អាជ្ញាធរអនុញ្ញាតឲ្យសហជីពរៀបចំទិវាពលកម្មអន្តរជាតិតែមិនឲ្យហែ
នៅថ្ងៃទី៣០ ខែមេសានេះ សាលាក្រុងភ្នំពេញ និងក្រសួងមហាផ្ទៃ បានអនុញ្ញាតឲ្យសហជីពរៀបចំកម្មវិធីអបអរទិវាពលកម្មអន្តរជាតិមួយកន្លែង នាថ្ងៃស្អែកនេះ នៅសួនច្បារមុខក្រុមប្រឹក្សាអភិវឌ្ឍន៍កម្ពុជា (CDC)។ ជាការអនុញ្ញាត តបតាមការស្នើរបស់សហជីព ដើម្បីឲ្យតំណាងកម្មករចូលរួមប្រមាណ២ពាន់នាក់ ក្នុងឱកាសទិវាពលកម្មអន្តរជាតិនាថ្ងៃស្អែក។
ចុះផ្សាយនៅថ្ងៃ៖
ស្តាប់ - ០១:៥៦
លោក ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា ក្រសួងមហាផ្ទៃបានឯកភាពតាមសំណើរបស់សាលាក្រុងហើយ ក្នុងការអនុញ្ញាតឲ្យតំណាងសហភាព សហព័ន្ធសហជីព និងសមាគម ជួបជុំគ្នានៅសួនច្បារ មុខក្រុមប្រឹក្សាអភិវឌ្ឍន៍កម្ពុជាCDC ក្នុងឱកាសទិវាពលកម្មអន្តរជាតិ១ ឧសភា ខួបលើកទី១៣២។ ប៉ុន្តែការហែក្បួនក្នុងទិវាពលកម្មអន្តរជាតិ មិនអនុញ្ញាតឲ្យធ្វើនោះទេ ដោយមានការព្រួយបារម្ភពីបញ្ហាសន្តិសុខ។ នេះបើតាមអ្នកនាំពាក្យក្រសួងមហាផ្ទៃ។
លោក អាត់ ធន់ ប្រធានសហភាពការងារកម្ពុជា បានថ្លែងប្រាប់វិទ្យុបារាំងអន្តរជាតិនៅថ្ងៃទី៣០ ខែមេសានេះថា លោកបានក៏បានទទួលព័ត៌មាន ថាក្រសួងមហាផ្ទៃអនុញ្ញាតឲ្យសហជីពរបស់លោករៀបចំកម្មវិធីនាថ្ងៃទី១ ខែឧសភានេះដែរ។
បើតាមលោកអាត់ ធន់ ការប្រារព្ធទិវាពលកម្មអន្តរជាតិនេះ ធ្វើឡើងក្នុងគោលបំណងពីរសំខាន់ៗ ទី១ ដើម្បីអបអរសាទរ និងរំឭកដល់វីរភាពរបស់អ្នក ដែលបានបូជាជីវិត ដើម្បីសិទ្ធិការងាររហូតដល់បច្ចុប្បន្ន។ ទី២ សហជីពតែងតែយកឱកាសនេះ ផ្ញើសារ និងសម្តែងទុក្ខកង្វល់ផ្សេងៗនៅក្នុងឆ្នាំចាស់ និងស្នើឲ្យរដ្ឋាភិបាលដោះស្រាយនូវចំណុចខ្វះខាតទាំងនោះ។
គូសបញ្ជាក់ថា លោក អាត់ ធន់ ប្រធានសហភាពការងារកម្ពុជា CLC ដើមឡើយគ្រោងនឹងរៀបចំពិធីអបអរសាទរទិវាពលកម្មអន្តរជាតិ ក្រោមប្រធានបទ “ការប្រឈមរបស់កម្មករក្នុងការអនុវត្តច្បាប់សហជីព” ចាប់ពីម៉ោង៧ព្រឹក ដល់ម៉ោង១២ថ្ងៃត្រង់ រួចដង្ហែក្បួនទៅដាក់ញ្ញតិជូនរដ្ឋសភា តាមមហាវិថីសម្តេចសុធារស។
ប៉ុន្តែសំណើហែក្បួន ត្រូវបានសាលាក្រុងទាត់ចោល និងប្រាប់ឲ្យរៀបចំកម្មវិធីនឹងសួនច្បារCDCវិញ ហើយរដ្ឋបាលរាជធានីភ្នំពេញនឹងសម្របសម្រួលស្នើឲ្យគណៈកម្មការទី១ នៃរដ្ឋសភា មកទទួលញ្ញតិ្តនៅទីតាំងប្រារព្ធពិធី។ បើតាមសាលាក្រុងភ្នំពេញអនុញ្ញាតឲ្យរៀបចំកម្មវិធីនៅមួយកន្លែង គឺដើម្បីរក្សានូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ពិសេសបញ្ចៀសនូវការកកស្ទះចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ