អុំទូក៖ ស្រោមអនាម័យជាង៣ម៉ឺនស្រោមចែកជូនដោយមិនគិតថ្លៃនិង២០ម៉ឺនស្រោមទៀតត្រៀមបំរុងទុក
អាជ្ញាធរជាតិប្រយុទ្ធប្រឆំាង នឹងជំងឺអេដស៍សហការជាមួយអង្គការពាក់ព័ន្ធនានាបានរៀបចំយុទ្ធនាការ អប់រំ ត្រៀមចែកស្រោមអនាម័យជាង៣ម៉ឺនស្រោមនិងត្រៀមបំរុងទុក២០ម៉ឺនស្រោមក្នុងឱកាសព្រះរាជពិធីបុណ្យអុំទូករយៈពេលបីថ្ងៃនេះ។ ជាយុទ្ធការដើម្បីពារសុវត្ថិភាពពលរដ្ឋកុំឲ្យឆ្លងមេរោគអេដស៍ និងជំងឺអេដស៍។
ចុះផ្សាយនៅថ្ងៃ៖ កែប្រែថ្ងៃទី៖
ស្រោមអនាម័យជាង៣ម៉ឺនស្រោមនេះ ត្រៀមចែកជូនពលរដ្ឋភាគច្រើនជាបុរសដោយមិនគិតថ្លៃ។ ចំណែក២០ម៉ឺនស្រោមទៀតត្រៀមទុកបំរុងពេលខ្វះខាត។ ពលរដ្ឋអាចទៅទទួលស្រោមអនាម័យដោយមិនគិតថ្លៃនេះបាននៅត្រើយខាងកើតស្ពានជ្រោយចង្វារដែលជាទីកន្លែងស្នាក់នៅរបស់កីឡាករអុំទូក។ ទៅដល់ទីនោះយុទ្ធនាការចែកស្រោមអនាម័យធ្វើឡើងតាមរយៈការប្រគុំតន្ត្រីផ្សព្វផ្សាយជុំវិញសារអប់រំសុខភាព។
ក្រៅពីផ្ដល់ជូនស្រោមអនាម័យដោយមិនគិតថ្លៃហើយ អាជ្ញាធរជាតិប្រយុទ្ធប្រឆំាង នឹងជំងឺអេដស៍សហការជាមួយអង្គការពាក់ព័ន្ធនានាបានរៀបចំកម្មវិធីមួយចំនួនទៀតដូចជា៖ ការឆ្លើយសំណួរដើម្បីបានកាដូលើកទឹកចិត្ត ការធ្វើតេស្តឈាមដោយស្ម័គ្រចិត្ត និង ការប្រឹក្សាយោបល់ជាដើម។ បន្ថែមពីលើនេះទៀតទាំងអាជ្ញាធរក្រុងនិងអាជ្ញាធរជាតិប្រយុទ្ធប្រឆំាងនឹងជំងឺអេដស៍បានសហការគ្នាក្នុងការចង់បដានៃសារអប់រំចំនួន៦០ផ្ទាំងនៅបណ្ដោយផ្លូវដែលចូលមកកាន់រាជធានីភ្នំពេញ។
ថ្លែងប្រាប់វិទ្យុបារាំងអន្តរជាតិ លោក តែង គន្ធី អគ្គលេខាធិការអាជ្ញាធរជាតិប្រយុទ្ធប្រឆំាងនឹងជំងឺអេដស៍អះអាងថា ស្រោមអនាម័យបានត្រៀមបំរុងទុកលើសពីចំនួនជាង៣ម៉ឺនស្រោមនេះទៅទៀតពោលគឺមិនខ្វះទេនៅក្នុងការចែកជូន ឲ្យតែពលរដ្ឋគាត់យល់ដឹងពីវិធានការបង្ការនិងការពារមេរោគអេដស៍និងជំងឺអេដស៍។
លោក តែង គន្ធី បន្ថែមថា ប្រភពនៃស្រោមអនាម័យគឺទទួលបានមកពីអង្គការខ្មែរបម្រើសុខភាពប្រជាជនហៅកាត់ PSK។ អង្គការនេះបានប្រាប់វិទ្យុបារាំងថា ទោះមិនបានចុះធ្វើសកម្មភាពដោយផ្ទាល់តែខ្លួនបានផ្ដល់ស្រោមអនាម័យ១ម៉ឺនស្រោមទៅអាជ្ញាធរ ជាតិប្រយុទ្ធប្រឆំាងនឹងជំងឺអេដស៍។ ហើយមួយផ្នែកធំនៃស្រោមអនាម័យគឺយកថវិការដ្ឋទៅទិញដើម្បីត្រៀមទុកបំរុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ