តុលាការមិនឲ្យគ្រូពេទ្យចូលពិនិត្យសុខភាពលោកហុង សុខហួរនៅព្រៃស
សាលាដំបូងរាជធានីភ្នំពេញនៅថ្ងៃសុក្រ ម្សិលមិញនេះ បានសម្រេចមិនអនុញ្ញាឲ្យវេជ្ជបណ្ឌិតឯកទេសចូលទៅពិនិត្យ និងព្យាបាលបញ្ហាសុខភាពលោកហុង សុខហួរ សមាជិកព្រឹទ្ធសភាគណបក្សសម រង្ស៊ី ដែលកំពុងជាប់ឃុំនៅក្នុងពន្ធនាគារព្រៃសនោះទេ។ ការបដិសេដនេះ គឺជាការឆ្លើយតបទៅនឹងសំណើរបស់មេធាវីការពារក្តីដែលបានដាក់កាលពីថ្ងៃទី២១ កញ្ញា កន្លងទៅ។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងលិខិតជូនដំណឹងរបស់ខ្លួនទៅកាន់មេធាវីការពារក្តីលោកហុង សុខហុង លោកកោ វណ្ឌី ចៅក្រមស៊ើបសួរនៃសាលាដំបូងរាជធានីភ្នំពេញបានលើកឡើងពីមូលហេតុនៃការបដិសេដនេះថា ដោយសារតែពុំមានរបាយការណ៍ពីមន្ត្រីពន្ធនាគារបញ្ជាក់ពីជំងឺលោកហុង សុខហួរ និង ម្យ៉ាងទៀត នៅពន្ធនាគារព្រៃស មានសេវាព្យាបាលថែទាំសុខភាពចំពោះជនត្រូវចោទគ្រប់រូបហើយ។
ការបដិសេធនេះ ជាការឆ្លើយតបទៅនឹងការស្នើសុំអនុញ្ញាតឲ្យវេជ្ជបណ្ឌិតឯកទេសរបស់អង្គការលីកាដូចូលពិនិត្យ និងព្យាបាលលោកហុង សុខហួរនៅក្នុងពន្ធនាគារព្រៃសពីសំណាក់មេធាវីការពារក្តីលោកជួង ជូងី កាលពីថ្ងៃទី២១ កញ្ញាកន្លងទៅ។ មែនទែនទៅ នេះមិនមែនជាការស្នើសុំ និងត្រូវបានទាត់ចោលជាលើកទីមួយនោះទេ។ កាលពីថ្ងៃទី២១ ខែសីហា លោកជូង ជូងី ធ្លាប់បានដាក់ពាក្យស្នើសុំម្តងរួចមកហើយ និងត្រូវបានបដិសេដក្រោមហេតុផលដូចគ្នានេះផងដែរ។
ក្នុងនាមមេធាវីការពារក្តីលោកហុង សុខហួរនោះ លោកជូង ជូងី បានសម្តែងការសោកស្តាយយ៉ាងខ្លាំងចំពោះការបដិសេដដល់ទៅពីរលើកបែបនេះ។ លោកបានចាត់ទុកការសម្រេចរបស់ចៅក្រមស៊ើបសួរនៃសាលាដំបូងរាជធានីភ្នំពេញថា ជាការរើសអើងខាងនយោបាយ ។ រើសអើងខាងនយោបាយ ក៏ព្រោះថា កន្លងមកលោកបានកត់សម្គាល់ឃើញថា តុលាការបានអនុញ្ញាតឲ្យគ្រូពេទ្យរបស់អង្គការសិទ្ធិមនុស្សចូលទៅពិនិត្យ និង ព្យាបាលអ្នកជាប់ឃុំដែលជនសាមញ្ញបាន តែដោយឡែកលោកសុខ សុខហួរដែលសមាជិកព្រឹទ្ធសភាបក្សប្រឆាំង បែរជាមិនអនុញ្ញាតទៅវិញ។ យ៉ាងណាក៏ដោយ នៅពេលនេះ លោកជួង ជូងី មិនទាន់បានសម្រេចថា នឹងត្រូវធ្វើយ៉ាងណាតទៅទៀតនៅឡើយទេ។
សូមបញ្ជាក់ថា លោក ហុង សុខហួរ ត្រូវបានតុលាការក្រុងភ្នំពេញ បានសម្រេចឃុំខ្លួនបណ្តោះអាសន្ននៅពន្ធនាគារព្រៃសកាលពីថ្ងៃទី១៦ សីហាកន្លងទៅ។ សមាជិកព្រឹទ្ធសភារូបនេះ រងបទចោទប្រកាន់ចំនួនបីគឺបទក្លែងឯកសារសាធារណៈ ប្រើបាស់ឯកសារសាធារណៈក្លែងក្លាយ និងបទញុះញង់ឲ្យមានបទល្មើសមជ្ឈឹម ឬឧក្រិដ្ឋមិនសម្រេច។ ការចោទប្រកាន់នេះ បានធ្វើឡើង បន្ទាប់ពីលោកបានថ្លែងទាក់ទងផែនទី និង សន្ធិសញ្ញានានានៃព្រំដែនកម្ពុជា និង វៀតណាម។
តុលាការក្រុងភ្នំពេញ កាលពីថ្ងៃទី២៦ សីហា ក៏ធ្លាប់បានទាត់ទោលសំណើសុំចូលទៅសួរសុខទុក្ខលោកហុង សុខហួរ នៅពន្ធនាគារព្រៃសពីសំណាក់សមាជិកព្រឹទ្ធសភាគណបក្សសម រង្ស៊ី ផងដែរ ក្រោមហេតុផលថា កំពុងបើកការស៊ើបសួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ