អាជ្ញាធរ និងកម្មករដកថយម្នាក់មួយជំហាន បញ្ជៀសការប្រឈមមុខដាក់គ្នានៅក្នុងទិវាពលកម្មអន្តរជាតិ ១ឧសភា
ក្រុមកម្មករជិត ២ពាន់នាក់ បានប្រឈមមុខជាមួយអាជ្ញាធរក្រុងភ្នំពេញ អស់រយៈពេលជាច្រើនម៉ោង នៅក្នុងទិវាពលកម្មអន្តរជាតិ ១ឧសភាខួបលើកទី ១៣១។ នៅថ្ងៃនេះ កម្មករនៅលើពិភពលោកបានប្រារព្ធទិវាពលកម្មអន្តរជាតិ ១ឧសភានេះ ដើម្បីជាការរំលឹក និងសម្តែងមតិ ពាក់ព័ន្ធនឹងសិទ្ធិរបស់ពួកគេ។ តែនៅកម្ពុជា អាជ្ញាធរបានហាមចំពោះការដើរដង្ហែរក្បួន។
ចុះផ្សាយនៅថ្ងៃ៖
ស្តាប់ - ០២:៤៤
អាជ្ញាធរក្រុងភ្នំពេញដែលប្រដាប់ដោយខែល និងដំបង បានប្រឈមមុខគ្នាជាមួយក្រុមកម្មករ-កម្មការិនីរោងចក្រកាត់ដេរ ដេរស្បែកជើង និងវិស័យផ្សេងៗទៀតប្រមាណជាង ២ពាន់នាក់ នៅពេលដែលពួកគេបានព្យាយាមដើរដង្ហែរក្បួន យកញ្ញត្តិទៅដាក់នៅក្នុងរដ្ឋសភានៅក្នុងទិវាពលកម្មអន្តរជាតិ ០១ឧសភានេះ។ សម្រាប់ភាគីអាជ្ញាធរ នេះគឺជាការអនុវត្តដាច់ណាត់ចំពោះបទបញ្ជារបស់ថ្នាក់លើ ដោយហាមមិនឲ្យកម្មករដើរដង្ហែក្បួននៅក្នុងទិវាពលកម្មអន្តរជាតិ ១ឧសភានេះទេ។ ចំណែកឯភាគីកម្មករនិយោជិតវិញ ក្រៅតែពីការចង់ជួបជុំគ្នាដើម្បីប្រារព្ធទិវាពលកម្មអន្តរជាតិ ១ឧសភានេះហើយ ក៏មានបំណងដើរដង្ហែរក្បួន យកញ្ញត្តិទៅដាក់នៅក្នុងរដ្ឋសភាជាតិផងដែរ។
ប៉ុន្តែនៅទីបំផុតទៅ ភាគីទាំងពីរបានសម្រេចដកថយម្នាក់មួយជំហាន ពោលគឺភាគីអាជ្ញាធរបានយល់ព្រមបើករបាំងបិទផ្លូវឲ្យកម្មករដើរដង្ហែរក្បួនប្រមាណជា ៣០០ម៉ែត្រ ចំណែកឯភាគីកម្មករវិញ បានយល់ព្រមដើរដង្ហែរក្បួនទៅតាមការកំណត់របស់អាជ្ញាធរ និងបានសម្រេចជ្រើសរើសតំណាងរបស់ខ្លួនចំនួន ១០នាក់ប៉ុណ្ណោះ ដើម្បីយកញត្តិទៅដាក់នៅក្នុងរដ្ឋសភា។ ការសម្រេចបែបនេះ គឺបន្ទាប់ពីមានការចរចារគ្នា រវាងភាគីអាជ្ញាធរខណ្ឌចំការមនជាមួយនឹងលោក អាត់ ធន់ ប្រធានសហភាពការងារកម្ពុជា ក្រោមការជួយសម្របសម្រួលពីលោក សយ សុភាព អគ្គនាយកមជ្ឈមណ្ឌលព័ត៌មានដើមអំពិល ដែលគេដឹងជាទូទៅថា គឺជាអ្នកដែលមានសមានចិត្តចំពោះលោកនាយករដ្ឋមន្រ្តី ហ៊ុន សែន។ ក្រុមកម្មករជិត ២ពាន់នាក់ដែលមកពី៩ស្ថាប័នសហជីពធំៗនៅកម្ពុជា បានដើរដង្ហែរក្បួនដោយជោគជ័យ ដោយកម្មករទាំងអស់បានចងក្រណាត់ពណ៌ក្រហមច្រាល នៅលើក្បាលរបស់ពួកគេដោយមានសរសរអក្សរថា “សិទ្ធិយើង”។
គួរជំរាបជូនថា តាមគម្រោង ក្រុមកម្មករទាំងនេះ គ្រោងមកជួបជុំគ្នានៅទីធ្លាមាត់ទន្លេ ស្ថិតនៅខាងកើតក្រុមប្រឹក្សាអភិវឌ្ឍន៍កម្ពុជា (CDC) ជិតរមណីយដ្ឋានវត្តភ្នំឯណេះទេ។ ក៏ប៉ុន្តែ នៅទីនោះ ក៏មានការដាក់របាំងបិទផ្លូវ និងកងកម្លាំងមានសមត្ថកិច្ចផងដែរ។
សូមបញ្ជាក់ថា ការប្រារព្ធទិវាពលកម្មអន្តរជាតិ ១ឧសភាឆ្នាំ ២០១៧ ខួបលើកទី ១៣១នេះ ក្រុមកម្មករនៅក្នុងវិស័យកាត់ដេរ ដេរស្បែកជើង និងវិស័យមួយចំនួនទៀត បានដាក់ញ្ញត្តិទៅកាន់រដ្ឋសភា ដោយបានទាមទារ ១៦ចំណុច។ ក្នុងនោះ ក៏មានការទាមទារឲ្យរាជរដ្ឋាភិបាលកម្ពុជា និងរដ្ឋសភាជាតិ កំណត់ប្រាក់ឈ្នួលជាថ្មីដល់កម្មករនិយោជិតអប្បរមាចំនួន ២០៧ដុល្លារក្នុងមួយខែ និង ២៥០ដុល្លារសម្រាប់មន្រ្តីរាជការ ព្រមទាំងការកំណត់ប្រាក់ឈ្នួលអប្បបរមា របស់កម្មករនៅក្នុងវិស័យផ្សេងៗទៀត ដូចជា វិស័យសំណង់ ទេសចរណ៍ និងវិស័យសេវាកម្មផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ