បុរសម្នាក់ត្រូវចាប់ខ្លួនដាក់គុករឿងក្លែងខ្លួនជាកងរាជអាវុធហត្ថនិងបញ្ចេញសារញុះញង់តាមហ្វេសប៊ុក
បុរសម្នាក់ឈ្មោះស្តើង ចិន្តា មានមុខរបរជាសន្តិសុខនៅក្នុងខេត្តព្រះសីហនុត្រូវបានតុលាការខេត្តនេះសម្រេចឃុំខ្លួននៅក្នុងពន្ធនាគារកាលពីថ្ងៃអាទិត្យម្សិលមិញ។ ការឃុំខ្លួននេះ ធ្វើឡើងក្រោមការចោទប្រកាន់ពីបទពាក់ព័ន្ធក្លែងអត្តសញ្ញាណជាកងរាជអាវុធហត្ថ និងញុះញង់ឲ្យប្រព្រឹត្តបទឧក្រិដ្ឋ។ ការចាប់ខ្លួននិងឃុំនេះទៀតសោត ធ្វើឡើងក្រោយបុរសម្នាក់នេះបានចូលទៅបញ្ចេញមតិនៅក្នុងគណនីហ្វេសប៊ុក“យមរាជលោកីយ៍” ដែលម្ចាស់ហ្វេសប៊ុកនេះ ទើបត្រូវបានចាប់ខ្លួនដោយសារធ្វើឲ្យប៉ះពាល់ដល់កិត្តិយសកងរាជអាវុធហត្ថ។
ចុះផ្សាយនៅថ្ងៃ៖
ស្តាប់ - ០២:១៥
ដើមហេតុដែលឈានទៅដល់ការចាប់ខ្លួនជនសង្ស័យស្តើង ចិន្តានេះ គឺដោយសារតែបុរសម្នាក់នេះ បានចូលទៅបញ្ចេញយោបល់(Comment) នៅក្នុងគណនីហ្វេសប៊ុក“យមរាជលោកីយ៍” របស់លោកសន សំនៀងអតីតមេបញ្ជាការកងរាជអាវុធហត្ថស្រុកបារាយ ខេត្តកំពង់ធំ ដែលពេលនោះ កំពុងផ្សាយផ្ទាល់ជុំវិញរឿងកងរាជអាវុធហត្ថព្រមានចាប់ខ្លួនរូបលោក ។ លោកស្តើង ចិន្តា ដែលមានរូបភាពក្នុងហ្វេសប៊ុកក្នុងឯកសណ្ឋានជាកងរាជអាវុធហត្ថ បានចូលទៅបញ្ចេញមតិ(Comment) ដោយសរសេរលើកទឹកចិត្ត និងគាំទ្រដល់លោកសន សំនៀង ហើយថា នឹងមានប្រជាពលរដ្ឋរាប់លាននាក់គាំទ្រ។ ក្នុងពេលនោះដែរ លោកស្តើង ចិន្តា ក៏បានអះអាងថា ខ្លួនគឺជាមេបញ្ជាការកងរាជអាវុធហត្ថរងខេត្តព្រះសីហនុ។
គឺនៅត្រង់ចំណុចនេះហើយ ដែលកងរាជអាវុធហត្ថ បានចោទលោកស្តើង ចិន្តា ថា បានក្លែងអត្តសញ្ញាណជាកងរាជអាវុធហត្ថ និងបានញុះញង់ឲ្យប្រព្រឹត្តបទឧក្រិដ្ឋនៅលើបណ្តាញសង្គមហ្វេសប៊ុកថែមទៀត។ នេះបើតាមការអះអាងរបស់លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសនៅក្នុងសន្និសិទសារព័ត៌មានខ្លីមួយនៅព្រឹកថ្ងៃចន្ទនេះ។ បើតាមលោកអេង ហ៊ី ដដែល មន្ត្រីកងរាជអាវុធហត្ថពិតប្រាកដ គឺមិនអាចទៅបញ្ចេញមតិផ្តេសផ្តាសនោះទេ ដោយសារតែពួកគេត្រូវបានអប់រំ និងត្រូវកម្រិតការបញ្ចេញមតិដោយវិន័យ និងលក្ខខន្តិកៈកងរាជអាវុធហត្ថ។
ជនសង្ស័យឈ្មោះស្តើង ចិន្តា ត្រូវកងរាជអាវុធហត្ថខេត្តព្រះសីហនុឃាត់ខ្លួនកាលពីថ្ងៃទី២០ ខែកក្កដា នៅក្នុងក្រុងព្រះសីហនុ។ នៅថ្ងៃទី២២ កក្កដា ជនសង្ស័យរូបនេះ ក៏ត្រូវបានតុលាការខេត្តនេះ សម្រេចឃុំខ្លួន បណ្តោះអាសន្ននៅក្នុងពន្ធនាគារ។ ការឃុំខ្លួននេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកសន សំនៀង ម្ចាស់គណនីហ្វេសប៊ុក“យមរាជលោកីយ៍”ត្រូវបានចាប់ខ្លួននិងឃុំខ្លួននៅក្នុងពន្ធនាគារដូចគ្នា។
លោកសន សំនៀង ត្រូវបានតុលាការខេត្តកំពង់ធំចោទប្រកាន់ពីរបទល្មើសគឺបទបរិហារកេរ្តិ៍ និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍។ អតីតមន្ត្រីកងរាជអាវុធហត្ថរូបនេះ ត្រូវបានចាប់ខ្លួនក្រោយធ្វើការរិះគន់តាមហ្វេសប៊ុកពីភាពមិនប្រក្រតីនៃការបង្ក្រាបគ្រឿងញៀនដែលធ្វើឲ្យរូបលោកត្រូវខ្ទាតចេញពីតំណែង។ ក៏ប៉ុន្តែរាល់ការរិះគន់ និងលើកឡើងទាំងអម្បាលម៉ានរបស់លោកសន សំនៀងនេះ ត្រូវបានកងរាជអាវុធហត្ថលើផ្ទៃប្រទេសបានមកច្រានចោលទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ