នៅពេលគណបក្សកាន់អំណាចត្រូវអារកាត់សាច់ស្អុយ ដើម្បីរក្សាប្រជាប្រិយភាព
ចុះផ្សាយនៅថ្ងៃ៖
ស្តាប់ - ០៤:១៨
នៅក្នុងសំណុំរឿងវាយប្រហារតំណាងរាស្ត្រពីររូបមកពីគណបក្សសង្គ្រោះជាតិ លោកនាយករដ្ឋមន្ដ្រី ហ៊ុន សែន បានចេញបញ្ជាផ្ទាល់មាត់ ឲ្យតាមចាប់ខ្លួនអ្នកប្រព្រឹត្តឲ្យបាន បើទោះបីជាអ្នកប្រព្រឹត្តនោះ ជាអ្នកគាំទ្រគណបក្សប្រជាជនកម្ពុជាក៏ដោយ។ មែនទែនទៅ តាំងពីក្រោយការបោះឆ្នោតជាតិឆ្នាំ២០១៣ គណបក្សកាន់អំណាចហាក់ដូចជាមិនញញើតនឹងដាក់ទោសទណ្ឌមន្ដ្រីរបស់ខ្លួន ដែលប្រព្រឹត្តខុសឡើយ។ តើវាដល់ពេលហើយឬ ដែលគណបក្សនេះ ត្រូវអារកាត់សាច់ស្អុយរបស់ខ្លួន ដើម្បីរក្សាប្រជាប្រិយភាព? ហើយថាតើការអារកាត់សាច់ស្អុយនេះ ពិតជាអាចថែរក្សាប្រជាប្រិយភាពឲ្យគណបក្សកាន់អំណាច ឈានទៅឈ្នះឆ្នោតអាណត្តិក្រោយទៀតឬយ៉ាងណា?
អំពើហិង្សាដ៏សាហាវឃោរឃៅទៅលើអ្នកតំណាងរាស្ត្រមកពីគណបក្សប្រឆាំងពីររូប គឺលោក ញ៉យ ចំរើន និង លោក គង់ សភា កាលពីដើសប្ដាហ៍នេះ បានទទួលរងនូវការថ្កោលទោសយ៉ាងខ្លាំងពីសំណាក់ស្ថាប័នជាតិនិងអន្ដរជាតិ។ ប្រមុខដឹកនាំរដ្ឋាភិបាលកម្ពុជាខ្លួនឯង ក៏បានថ្កោលទោសនូវអំពើហិង្សានេះដែរ និងថែមទាំងបានហៅអំពើហិង្សានោះថា ជាទង្វើថោកទាបថែមទៀតផង។ លោកនាយករដ្ឋមន្ដ្រី ហ៊ុន សែន បានចេញបញ្ជាផ្ទាល់មាត់ ឲ្យតាមចាប់ខ្លួនអ្នកប្រព្រឹត្តឲ្យបាន បើទោះបីជាអ្នកប្រព្រឹត្តនោះ ជាអ្នកគាំទ្រគណបក្សប្រជាជនកម្ពុជាក៏ដោយ ជាអ្នកគាំទ្របក្សប្រឆាំងក៏ដោយ ឬជាអ្នកណាក៏ដោយ។
សេចក្ដីថ្លែងការណ៍របស់ប្រមុខរដ្ឋាភិបាលនៅក្នុងសំណុំរឿងនេះ បានធ្វើឲ្យគេចោទជាសំណួរថា តើវាដល់ពេលហើយឬ ដែលគណបក្សកាន់អំណាចត្រូវហ៊ានអារកាត់សាច់ស្អុយរបស់ខ្លួន ដើម្បីថែរក្សាប្រជាប្រិយភាព?
មែនទែនទៅ នេះមិនមែនរឿងថ្មីទេ ដែលរដ្ឋាភិបាលដឹកនាំដោយគណបក្សកាន់អំណាច គម្រាមដាក់ទោសទណ្ឌចំពោះមន្ដ្រី ឬអ្នកគាំទ្ររបស់ខ្លួនដែលប្រព្រឹត្តខុស។ បន្ទាប់ពីធ្លាក់អាសនៈពី៩០មកនៅត្រឹម៦៨ នៅក្នុងការបោះឆ្នោតឆ្នាំ២០១៣ គណបក្សប្រជាជនកម្ពុជា បានចេញមុខទទួលស្គាល់ពីចំណុចខ្វះខាតរបស់ខ្លួន និងថែមទាំងបានជំរុញឲ្យមន្ដ្រីរបស់ខ្លួនឆ្លុះកញ្ចក់ដុះក្អែលសម្អាតខ្លួនថែមទៀតផង។ កំណែទម្រង់ការងារនិងស្ថាប័នរដ្ឋមួយចំនួនត្រូវបានធ្វើឡើងជាបន្តបន្ទាប់។ មន្ដ្រីមួយចំនួនដែលប្រើប្រាស់អំណាច ប្រព្រឹត្តតាមអំពើចិត្តខុសនឹងច្បាប់ ក៏ត្រូវបានចាប់ខ្លួនយកទៅផ្ដន្ទាទោសផងដែរ។ ដើម្បីការពារប្រជាប្រិយភាពរបស់ខ្លួន គណបក្សកាន់អំណាចហាក់ដូចជាមិនញញើតនឹងដាក់ទោសទណ្ឌមន្ដ្រីរបស់ខ្លួន ដែលប្រព្រឹត្តខុសឡើយ។
ការអារកាត់សាច់ស្អុយរបស់គណបក្សកាន់អំណាច ត្រូវអ្នកវិភាគនយោបាយផ្ដល់តម្លៃថា អាចរួមចំណែកស្ដារប្រជាប្រិយភាពរបស់គណបក្សនេះបានខ្លះនៅលើឆាកនយោបាយ។ ក្នុងនោះ គណបក្សប្រជាជនកម្ពុជា និងថ្នាក់ដឹកនាំរបស់គណបក្សនេះ ត្រូវរក្សាភាពរ៉ឹងប៉ឹងបំផុត នៅក្នុងការអនុវត្តគោលនយោបាយកំណែទម្រង់ស៊ីជម្រៅដូចដែលបានសន្យា។ គោលការណ៍ច្បាប់ ដាច់ខាតត្រូវតែគ្របដណ្ដប់លើមនោសញ្ចេតនា។ មន្ដ្រីប្រព្រឹត្តខុសច្បាប់ត្រូវតែដកគ្រវាត់ចោល ហើយផ្ដល់ឱកាសឲ្យមន្ដ្រីដែលមានសមត្ថភាព។
ជាការពិត ការអារកាត់សាច់ស្អុយនេះមានសារៈសំខាន់ណាស់ ប៉ុន្តែវាមិនទាន់គ្រប់គ្រាន់ដើម្បីធានានូវជ័យជំនះផ្ដាច់មុខនៅក្នុងការបោះឆ្នោតនាពេលខាងមុខឡើយ។ បើតាមអ្នកវិភាគ មានការងារច្រើនណាស់ដែលរដ្ឋាភិបាលដឹកនាំដោយគណបក្សប្រជាជនកម្ពុជាត្រូវធ្វើឲ្យបាន បើចង់ទាញយកការគាំទ្រពីប្រជាពលរដ្ឋបន្ថែមទៀត។
ការងារនោះត្រូវចាប់ផ្ដើមពីមន្ដ្រីថ្នាក់លើ ដែលត្រូវតែធ្វើជាគំរូល្អដល់មន្ដ្រីថ្នាក់ក្រោម ដើម្បីឲ្យមានការកែប្រែឥរិយាបថក្នុងការបំពេញការងារប្រកបដោយការទទួលខុសត្រូវ មានភាពស្អាតស្អំ និងតម្កល់ផលប្រយោជន៍ជាតិ ធំជាងផលប្រយោជន៍ផ្ទាល់ខ្លួន និងផលប្រយោជន៍បក្ស។ ទន្ទឹមគ្នានេះ ការលុបបំបាត់អំពើពុករលួយត្រូវធ្វើគ្រប់កម្រិត ពីថ្នាក់លើដល់ថ្នាក់ក្រោម។ ការងារដាក់ទណ្ឌកម្មចំពោះការប្រព្រឹត្តពុករលួយនេះ ទាមទារឲ្យដើរស្របគ្នានឹងការផ្ដល់រង្វាន់ដល់មន្ដ្រីរាជការ។ មន្ដ្រីរាជការដែលល្អ ត្រូវតែទទួលបានការលើកទឹកចិត្ត និងការបង្កើនប្រាក់ខែ។
ជាមួយគ្នានោះ គណបក្សប្រជាជន ចាំបាច់ត្រូវតែអប់រំមន្ដ្រីថ្នាក់ក្រោមរបស់ខ្លួនឲ្យបានម៉ឺងម៉ាត់បំផុត ធ្វើយ៉ាងណាឲ្យពួកគេបម្រើប្រជាជនបានត្រឹមត្រូវ ចៀសវាងការមិនអើពើ មិនខ្វាយខ្វល់ចំពោះប្រជាជនមូលដ្ឋានក្រោមការគ្រប់គ្រងរបស់ខ្លួន។ ជាថ្នូរមកវិញ មន្ដ្រីថ្នាក់ក្រោមគ្រប់រូប ត្រូវតែទទួលបាននូវប្រាក់ខែច្រើនជាងមុន ដើម្បីជីវភាពល្អប្រសើរជាងមុន។
ទាំងនេះគឺជាវិញ្ញាសារសាកល្បងសម្រាប់គណបក្សប្រជាជន ដើម្បីជួយស្ដារមុខមាត់ និងប្រជាប្រិយភាព សម្រាប់ការបោះឆ្នោតខាងមុខ។ ភាពស្ទាក់ស្ទើរណាមួយដែលបង្អាក់កំណែទម្រង់ទាំងនេះ នឹងប៉ះពាល់ដល់ប្រសិទ្ធិភាពដឹកនាំ ក៏ដូចជាប្រជាប្រិយភាពរបស់គណបក្សទាំងមូល។ យ៉ាងណាក៏ដោយ ការអនុវត្តតែងតែពិបាកជាងទ្រឹស្តី។ មានតែឆន្ទៈពិតប្រាកដទេ ទើបជួយឲ្យគណបក្សកាន់អំណាច សម្រេចការងារទាំងនេះបាន។ ប៉ុន្តែប្រសិនបើអនុវត្តបាន គណបក្សកាន់អំណាចនេះ នឹងអាចមានទឹកមាត់ប្រៃខ្លះ ដើម្បីឃោសនារកសំឡេងឆ្នោតនាអាណត្តិក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ