តើការចុះបញ្ជីពាណិជ្ជកម្មពិតជាមានសារៈសំខាន់មែន ឬសម្រាប់អាជីវកម្មថ្មីថ្មោង?
ចុះផ្សាយនៅថ្ងៃ៖
ស្តាប់ - ០៤:០៦
កន្លងមកវិទ្យុបារាំងយើង ធ្លាប់បានធ្វើបទវិភាគទាក់ទងនឹងកំណើនយុវជនបង្កើតអាជីវកម្មថ្មីៗដោយខ្លួនឯង។ ហើយការ បើកអាជីវកម្មនោះ គឺសំដៅទៅលើការបើកអាជីវកម្ម Start Up ឬក៏ហៅថាសហគ្រាសខ្នាតមីក្រូ។ នៅពេលនោះយើង ក៏បានបង្ហាញជូនពីកត្តាប្រឈមនានាមួយចំនួនដែរ ទាក់ទងនឹងហិរញ្ញវត្ថុ ធនធានមនុស្ស ការប្រកួតប្រជែង ការគ្រប់គ្រង និងការដឹកនាំជាដើម។ ប៉ុន្តែនៅពេលនេះ យើងនឹងលោកយកបញ្ហាមួយទៀតមកវិភាគជូនលោកអ្នកស្តាប់ ជាបន្តទៀត គឺកត្តាច្បាប់ ដែលទាក់ទងនឹងការចុះបញ្ជីពាណិជ្ជកម្ម និងការបង់ពន្ធជាដើម។
តួរលេខពីក្រសួងឧស្សាហកម្មនិងសិប្បកម្មកាលពីឆ្នាំ២០១៥ បង្ហាញថា ក្នុងចំណោមសហគ្រាសប្រមាណជា ៥១ម៉ឺន ដែលត្រូវបានជំរឿន មានសហគ្រាសខ្នាតធំជិត ៦៣% ជាការវិនិយោគបរទេស និងសហគ្រាសខ្នាតមធ្យមមាន៣៧, ១៤%។ ដោយឡែកកម្ពុជាជាម្ចាស់កម្មសិទ្ធលើសហគ្រាសខ្នាតមីក្រូ មានរហូតដល់ ៩៩% និងខ្នាតតូចមាន៩៤%។ នេះសឲ្យឃើញថា អាជីវកម្មនៅកម្ពុជា គឺនៅមានលក្ខណៈជាគ្រួសារនៅឡើយ។ កត្តានេះហើយ ដែលធ្វើឲ្យមានភាព ស្មុគស្មាញក្នុងការរៀបចំឯកសារច្បាប់ និងការគ្រប់គ្រងឲ្យបានច្បាស់លាស់មួយនោះ។ ហើយក៏ជាកត្តាមួយ ដែលធ្វើ ឲ្យបាត់បង់ចំណូលរដ្ឋ នៅពេលដែលអាជីវកម្មអស់ទាំងនោះមិនបានចុះបញ្ជីពាណិជ្ជកម្ម និងបង់ពន្ធត្រឹមត្រូវនោះ។
ពិតណាស់ថា ការចុះបញ្ជីពាណិជ្ជកម្មវាពិតជាមានសារៈសំខាន់ ដើម្បីបង្ហាញថា អាជីវកម្មមួយជាអាជីវកម្មស្របច្បាប់ និងការពារដោយច្បាប់ នៅពេលមានជម្លោះ ឬក៏បញ្ហាណាមួយកើតឡើងជាយថាហេតុ។ ប៉ុន្តែការចុះបញ្ជីនេះទៀតសោត ទាមទារឲ្យមានការយល់ដឹងពីផ្នែកហិរញ្ញវត្ថុឲ្យបានច្បាស់លាស់នៅក្នុងអាជីវកម្មនីមួយៗ ឬនិយាយឲ្យចំគឺលំហូរ សាច់ប្រាក់នៅក្នុងអាជីវកម្មរបស់ខ្លួន ថាអាចយកប្រាក់ចំណូល និងចំណេញបានប៉ុណ្ណាដែរ។
បើសិនយើងគិតឲ្យបានវែងឆ្ងាយថា ពិតជាចង់ពង្រីកអាជីវកម្មរបស់ខ្លួនទៅមុខហើយនោះ អ្វីដែលសំខាន់គឺការចុះបញ្ជី និងបង់ពន្ធតាមដែលច្បាប់ក្នុងប្រទេសតម្រូវឲ្យមាន។ ព្រោះថាការធ្វើបែបនេះងាយស្រួល ក្នុងការទំនាក់ទំនងជាមួយនឹងបណ្តាដៃគូអាជីវកម្មផ្សេងទៀត មិនថាក្នុងស្រុក ឬក្រៅស្រុកនោះទេ។ មួយវិញទៀត គឺការរក្សាឈ្មោះយីហោ ឬក៏ Brand របស់អាជីវកម្មដោយច្បាប់នៅក្នុងប្រទេស។ អញ្ចឹងម្ចាស់អាជីវកម្មដើមក៏អាចមាន សិទ្ធិលក់ឈ្មោះអាជីវកម្ម ឬហៅថាលក់ Franchise បន្តទៀតបានដែរ។
វាអាចនឹងគ្រោះថ្នាក់បន្តិច នៅពេលដែលមិនទាន់មានគម្រោង ឬផែនការអាជីវម្មច្បាស់លាស់ផង ហើយរត់ទៅចុះបញ្ជី ពាណិជ្ជកម្មនោះ។ ព្រោះថា សូម្បីតែម្ចាស់អាជីវកម្មខ្លួនឯងផ្ទាល់ក៏មិនបានដឹង និងកំណត់ពីជោគវាសនារបស់អាជីវកម្ម របស់ខ្លួនឲ្យបានច្បាស់លាស់នោះដែរ។
ចំពោះរដ្ឋាភិបាលវិញក៏គួរតែពន្លឿនដំណើរការនៃការចុះបញ្ជីនេះផងដែរ ខណៈដែលក្រុមហ៊ុនអាជីវកម្មមួយចំនួន នៅតែបន្តគេចវេស ដោយមិនចង់អស់ថ្លៃសេវា និងការបង់ពន្ធជាដើម។ វាអាចនឹងពិបាកបន្តិចសម្រាប់កម្ពុជា ព្រោះយើងដឹងហើយថា អាជីវកម្ម ឬក៏សហគ្រាសខ្នាតមីក្រូចំនួន ៩៩% គឺជាម្ចាស់កម្មសិទ្ធិរបស់ប្រជាជនខ្មែរ។ អញ្ចឹង មានន័យថា រដ្ឋាភិបាលគួរតែចាប់ផ្តើមអប់រំ និងផ្តល់ការបណ្តុះបណ្តាលពីអត្ថប្រយោជន៍នៃការចុះបញ្ជីពាណិជ្ជកម្ម និងអប់រំពីការបង្កើតគម្រោងអាជីវកម្មដល់ប្រជាពលរដ្ឋរបស់ខ្លួនឲ្យបានកាន់តែច្រើនឡើងៗ។
បញ្ហាអស់ទាំងនេះ គឺសុទ្ធតែជារឿងដែលត្រូវយកទៅពិចារណា ជាពិសេសគឺយុវជនខ្មែរ ដែលកំពុងតែមាន ទំនោរហក់ទៅបង្កើតអាជីវកម្មនៅប៉ុន្មានឆ្នាំចុងក្រោយនេះ។ ព្រោះថាការបង្កើតអាជីវកម្មដោយខ្លួនឯងអាចផ្តល់នូវ អត្ថប្រយោជន៍ សេរីភាពពេលវេលា និងគោលគំនិត ឯករាជ្យភាព សេរីភាព សុវត្ថិភាពការងារ និងប្រាក់ចំណូលជាដើម។ ប៉ុន្តែមុននឹងទទួលបានអត្ថប្រយោជន៍អស់ទាំងនេះ យុវជនខ្មែរទាំងអស់ ត្រូវតែមានចំណេះដឹង ដែលអាចដោះស្រាយ និងប្រឈមនូវបញ្ហាដែលបានលើកឡើងពីខាងលើ ដើម្បីធ្វើជាគ្រឹះមួយដ៏មាំក្នុងការបង្កើតអាជីវកម្មមួយប្រកប ដោយជោគជ័យ និងអាចឈរជើងបានយូរអង្វែងនៅក្នុងពិភពមុខជំនួញ។
កន្លងមកក្រសួងពាណិជ្ជកម្មធ្លាប់បានបង្កើតកម្មវិធីថ្មីមួយមានឈ្មោះថា MOC 101 Incubatorដែលជាកម្មវិធីដំបូងបង្អស់របស់ក្រសួង ក្នុងការជួយបណ្តុះគំនិតធ្វើអាជីវកម្មដល់ប្រជាជនកម្ពុជា ប្រកបដោយជំនាញ និងប្រសិទ្ធិភាព កាលពីពាក់កណ្តាលឆ្នាំ២០១៥ ហើយដែលទើបត្រូវបានបញ្ចប់កាលពីដើមឆ្នាំ២០១៦នេះ។ កម្មវិធីនេះក៏ជាផ្នែកមួយ នៃការជួយបង្ហាត់បង្រៀនយុវជនខ្មែរ ក្នុងការធ្វើអាជីវកម្មប្រកបដោយជំនាញ និងចំណេះដឹងដែរ។ ហើយក្រៅពីនេះ ក៏នៅមានស្ថាប័ន និងក្រុមហ៊ុនមួយចំនួនផងដែរ ដែលជួយផ្តល់វគ្គបណ្តុះបណ្តាលខ្លីៗ ក្នុងការធ្វើអាជីវកម្មផងដែរ។ ប៉ុន្តែការបណ្តុះបណ្តាលក្នុងរយៈពេលខ្លីនេះ នៅមិនទាន់គ្រប់គ្រាន់នោះទេ សម្រាប់យុវជនខ្មែរ អភិវឌ្ឍខ្លួនឯងឲ្យទៅជា សហគ្រិនមួយប្រកបដោយប្រសិទ្ធភាព។ យុវជនខ្លួនឯងចាំបាច់បំផុតត្រូវតែរៀនសូត្របន្ថែមទៀត ទាក់ទងនឹងការផ្លាស់ប្តូរផ្នត់គំនិត ការគ្រប់គ្រងអារម្មណ៍ខ្លួនឯង បង្កើតភាពជាអ្នកដឹកនាំ និងចេះគ្រប់គ្រងហិរញ្ញវត្ថុរបស់ខ្លួនប្រកបដោយភាពឆ្លាតវៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ