តុលាការសម្រេចបន្តឃុំខ្លួនមន្ដ្រីសមាគមអាដហុក និង មន្ដ្រី គ.ជ.ប. រយៈពេល៦ខែទៀត
មន្ដ្រីសិទ្ធិមនុស្សនៃសមាគមអាដហុក និងលោក នី ចរិយា អគ្គលេខាធិការរង គ.ជ.ប. ត្រូវបានចៅក្រមស៊ើបសួរសម្រេចឃុំខ្លួនរយៈពេល៦ខែទៀត។ ការសម្រេចរបស់ចៅក្រមស៊ើបសួរនាថ្ងៃព្រហស្បតិ៍នេះ ធ្វើឡើងចំពេលដែលសមាគមអាដហុករំលឹកខួបមួយឆ្នាំនៃការឃុំខ្លួនអ្នកទាំង៥។ សម្រាប់អង្គការការពារសិទ្ធិមនុស្សមួយនេះ ចំណាត់ការរបស់តុលាការ គឺជារឿងអយុត្តិធម៌និងបង្កការភិតភ័យដល់ប្រជាពលរដ្ឋ។ ចំណែកអង្គការឃ្លាំមើលសិទ្ធិមនុស្សអន្ដរជាតិវិញចាត់ទុកការឃុំខ្លួននេះថា ជាការបំភ័យនិងបំបិទមាត់អ្នកការពារសិទ្ធិមនុស្ស។
ចុះផ្សាយនៅថ្ងៃ៖
ស្តាប់ - ០២:២៥
នៅទីបំផុត សាលាដំបូងរាជធានីភ្នំពេញ បានសម្រេចបន្តនីតិវិធីឃុំខ្លួនមន្ដ្រីសិទ្ធិមនុស្សសមាគមអាដហុក និងលោក នី ចរិយា អគ្គលេខាធិការរង គ.ជ.ប. រយៈពេល៦ខែថែមទៀត នៅក្នុងសំណុំរឿងសូកប៉ាន់សាក្សី។ លោក សំ សុគង់ មេធាវីការពារក្ដីឲ្យជនត្រូវចោទទាំង៥ បានចាត់ទុកការសម្រេចរបស់តុលាការដូច្នេះថាបានប៉ះពាល់យ៉ាងខ្លាំងដល់ជនត្រូវចោទ ខណៈមានភស្តុតាងគ្រប់សព្វ ហើយសាក្សីក៏ត្រូវបានសាកសួររួចអស់ផងដែរ។
ការសម្រេចរបស់ចៅក្រមស៊ើបសួរនាថ្ងៃព្រហស្បតិ៍នេះ ធ្វើឡើងចំពេលដែលសមាគមអាដហុករំលឹកខួបមួយឆ្នាំនៃការឃុំខ្លួនអ្នកទាំង៥។ នៅក្នុងវីដេអូថ្លែងការណ៍ផ្សាយលើគេហទំព័រ លោក ធន់ សារាយ ប្រធានសមាគមអាដហុកបានចាត់ទុកការឃុំខ្លួនអ្នកទាំង៥ពីសំណាក់តុលាការដូច្នេះ ថាជារឿងអយុត្តិធម៌និងបង្កការភិតភ័យដល់ប្រជាពលរដ្ឋ។ លោកបានអំពាវនាវឲ្យតុលាការទម្លាក់ចោលរាល់ការចោទប្រកាន់និងដោះលែងអ្នកទាំង៥ក្នុងពេលដ៏ឆាប់ខាងមុខនេះ។
សម្រាប់អង្គការឃ្លាំមើលសិទ្ធិមនុស្សអន្ដរជាតិវិញ ចំណាត់ការរបស់តុលាការទៅលើមន្ដ្រីសមាគមអាដហុកទាំង៤រូប និងអគ្គលេខាធិការរង គ.ជ.ប. ធ្វើឡើងតាមការបញ្ឆេះពីប្រមុខរដ្ឋាភិបាលលោក ហ៊ុន សែន ដើម្បីបំភិតបំភ័យនិងគាបសង្កត់ការងារសិទ្ធិមនុស្ស។ លោក Brad Adams នាយកប្រចាំតំបន់អាស៊ីនៃអង្គការនេះ បានលើកឡើងនៅក្នុងសេចក្ដីថ្លែងការណ៍ថា ការជាប់ឃុំរបស់អ្នកទាំង៥រយៈពេល១ឆ្នាំកន្លងមកនេះ គឺជាផ្នែកមួយនៃយុទ្ធនាការបំផ្លាញគណបក្សប្រឆាំង បំភ័យ និងបំបិទមាត់អ្នកការពារសិទ្ធិមនុស្ស។ ដូចលោក ធន់ សារាយ ដែរ អង្គការអន្ដរជាតិនេះ បានអំពាវនាវឲ្យប្រទេសម្ចាស់ជំនួយជំរុញទៅរដ្ឋាភិបាលកម្ពុជា ឲ្យទម្លាក់បទចោទនិងដោះលែងអ្នកទាំង៥។
គួររំលឹកថា មន្ដ្រីការពារសិទ្ធិមនុស្សទាំង៤រូប រួមមាន លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី ត្រូវបានតុលាការក្រុងភ្នំពេញចោទប្រកាន់ពីបទសូកប៉ាន់សាក្សី ក្នុងសំណុំរឿងអាស្រូវស្នេហារវាងលោក កឹម សុខា និងនាង ស្រីមុំ។ រីឯលោក នី ចរិយា ដែលជាអគ្គលេខាធិការរង គ.ជ.ប. វិញ ត្រូវបានតុលាការចោទប្រកាន់ពីបទ សមគំនិតសូកប៉ាន់សាក្សី ក្នុងសំណុំរឿងដូចគ្នា។ នៅថ្ងៃទី២៦មេសាថ្មីៗនេះ អ្នកទាំង៥ បានជាប់ក្នុងជម្រើសផ្ដាច់ព្រ័ត្រ សម្រាប់ពានរង្វាន់អ្នកការពារសិទ្ធិមនុស្ស Martin Ennals Award ឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ