ការអនុវត្តច្បាប់កម្ពុជាមានស្តង់ដារពីរ!
ចុះផ្សាយនៅថ្ងៃ៖
ស្តាប់ - ០៤:៣៦
ការចាប់ខ្លួនជនសង្ស័យដែលគម្រាមបាញ់សម្លាប់លោក សុខ ទូច ប្រធានក្រុមស្រាវជ្រាវកិច្ចការព្រំដែន បង្ហាញពីប្រសិទ្ធិភាពនៃការងាររបស់សមត្ថកិច្ច ប៉ុន្តែវាក៏បានឆ្លុះបញ្ចាំងពីស្តង់ដារពីរ នៅក្នុងការអនុវត្តច្បាប់កម្ពុជាផងដែរ។ ស្តង់ដារពីរព្រោះ សមត្ថកិច្ចចាប់បានតែជនសង្ស័យគម្រាមបាញ់សម្លាប់លោក សុខ ទូច ខណៈជនសង្ស័យដែលគម្រាមបាញ់សម្លាប់អនុប្រធានគណបក្សសង្គ្រោះជាតិ លោក កឹម សុខា កាលពីឆ្នាំ២០១៣ នៅមិនទាន់ត្រូវបានចាប់ខ្លួននៅឡើយ រហូតមកទល់ពេលនេះ។ ការអនុវត្តស្តង់ដារពីរដូច្នេះ បង្កផលប៉ះពាល់ច្រើនណាស់ដល់សង្គម និងប្រជាប្រិយភាពរដ្ឋាភិបាល។
មែនទែនទៅ នេះមិនមែនជាលើកទីមួយទេ ដែលមានការរិះគន់ពីស្តង់ដារពីរនៅក្នុងការអនុវត្តច្បាប់នៅកម្ពុជា។ កន្លងមក ការអនុវត្តច្បាប់នៅកម្ពុជាត្រូវបានសហគមន៍ជាតិនិងអន្ដរជាតិចោទប្រកាន់ថា មិនមានយុត្តិធម៌ ខ្វះតម្លាភាព គ្មានភាពឯករាជ្យជាដើម។ នៅក្នុងសង្គមខ្មែរ ការអនុវត្តច្បាប់ស្តង់ដារពីរខុសគ្នានេះ ឆ្លុះបញ្ចាំងឲ្យឃើញយ៉ាងច្បាស់តាមរយៈប្រព័ន្ធយុត្តិធម៌។
ជាទូទៅ នៅក្នុងការអនុវត្តច្បាប់របស់តុលាការ អ្នកមានប្រាក់ មានអំណាច មានខ្នងបង្អែក ច្រើនតែមានសំណាងជាងអ្នកក្រីក្រគ្មានទីពឹង។ មានរឿងរ៉ាវក្ដីក្ដាំច្រើនណាស់ដែលគេសង្កេតឃើញថា អ្នកមានទ្រព្យ អ្នកមានអំណាច និងអ្នកមានខ្នងបង្អែក ច្រើនតែបានទទួលការយកចិត្តទុកដាក់ និងស្វែងរកយុត្តិធម៌ឲ្យពីសំណាក់អាជ្ញាធរមានសមត្ថកិច្ចនិងតុលាការ។ ផ្ទុយពីអ្នកក្រីក្រ គ្មានទីពឹង គ្មានខ្នងបង្អែក ដែលភាគច្រើនត្រូវបានគេមើលរំលង និងជារឿយៗ ត្រូវចាញ់ក្ដីក្នុងការប្ដឹងផ្ដល់នៅតុលាការថែមទៀតផង។
មានសំណុំរឿងពីរសំខាន់ ដែលគេអាចលើកយកមកធ្វើជាឧទាហរណ៍ដើម្បីរំលេចឲ្យឃើញស្តង់ដារពីនៅក្នុងការអនុវត្តច្បាប់របស់កម្ពុជា។ ទីមួយគឺសំណុំរឿង លោក សុខ ទូច ប្រធានក្រុមស្រាវជ្រាវកិច្ចការព្រំដែន និងជាប្រធានវិទ្យាស្ថានទំនាក់ទំនងអន្ដរជាតិ នៃរាជបណ្ឌិតសភា។ លោក សុខ ទូច ត្រូវបានជនមិនស្គាល់មុខគម្រាមបាញ់សម្លាប់ តាមរយៈសារនៅលើបណ្ដាញសង្គម កាលពីថ្ងៃទី២៩ខែសីហា។ មួយសប្ដាហ៍បន្ទាប់ពីនោះ ពោលគឺនៅថ្ងៃទី០៥ខែកញ្ញា សមត្ថកិច្ចបានចាប់ខ្លួនជនសង្ស័យដែលគម្រាមបាញ់សម្លាប់លោក សុខ ទូច បាននៅចំណុចព្រំដែនប៉ោយប៉ែត បន្ទាប់ពីជនសង្ស័យបានឆ្លងដែនពីប្រទេសថៃ ចូលទឹកដីកម្ពុជា។
ចំណែកសំណុំរឿងទីពីរ គឺករណី លោក កឹម សុខា អនុប្រធានគណបក្សសង្គ្រោះជាតិ។ ស្រដៀងនឹងលោក សុខ ទូច ដែរ គឺកាលពីចុងឆ្នាំ២០១៣ លោក កឹម សុខា បានទទួលសារគម្រាមសម្លាប់ពីគណនីបណ្ដាញសង្គមឈ្មោះ ផែង វណ្ណៈ។ ភ្លាមៗបន្ទាប់ពីនោះ ក្រសួងមហាផ្ទៃបានកោះហៅឈ្មោះ ផែង វណ្ណៈ ដែលជាមន្ដ្រីនគរបាលក្រសួងមហាផ្ទៃ មកធ្វើការសាកសួរ។ ប៉ុន្តែជាការកត់សម្គាល់ បន្ទាប់ពីឈ្មោះ ផែង វណ្ណៈ ច្រានចោលការចោទប្រកាន់ថាបានគម្រាមសម្លាប់លោក កឹម សុខា សំណុំរឿងនេះហាក់បានស្ងប់ស្ងាត់ទៅវិញ។ រហូតមកទល់ពេលនេះ ជិតពីរឆ្នាំទៅហើយ អាជ្ញាធរនៅតែមិនទាន់វែកមុខអ្នកគម្រាមសម្លាប់លោក កឹម សុខា បានទៀត។
ស្តង់ដារពីខុសគ្នានៃការអនុវត្តច្បាប់នៅកម្ពុជាដូច្នេះ បានរារាំងប្រជាពលរដ្ឋមិនឲ្យទទួលបានយុត្តិធម៌។ ប្រជាពលរដ្ឋក្រីក្រត្រូវរងគ្រោះ ព្រោះតែការរំលោភបំពានពីសំណាក់អ្នកមានទ្រព្យ មានអំណាច មានខ្នងបង្អែក។ ការអនុវត្តច្បាប់ដោយមានស្តង់ដារពីរដដែលនេះ បានធ្វើឲ្យកំណែទម្រង់ប្រព័ន្ធតុលាការកម្ពុជា វារទៅមុខមិនរួច ហើយជាពិសេស វាបានទាញទម្លាក់ការទុកចិត្តរបស់ប្រជាពលរដ្ឋទៅលើរដ្ឋាភិបាល និងទម្លាក់ប្រជាប្រិយភាពរបស់គណបក្សកាន់អំណាច ពីសំណាក់ប្រជាពលរដ្ឋម្ចាស់ឆ្នោតថែមទៀតផង។
បើទោះបីជាថ្មីៗនេះ ប្រព័ន្ធយុត្តិធម៌កម្ពុជាបានបង្ហាញការប្រែប្រួលជាវិជ្ជមានខ្លះ តាមរយៈការដាក់ទោសទណ្ឌលើឧកញ៉ា និងអតីតមន្ដ្រីធំៗមួយចំនួន ដែលបានប្រព្រឹត្តបទឧក្រិដ្ឋហើយក៏ដោយ ក៏គេសង្កេតឃើញថា គោលការណ៍ស្មើភាពគ្នានៅចំពោះមុខច្បាប់កម្ពុជា នៅតែចំណោទដ៏ធំធេងមួយ ដែលចាំបាច់ត្រូវដោះស្រាយឲ្យបានលឿនរហ័ស។
ហើយដើម្បីដោះស្រាយបញ្ហានេះ វាត្រូវការការចូលរួមពីសំណាក់សង្គមខ្មែរទាំងមូល។ ក្នុងនោះ ពលរដ្ឋខ្មែរត្រូវកែប្រែទម្លាប់នៃការខ្លាចអំណាចអ្នកធំ ត្រូវឈប់ផ្ដល់តម្លៃខ្លាំងពេកទៅលើបុណ្យស័ក្តិ និងអំណាច និងត្រូវឈប់បណ្ដោយឲ្យអ្នកធំធ្វើអ្វីស្រេចតែចិត្ត។ ទន្ទឹមគ្នានេះ ទម្លាប់យល់ញាតិឃ្លាតច្បាប់ ក៏ត្រូវតែលុបបំបាត់ចោលដែរ នៅក្នុងចំណោមជនខ្មែរ ជាពិសេស អ្នកដឹកនាំ និងអ្នកអនុវត្តច្បាប់។ ការបែងចែកគ្នាឲ្យដាច់រវាងអំណាចធំៗទាំង៣របស់រដ្ឋ ក៏ជាគន្លឹះសំខាន់ខ្លាំងណាស់ដែរ ដើម្បីលុបបំបាត់ការអនុវត្តច្បាប់ស្តង់ដារពីរនៅកម្ពុជា។ គឺត្រូវធ្វើយ៉ាងណាកុំឲ្យអំណាចនីតិប្រតិបត្តិ មានទម្ងន់ខ្លាំងពេកទៅលើអំណាចនីតិបញ្ញត្តិ និងអំណាចតុលាការ។
ការងារដ៏ធំនិងចាំបាច់នេះ ច្បាស់ណាស់ថាមិនអាចផ្លាស់ប្ដូរភ្លាមៗបានទេ។ វាត្រូវការពេលវេលា។ ប៉ុន្តែសំខាន់ជាងពេលវេលា វាត្រូវការឆន្ទៈពិតប្រាកដរបស់ប្រជាពលរដ្ឋ រដ្ឋាភិបាល និងគ្រប់ភាគីពាក់ព័ន្ធទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ