គ្រឿងញៀនជាង១០០គីឡូក្រាមទើបចាប់បាននៅថ្ងៃនេះ ខណៈជាង៦០គីឡូក្រាមទៀតត្រូវបានដុតចោល
សមត្ថកិច្ចកម្ពុជានៅថ្ងៃនេះ បានរឹបអូសគ្រឿងញៀនជាង១០០គីឡូក្រាម និងឃាត់ខ្លួនមនុស្ស៣នាក់នៅច្រកត្រពាំងក្រៀលខេត្តស្ទឹងត្រែង ជាប់ព្រំដែនឡាវ។ ការបង្រ្កាបគ្រឿងញៀននៅពេលនេះ ចំពេលដែលកម្ពុជាប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ដែលធ្វើនៅកោះពេជ្រ ដោយដុតបំផ្លាញគ្រឿងញៀនគ្រប់ប្រភេទចំនួន៦៤គីឡូក្រាម មានតម្លៃជាង២លានដុល្លារ។
ចុះផ្សាយនៅថ្ងៃ៖
ស្តាប់ - ០២:០៥
គ្រឿងញៀនចំនួន១២០គីឡូក្រាម ដែលសមត្ថកិច្ចចាប់បាននោះ គឺជាប្រភេទម៉ាទឹកកក ត្រូវបានក្រុមជនល្មើសជាជនជាតិខ្មែរចំនួន០៣នាក់ដឹកចេញពីប្រទេសឡាវ ចូលមកកម្ពុជា តាមរថយន្តក្រុង។ នេះបើតាមរបាយការណ៍របស់អគ្គនាយកដ្ឋានអន្តោប្រវេសន៍។
តាមរបាយការណ៍ដដែល ក្រុមជនល្មើស រួមទាំងគ្រឿងញៀន ត្រូវបាននគរបាលប៉ុស្តិ៍ត្រពាំងក្រៀល ប្រគល់ជូនសមត្ថកិច្ចជំនាញខាងគ្រឿងញៀន ដើម្បីបន្តនីតិវិធីទៀតតាមផ្លូវច្បាប់។
លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងប្រាប់អ្នកកាសែតនៅក្នុងឱកាសនៃការប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនថា ពួកឧក្រិដ្ឋជនជួញដូរគ្រឿងញៀន តែងតែលួចលាក់ចរាចរគ្រឿងញៀនខុសច្បាប់ ឆ្លងកាត់ប្រទេសកម្ពុជា។ តាមអាជ្ញាធរគ្រឿងញៀន គ្រឿងញៀនដែលបានឆ្លងកាត់ប្រទេសកម្ពុជា ភាគច្រើនមកពីតំបន់អាមេរិកខាងត្បូង តំបន់អាហ្វ្រិក តំបន់ត្រីកោណមាស និងតំបន់អឌ្ឍច័ន្ទមាសជាដើម។
ទាក់ទងទៅនឹងសន្ទុះនៃការផលិតនិងចរាចរគ្រឿងញៀន លោក កែ គឹមយ៉ាន បានបញ្ជាក់ថា និន្នាការនៃការផលិត ការចរាចរ និងប្រើប្រាស់គ្រឿងញៀនខុសច្បាប់ នៅក្នុងតំបន់និងនៅលើពិភពលោក មិនមានការថយចុះទេ ដោយក្នុងរយៈពេលប៉ុន្មានឆ្នាំចុងក្រោយនេះ ស្ថានភាពគ្រឿងញៀន កាន់តែមានលក្ខណៈស្មុគស្មាញនិងរាលដាល ដែលនេះជាបញ្ហាប្រឈមគួរឲ្យព្រួយបារម្ភ។
សូមបញ្ជាក់ថា នៅក្នុងទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ«ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន» អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញថា រយៈពេល៥ខែ ដើមឆ្នាំ២០១៨នេះ សមត្ថកិច្ចបង្ក្រាបបទល្មើសដែលពាក់ព័ន្ធនឹងគ្រឿងញៀនបានចំនួនជាង២៨០០ករណី ចាប់បានជនសង្ស័យចំនួនជាង៥៧០០នាក់ និងរឹបអូសគ្រឿងញៀនបានជាង៩៣គីឡូក្រាម។
ដោយឡែក សមត្ថកិច្ចក៏បានរកឃើញផងដែរនូវអ្នកប្រើប្រាស់គ្រឿងញៀនជិត១ម៉ឺននាក់ និងបានផ្តល់ការព្យាបាល និងស្តារនីតិសម្បទាដល់អ្នកញៀនគ្រឿងញៀនបានចំនួន ជាង៧ពាន់នាក់ គឺស្មើនឹង៧៥ភាគរយ នៃអ្នកប្រើប្រាស់និងអ្នកញៀនគ្រឿងញៀនទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ