក្នុងទីក្រុងក៏ដូចជានៅតាមបណ្តាខេត្តដែរ ត្រូវប្រជាពលរដ្ឋប្រើប្រាស់ប្រព័ន្ធខ្សែចាស់ៗ ដែលមានស្រាប់ ខ្លះកប់នៅក្នុងជញ្ជាំង ខ្លះតថ្មីបណ្តែតខាងក្រៅ ដែលមានសភាពរញ៉េរញ៉ៃឥតសណ្តាប់ធ្នាប់។
ការប្រើប្រាស់ឧបករណ៍ ដែលដើរដោយចរន្តអគ្គិសនី នៅក្នុងចំណោមប្រជាជនខ្មែរ មិនមានគុណភាព ដោយសារតែពុំមានលទ្ធភាពប្រើប្រាស់សម្ភារៈល្អ។ សម្ភារៈភាគច្រើនត្រូវបាននាំចូលមកពីប្រទេសចិន ដែលជាប្រភេទគ្រឿងអគ្គិសនី ផលិតឡើងក្នុងតម្លៃថោក។ ការប្រើប្រាស់សម្ភារៈអគ្គិសនីបែបនេះ ប្រឈមច្រើននឹងហានិភ័យ ដោយវាអាចឆ្លងចរន្តអគ្គិសនីបានដោយងាយៗ។
ជាមួយគ្នានេះ ផ្ទះល្វែងថ្មីៗជាច្រើនត្រូវបានសាងសង់ឡើង ដោយថៅកែផ្ទះលើកកញ្ជើរត់ពីកន្លែងមួយទៅកន្លែងមួយ។ ពោលគឺសង់ធ្វើម៉េចឲ្យលក់បានលុយ ជាហេតុធ្វើឲ្យការបំពាក់ ឬបង្កប់ខ្សែភ្លើងក្នុងជញ្ជាំង បានធ្វើឡើងឲ្យតែរួចពីដៃ ដោយមិនមានបំពាក់ស្រោមខ្សែ និងមិនមានបច្ចេកទេសត្រឹមត្រូវ។ ការត្រួតពិនិត្យពីអាជ្ញាធរមានសមត្ថកិច្ច ទៅលើបណ្តាញប្រព័ន្ធខ្សែភ្លើងជាពិសេសសំណង់ផ្ទះល្វែងថ្មីៗមិនមានទេ ក្រៅពីបណ្តោយឲ្យជាងភ្លើង ដែលមានជំនាញចេះតៗគ្នា ខ្វះបច្ចេកទេសនិងខ្វះការទទួលខុសត្រូវ។
នៅមានកត្តាផ្សេងៗទៀត ដែលធ្វើឲ្យអគ្គិភ័យនៅតែអាចបង្កគ្រោះថ្នាក់កំរិតខ្ពស់ដល់ប្រជាជនខ្មែរ គឺពលរដ្ឋភាគច្រើននៅមិនទាន់យល់ពីអត្ថប្រយោជន៍ ក្នុងការប្រើប្រាស់ឧបករណ៍ពន្លត់អគ្គិភ័យបឋម ពោលគឺបំពង់ពន្លត់អគ្គិភ័យ។ មូយរយៈចុងក្រោយនេះ ការប្រើប្រាស់បំពង់ពន្លត់អគ្គិភ័យត្រូវគេសម្គាល់ឃើញតែនៅតាមបណ្តាហាងលក់ដូរមួយចំនួនតែប៉ុណ្ណោះ។ ដោយឡែកបំពង់ពន្លត់អគ្គិភ័យ មានតិចតួចនៅតាមគេហដ្ឋានរស់នៅរបស់ប្រជាជន។ កង្វះខាតថវិការួមផ្សំនឹងការព្រងើយកន្តើយក្នុងការទិញបំពង់ពន្លត់ភ្លើងសម្រាប់បង្ការនៅមានកំរិត។
ដូច្នេះដើម្បីកាត់បន្ថយអគ្គិភ័យ ដែលកំពុងតែបន្តកើតឡើងស្ទើរមិនលោះថ្ងៃនោះ ការផ្សព្វផ្សាយរបស់អាជ្ញាធរចូលឲ្យដល់មូលដ្ឋានគឺជាការចាំបាច់។ ការណែនាំបន្ថែមឲ្យប្រជាពលរដ្ឋចេះបង្ការនិងសង្គ្រោះបឋមពីមហន្តរាយនេះ ដោយមានប្រព័ន្ធការពារលំនៅដ្ឋានដូចជាបំពង់ពន្លត់អគ្គិភ័យជាដើម។ អាជ្ញាធរមានសមត្ថកិច្ច ត្រូវមានយន្តការត្រួតពិនិត្យ ការគ្រប់គ្រងប្រព័ន្ធភ្លើងនៅតាមសំណង់ថ្មីៗ ជាពិសេសសំណង់ផ្ទះល្វែងដែលមានតម្លៃធូរថ្លៃ ភាគច្រើនបំពាក់បរិកា្ខអគ្គិសនី ខុសបច្ចេកទេសនិងគ្មានគុណភាព។
ដោយឡែកការសង្គ្រោះថ្នាក់ជាតិ ជាការពិតគួរតែបង្កើនបរិមាណរថយន្តពន្លត់អគ្គិភ័យបន្ថែមទៀត ដោយបច្ចុប្បន្នកង្វះរថយន្តពន្លត់អគ្គិភ័យជាមូលហេតុចំបង ក្នុងកិច្ចអន្តរាគមន៍លើករណីភ្លើងឆេះជាច្រើន។ ជាមួយគ្នានេះការអនុវត្តច្បាប់ស្តីពីការបង្ការនិងពន្លត់អគ្គិភ័យក៏ត្រូវមានការផ្សព្វផ្សាយ ឲ្យបានទូលំទូលាយផងដែរ ជាពិសេសលើបញ្ហាទោសទណ្ឌចំពោះអ្នកដែលធ្វេសប្រហែសបង្កអគ្គិភ័យ និងដល់មន្ត្រីអន្តរាគមន៍ដែលសង្ស័យថាជាប់ទាក់ទងទៅនឹងអំពើពុករលួយក្នុងសកម្មភាពពន្លត់អគ្គិភ័យផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ