ការរួបរួមជាកត្តាកំណត់ជ័យជំនះរបស់បក្សប្រឆាំងនៅឆ្នាំ២០១៨ខាងមុខ
ចុះផ្សាយនៅថ្ងៃ៖
ស្តាប់ - ០៤:៤៧
ក្នុងរយៈពេលប៉ុន្មានថ្ងៃមកនេះ ថ្នាក់ដឹកនាំគណបក្សសង្រ្គោះជាតិ និងគណបក្សរាជានិយមហ្វ៊ុនស៊ិនប៉ិច បានផ្លោងពាក្យសំដីដាក់គ្នាទៅវិញទៅមក ជុំវិញព័ត៌មានលេចឮថា នឹងមានជំនួបនៅចុងខែតុលានេះ ដើម្បីធ្វើការរួបរួមគ្នា។ ក៏ប៉ុន្តែភ្លាមៗនេះ លោក សម រង្ស៊ី និងលោក កឹម សុខា បានច្រានចោលព័ត៌មានចចាមអារាមនេះ និងបានចាត់ទុកថា ជារឿងឥតប្រយោជន៍ ខណៈព្រះអង្គម្ចាស់ នរោត្តម រណឬទ្ធិ បានបង្ហាញជំហរស្វាគមន៍ បើមានការសរសេរលិខិតជាផ្លូវការ។ យ៉ាងណាក៏ដោយ ដើម្បីឆ្ពោះទៅកាន់ការផ្លាស់ប្តូរដូចដែលគណបក្សប្រឆាំងធ្លាប់អំពាវនាវ នោះគណបក្សប្រឆាំង មិនគួរបដិសេធលឿនពេក ពីលទ្ធភាពនៃការរួបរួមណាមួយនោះទេ។
ដោយផ្អែកទៅលើលទ្ធផលនៃការបោះឆ្នោតជាតិកាលពីខែកក្កដា ឆ្នាំ២០១៣ គណបក្សប្រឆាំង បានទទួលអាសនៈនៅក្នុងរដ្ឋសភាដល់ទៅ៥៥អាសនៈ។ លទ្ធផលនេះមិនអាចនិយាយថា មិនមែន មិនមកពីការរួបរួមគ្នារវាងគណបក្សសិទ្ធិមនុស្ស និងគណបក្សសមរង្ស៊ីកាលពីឆ្នាំ២០១២នោះទេ។
គេនៅចាំបានថា មុនឈានដល់ការច្របាច់បញ្ចូលគ្នា រវាងគណបក្សសិទ្ធិមនុស្ស និង គណបក្សសមរង្ស៊ី កាលពីឆ្នាំ២០១២នោះ គណបក្សទាំងពីរ បានត្មិះតិះដៀលគ្នាទៅវិញទៅមក រាប់ចាប់តាំងពីមេដឹកនាំកំពូល រហូតដល់អ្នកគាំទ្រនៅថ្នាក់មូលដ្ឋានផង។ ក៏ប៉ុន្តែនៅទីបំផុតទៅ គណបក្សទាំងពីរ បានឈានដល់កិច្ចព្រមព្រៀងគ្នាមួយ ដើម្បីបង្កើតគណបក្សសង្រ្គោះជាតិឡើងនៅខែកក្កដាឆ្នាំ២០១២ តាមរយៈកិច្ចប្រជុំជាបន្តបន្ទាប់ដែលធ្វើឡើង នៅឯទីក្រុងម៉ានីល ប្រទេសហ្វីលីពីន។
តែយ៉ាងណាក៏ដោយ ការរួបរួមគ្នាកាលពីឆ្នាំ២០១២ នៅមិនទាន់គ្រប់គ្រាន់សម្រាប់ឲ្យគណបក្សប្រឆាំងមួយនេះ លើកទង់ជ័យយកឈ្នះលើគណបក្សប្រជាជនកម្ពុជា ដែលបានកាន់អំណាចអស់រយៈពេលជាង៣៥នៅកម្ពុជានោះទេ។
ដូច្នេះ តើអ្វីដែលគណបក្សប្រឆាំងត្រូវធ្វើពីពេលនេះ រហូតដល់ការបោះឆ្នោតជាតិនៅឆ្នាំ២០១៨ខាងមុខ?
កាលពីថ្ងៃទី២ ដើមខែតុលា ឆ្នាំ២០១៥នេះ គណបក្សសង្រ្គោះជាតិបានរៀបចំរួចមកហើយ នូវសិក្ខាសាលាមួយ ស្តីពី «ដំណើរឆ្ពោះទៅរកការបោះឆ្នោត» ដើម្បីនាំមកនូវការផ្លាស់ប្តូរ ដែលគណបក្សប្រឆាំងចង់បាន តែគណបក្សកាន់អំណាចមិនចង់បាន។
សិក្ខាសាលានេះ បានលើកយកចំណុចសំខាន់ៗចំនួន៦មកពិភាក្សា ក៏ប៉ុន្តែកត្តាកំណត់មួយ ដែលគណបក្សសង្រ្គោះជាតិមិនអាចមើលរំលងបាន នោះគឺការបង្រួបបង្រួមគណបក្សតូចៗ ដែលកំពុងតែមានវត្តមាននៅក្នុងប្រទេសកម្ពុជា ព្រោះថា ចង់មិនចង់ គណបក្សតូចៗទាំងនោះ នឹងក្លាយជាឧបសគ្គរបស់គណបក្សប្រឆាំង ហើយក្នុងចំណោមគណបក្សតូចៗទាំងនោះ គណបក្សបី ដែលសង្រ្គោះជាតិរឹតតែមិនអាចមើលរំលងបាន នោះគឺគណបក្សរាជានិយមហ្វ៊ុនស៊ិនប៉ិច (FUN) របស់ព្រះអង្គម្ចាស់ នរោត្តម រណឬទ្ធិ, គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ និងគណបក្សប្រជាធិបតេយ្យមូលដ្ឋាន (GDP) របស់លោក យ៉េង វីរៈ ដែលអនាគតនឹងមានលោក យ៉ង សាំងកុមារ ប្រធានអង្គការសេដាកមកអ្នកដឹកនាំ ដែលគណបក្សនេះត្រូវបានគេចាត់ទុកថា ជាគណបក្សដ៏មានសក្កានុពលថ្មី ហើយអាចអូសទាញសំលេងគាំទ្របានច្រើន ពីគណបក្សប្រឆាំង។
បើគេផ្អែកទៅលើលទ្ធផលផ្លូវការនៃការបោះឆ្នោតជ្រើសតាំងតំណាងរាស្រ្តនីតិកាលទី៥ឆ្នាំ២០១៣ ហើយដែលត្រូវបានប្រកាសដោយគណកម្មាធិការជាតិរៀបចំការបោះឆ្នោត (គ.ជ.ប) គណបក្សប្រជាជនកម្ពុជាទទួលបានសំលេងគាំទ្រ ៣,២៣៥,៩៦៩ សំលេង ខណៈដែលគណបក្សសង្រ្គោះជាតិទទួលបាន ២,៩៤៦,១៧៦ សំលេង ក្នុងចំណោមអ្នកដែលបានចេញទៅបោះឆ្នោត ៦,៧៣៥,២៤៤ នាក់។ តួលេខនេះបានបង្ហាញថា នៅសល់តែបន្តិចបន្តួចទៀតតែប៉ុណ្ណោះ ដែលសំលេងគាំទ្រគណបក្សប្រឆាំង នឹងតាមស្មើសំលេងគាំទ្ររបស់គណបក្សប្រជាជនកម្ពុជា។ នេះមិនគិតទៅដល់អ្នកដែលមិនបានទៅបោះឆ្នោតចំនួនជិត ៣លានសំលេង រួមទាំងសម្លេងឆ្នោតដែលធ្លាក់ទៅលើគណបក្សតូចៗចំនួន៦ទៀត ដែលបានចូលរួមក្នុងការបោះឆ្នោតជាតិអាណត្តិទី៥ ឆ្នាំ២០១៣កន្លងទៅនេះ។
ដូច្នេះ គណបក្សសង្រ្គោះជាតិ មិនគួរប្រញ៉ាប់ប្រញ៉ាល់ពេក ក្នុងការច្រានចោលលទ្ធភាពនៃការបង្រួបបង្រួមជាមួយគណបក្សណាមួយនោះទេ ខណៈដែលកាលពីថ្ងៃទី១៥តុលា ម្សិលមិញនេះ ព្រះអង្គម្ចាស់នរោត្តម រណឬទ្ធិ បានបង្ហាញសញ្ញាវិជ្ជមានចង់ជួបចរចា ប្រសិនបើមានការស្នើសុំជាផ្លូវការ។ ហើយបើផ្អែកលើសេចក្តីប្រកាសព័ត៌មានរបស់គណបក្សសង្រ្គោះជាតិ កាលពីថ្ងៃទី១៤តុលា បើទោះបីជាសេចក្តីប្រកាសនេះ បានច្រានចោលថា មិនទាន់មានគម្រោងជំនួបជាមួយថ្នាក់ដឹកនាំ ឬប្រធានគណបក្សណាមួយនោះក្តី ក៏ប៉ុន្តែនៅចុងក្រោយនៃសេចក្តីប្រកាសព័ត៌មាននេះបញ្ជាក់ថា គណបក្សសង្រ្គោះជាតិនៅតែមានគោលបំណងក្នុងការបង្រួបបង្រួមកម្លាំងអ្នកជាតិនិយម អ្នកប្រជាធិបតេយ្យទាំងអស់ ក្នុងការជំរុញឲ្យមានការផ្លាស់ប្តូរតាមរយៈការបោះឆ្នោតដោយសេរី ត្រឹមត្រូវ យុត្តិធម៌ និងតាមគោលការណ៍ប្រជាធិបតេយ្យ សេរីពហុបក្ស សន្តិវិធី និងអហិង្សា។
តើនេះគ្រាន់តែជាការផ្លោងសំដីដាក់គ្នាឬយ៉ាងណា?
បើគេនិយាយពីសម្តេចក្រុមព្រះ នរោត្តម រណឬទ្ធិ បើទោះបីជាកន្លងទៅ ព្រះអង្គបាត់បង់ការគាំទ្របន្តិចខ្លះក្តី ក៏ប៉ុន្តែតួអង្គនិងប្រជាប្រិយភាពរបស់ទ្រង់ នៅតែសំខាន់នៅក្នុងឆាកនយោបាយខ្មែរ ពិសេសនៅពេលដែលព្រះអង្គបានវិលមកដឹកនាំគណបក្សរាជានិយមហ្វ៊ុនស៊ិនប៉ិចឡើងវិញ កាលពីខែមករា ឆ្នាំ២០១៥។ ចំណែកឯតួអង្គរបស់លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យវិញ ក៏នៅតែសំខាន់នៅក្នុងឆាកនយោបាយ ខ្មែរ បើទោះបី ជាគណបក្សសំបុកឃ្មុំនេះ បានជួបនូវបញ្ហាជម្លោះផ្ទៃក្នុង ក្រោយពីការបង្កើតឡើងបានប៉ុន្មានខែនេះក្តី។ ដូចគ្នាអញ្ចឹងដែរ សម្រាប់គណបក្សប្រជាធិបតេយ្យមូលដ្ឋាន (GDP) របស់លោក យ៉េង វីរៈ ក៏ជាតួអង្គសំខាន់ថ្មីនៅក្នុងឆាកនយោបាយខ្មែរផងដែរ។
យ៉ាងណាក៏ដោយ គណបក្សសង្រ្គោះជាតិ ក៏ត្រូវមានការប្រុងប្រយ័ត្នដែរថា តើការរួបរួមជាមួយគណបក្សនយោបាយណាមួយនោះ អាចជាលាប ឬអាចជាគ្រោះទៅវិញក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ