មេដឹកនាំបក្សប្រឆាំងក្នុងស្រុកអនុវត្ត«៣មិន» តែមេដឹកនាំបក្សក្រៅស្រុកបន្តរិះគន់
ចុះផ្សាយនៅថ្ងៃ៖
ស្តាប់ - ០៤:៣៣
ភាពស្ងប់ស្ងាត់របស់គណបក្សប្រឆាំងមួយរយៈចុងក្រោយនេះ រហូតមេដឹកនាំបក្សបង្ហាញទ្រឹស្តីថា«មិនឆ្លើយ មិនឆ្លង មិនឈ្លោះ» នោះ ត្រូវគេមើលឃើញថាអាចជាយុទ្ធសាស្ត្រថ្មីមួយដែលគណបក្សសង្គ្រោះជាតិត្រូវប្រកាន់យក បន្ទាប់ពីមានការឆ្លើយឆ្លងគ្នាខាងនយោបាយហើយគណៈបក្សកាន់អំណាចតែងមានប្រៀបជាង។ បន្ថែមពីលើនេះគណបក្សប្រឆាំងកាន់តែប្រកាន់ជំហរនេះខ្លាំងឡើង ខណៈដែលមានការលេចធ្លាយរឿងអាស្រូវស្នេហារបស់លោកកឹមសុខា ប៉ុន្មានសប្តាហ៍ចុងក្រោយនេះ។ តែជំហរមិនឆ្លើយឆ្លងនេះ ត្រូវគេមើលឃើញថាមិនអាចធ្វើបានរហូតនោះទេ។
ជាទូទៅនរណាក៏ដឹងដែរថា គណបក្សប្រឆាំងពីដើមមកបានពាក្យ បានសម្តី ពិសេសទំនាក់ទំនងជាមួយប្រព័ន្ធផ្សព្វផ្សាយ។ ការផ្សព្វផ្សាយពីសកម្មភាពនិងសារនយោបាយផ្សេងៗត្រូវបានធ្វើតែមួយពព្រិចភ្នែកប៉ុណ្ណោះ ខណៈដែលបច្ចេកវិទ្យាសម័យទំនើបមានភាពជឿនលឿនដល់កម្រិតមួយ ដែលអាចជួយឲ្យបក្សប្រឆាំងមានភាពចំណេញយ៉ាងច្រើន។
កន្លងមកភាពខ្លាំងរបស់បក្សប្រឆាំងគឺពឹងផ្អែកទៅលើប្រព័ន្ធផ្សព្វផ្សាយ ក្នុងនោះមានបណ្តាញសង្គមហ្វេសប៊ុកផងដែរ ដែលជួយផ្សាយបន្តពីការធ្វើអត្ថាធិប្បាយ និងលើកយកចំណុចផ្សេងៗ ដែលជាការរិះគន់ទៅលើភាពអវិជ្ជមាននិងចំណុចខ្វះចន្លោះរបស់គណបក្សកាន់អំណាច។
ការនិយាយច្រើនពីចំណុចអវិជ្ជមានរបស់បក្សកាន់អំណាច គឺជាជីពចរដ៏សំខាន់របស់បក្សប្រឆាំងដែលនាំឲ្យបក្សប្រឆាំងកើនប្រជាប្រិយភាព ប្រៀបដូចជាមនុស្សត្រូវការបរិភោគបាយឬអាហារចាំបាច់ដូច្នេះដែរ។ ចុះពេលនេះគណបក្សប្រឆាំងប្រកាន់យកជំហរ មិនតបត«៣មិន»ដូច្នេះតើវាមានការខាតបង់ឬក៏មានផលចំណេញសម្រាប់ដំណើរវិវត្តនយោបាយខ្មែរពេលនេះ?
ទាំងគណបក្សសង្គ្រោះជាតិ ទាំងអ្នកតាមដានសភាពការណ៍នយោបាយនៅក្នុងប្រទេសកម្ពុជាមួយចំនួន សុទ្ធតែបានយល់ឃើញស្របគ្នាថាការដែលមិនឆ្លើយឆ្លងអាចជាផ្លូវដ៏ល្អមួយសម្រាប់គណបក្សប្រឆាំង ជាពិសេសសម្រាប់លោកកឹម សុខា ដែលកំពុងទទួលរងនូវការប្រឈមកាន់តែខ្លាំងទៅៗទាក់ទងទៅនឹងខ្សែអាត់សម្លេង សាសងស្នេហានឹងស្ត្រីវ័យក្មេង ដែលត្រូវបានចេញផ្សាយដោយបណ្តាញសង្គមហ្វេសប៊ុក និងប្រព័ន្ធផ្សព្វផ្សាយនានា។
តាមបរិបទនយោបាយកម្ពុជាបច្ចុប្បន្ន គណបក្សប្រឆាំងបានជ្រើសរើសយកជំហរមិនឆ្លើយ មិនឆ្លង មិនឈ្លោះ មានន័យថាមិនតបត គឺជាជម្រើសល្អ។ ទោះយ៉ាងនេះក្តី«មិន៣»របស់គណបក្សប្រឆាំងត្រូវបានគណបក្សកាន់អំណាច ចាប់អារម្មណ៍ខ្លាំង ហើយវាយតម្លៃថាទំនងជាមិនអាចប្រើការបាននៅក្នុងដំណាក់កាលនេះទេ។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន ប្រមុខដឹកនាំគណបក្សប្រជាជនកម្ពុជា បានចំអកដល់គោលការណ៍«៣មិន» របស់គណបក្សសង្គ្រោះជាតិ ថាជាយុទ្ធសាស្ត្រ គ្មានប្រសិទ្ធភាព។ លោកថាយុទ្ធសាស្ត្រ«៣មិន»នេះ ត្រូវបានប្រើប្រាស់កាលពីអតីតរដ្ឋកម្ពុជា ដើម្បីប្រឆាំងនឹងការវិលត្រឡប់មកវិញនៃរបបប្រល័យពូជសាសន៍ប៉ុលពតតែប៉ុណ្ណោះ គឺមិនអាចប្រើប្រាស់នៅក្នុងសតវត្សទី២១នេះបានទេ។
ដោយឡែកទាក់ទងទៅនឹងភាពស្ងាត់ស្ងៀមរបស់គណបក្សប្រឆាំង តាមគោលជំហរ«៣មិន»គេអាចកត់សម្គាល់ថា ប្រហែលជាមិនអាចស្ថិតក្នុងស្ថានភាពបែបហ្នឹងបានយូរទេ។ មិនបានយូរដោយសារ ករណីលោកកឹម សុខា អនុប្រធានគណបក្សសង្គ្រោះជាតិ ដែលកំពុងប្រឈមនឹងរឿងអាស្រូវផ្លូវភេទនោះ អាចនឹងឈានទៅដល់ចំណុចមួយ ត្រូវមានការបកស្រាយនូវអ្វីដែលជាការមន្ទិល។
បញ្ហាផ្លូវភេទរវាងលោកកឹម សុខា និងស្ត្រីវ័យក្មេង បានរងការចោទប្រកាន់ពីក្រុមមួយ អះអាងថាជានិស្សិត ថាប៉ះពាល់ដល់វប្បធម៌ ប្រពៃណី និងមានជាប់ពាក់ព័ន្ធទៅនឹងច្បាប់ទម្លាប់ទៀតផង។ រឿងនេះត្រូវបានរុញទៅកាន់៣មុខព្រួញ ក្នុងនោះមានតុលាការ អង្គភាពប្រឆាំងអំពើពុករលួយ និងរដ្ឋសភាជាតិ។ ចង់មិនចង់ក្រុមអ្នកទាមទារសង្ឃឹមថានឹងទទួលបានការឆ្លើយតបមួយពីលោកកឹម សុខា ដែលអស់ចិត្ត។
ជាការពិតគណបក្សសង្គ្រោះជាតិ ក៏ដូចជាលោកកឹម សុខា ប្រាកដណាស់ មិនអាចស្ថិតនៅក្នុងការមិនឆ្លើយតបបែបនេះរហូតបានទេ។ ក៏ប៉ុន្តែគ្រាន់តែរូបភាពឆ្លងឆ្លើយ អាចនឹងត្រូវបានធ្វើដោយតំណាង ឬតាមរយៈមេធាវី។ រីឯការឆ្លងឆ្លើយមែនទែននោះត្រូវគេមើលឃើញថាដល់ទៅកៀកការបោះឆ្នោតធំៗទាំងពីរខាងមុខ គឺការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧ និងការបោះឆ្នោតសកលនៅឆ្នាំ២០១៨ ខាងមុខ។
ទោះជាថ្នាក់ដឹកនាំគណបក្សប្រឆាំងក្នុងស្រុកប្រើប្រាស់យុទ្ធសាស្រ្តត្រជាក់យ៉ាងណាក៏ដោយ ម្តងម្កាលគេឃើញប្រធានគណបក្សប្រឆាំងលោកសម រង្ស៊ី ដែលនិរទ្ទេសខ្លួន នៅក្រៅប្រទេស បានធ្វើការវាយប្រហារ រិះគន់ រដ្ឋាភិបាលដែលដឹកនាំដោយគណបក្សប្រជាជនកម្ពុជា យ៉ាងចាស់ដៃផងដែរ តាមរយៈសន្និសីទវីដេអូ នៅពេលដែលមានការជួបប្រជុំជាមួយសកម្មជន និងអ្នកគាំទ្រតាមបណ្តាខេត្តជាហូរហែ។ លើទំព័រហ្វេសប៊ុករបស់មេបក្សប្រឆាំងរូបនេះ ក៏នៅតែបង្ហោះជាប់ជានិច្ចដែរ ពីចំណុចអវិជ្ជមានរបស់រដ្ឋាភិបាលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ