ខួប៣០ឆ្នាំ ថ្ងៃឡើងកាន់អំណាច លោកហ៊ុន សែន បង្ហាញពីគុណសម្បត្តិតបនឹងរបាយការណ៍រិះគន់
ថ្ងៃ១៤មករា ១៩៨៥-ថ្ងៃ១៤មករា ២០១៥ ថ្ងៃនេះ ជាខួបគម្រប់៣០ឆ្នាំ ថ្ងៃដែលលោក ហ៊ុន សែន ឡើងកាន់តំណែង ជានាយករដ្ឋមន្ត្រី ដឹកនាំប្រទេសកម្ពុជា។ នៅថ្ងៃទី១៤មករានេះ លោកនាយករដ្ឋមន្ត្រី ហ៊ុន សែន បានបង្ហាញពីគុណសម្បត្តិរបស់លោក តបនឹងរបាយការណ៍រិះគន់របស់អង្គការឃ្លាំមើលសិទ្ធិមនុស្ស Human Right Watch។ នោះគឺលោកនាយករដ្ឋមន្ត្រី បញ្ចប់សង្គ្រាមហែកហួរនៅកម្ពុជា នាំដល់កិច្ចព្រមព្រៀងប៉ារីស ថ្ងៃ២៣តុលា ១៩៩១ សមិទ្ធផលសន្តិភាព ក្រោមនយោបាយឈ្នះឈ្នះ បញ្ចប់សង្គ្រាម រំលាយអង្គការខ្មែរក្រហម កំណែទម្រង់ដីធ្លី ចែកដីឲ្យប្រជាពលរដ្ឋមានកម្មសិទ្ធិដីធ្លី ព្រមទាំងស្ពានអ្នកលឿង ក៏លោកនាយករដ្ឋមន្ត្រី ហ៊ុន សែន ជាអ្នកសុំជប៉ុនផងដែរ។
ចុះផ្សាយនៅថ្ងៃ៖
ស្តាប់ - ០២:២៥
រម្លឹកដល់ខួប ៣០ ឆ្នាំ នៃការឡើងកាន់អំណាច ដឹកនាំប្រទេសកម្ពុជា ក្នុងនាមជានាយករដ្ឋមន្ត្រី កាលពីថ្ងៃ១៤មករា ១៩៨៥ គឺនៅថ្ងៃ១៤មករា ឆ្នាំ២០១៥ ក្នុងពិធីចាក់បេតុងភ្ជាប់មុខតំណស្ពានអ្នកលឿង ដែលជាជំនួយរបស់ជប៉ុន លោកហ៊ុន សែន បានរម្លឹកដល់ព្រឹត្តិការណ៍ជាប្រវត្តិសាស្ត្រ។ នៅថ្ងៃខួបគម្រប់ ៣០ ឆ្នាំ លោកនាយករដ្ឋមន្ត្រី បានលើកឡើងពីគុណសម្បត្តិបីបួនចំណុចរបស់លោក ក្នុងរយៈកាល ៣០ ឆ្នាំមកនេះ។
តាមលោកហ៊ុន សែន ពេលលោកឡើងធ្វើជានាយករដ្ឋមន្ត្រី នៅឆ្នាំ១៩៨៥ សង្គ្រាមហែកហួរ នៅកើតមាននៅឡើយទេនៅកម្ពុជា។ ដូច្នេះបើគ្មានបាតដៃរបស់លោកទេ ក៏គ្មានកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣តុលា ១៩៩១ ដែរ ព្រោះរូបលោក ជាអ្នកចរចា។
ចំណុចមួយទៀត សមិទ្ធផលនៃសន្តិភាព ដើម្បីបញ្ចប់សង្គ្រាមជាមួយខ្មែរក្រហម គឺលោកអះអាងថា រូបលោកផ្ទាល់ បានយកជីវិតទៅប្តូរ តាមរយៈនយោបាយឈ្នះឈ្នះ ហើយចូលរូងខ្លា ដែលជាសំបុកខ្មែរក្រហម ខណៈដែលអង្គការសហប្រជាជាតិ អ៊ុនតាក់ ប្រើលុយ ២០០០ លានដុល្លារ ក៏មិនអាចបញ្ចប់សង្គ្រាមបានផងនោះ។
គុណសម្បត្តិមួយទៀត នៅឆ្នាំ១៩៨៥ គឺលោកហ៊ុន សែន ជាអ្នកដឹកនាំកំណែទម្រង់ដីធ្លី អនុវត្តនយោបាយ ចែកដីផ្តល់កម្មសិទ្ធិដល់ប្រជាពលរដ្ឋខ្មែរ។ ក្នុងនោះ ស្ពានអ្នកលឿង ពេលនេះ ក៏លោកនាយករដ្ឋមន្ត្រី ជាអ្នកទៅសុំជប៉ុន ផងដែរ។
ទន្ទឹមនឹងការលើកឡើងបង្ហាញពីគុណសម្បត្តិខាងលើ លោកនាយករដ្ឋមន្ត្រី ហ៊ុន សែន ក៏បានទទួលស្គាល់ថា ក្នុងការដឹកនាំរយៈកាល ៣០ ឆ្នាំមកនេះ លោកក៏មានកំហុសដែរ។ ប៉ុន្តែកំហុសអ្វីខ្លះនោះ មិនត្រូវបានលោកលើកបង្ហាញទេ។
អត្ថាធិប្បាយរបស់ប្រមុខដឹកនាំរដ្ឋាភិបាលកម្ពុជាខាងលើនេះ ជាការឆ្លើយតបទៅនឹងរបាយការណ៍របស់អង្គការឃ្លាំមើលសិទ្ធិមនុស្ស Human Rights Watch ក្រោមចំណងជើងថា “រយៈពេល ៣០ ឆ្នាំ ក្នុងពេលកាន់តំណែងរបស់លោកហ៊ុន សែន។ នោះគឺ លោកហ៊ុន សែន ជាមេដឹកនាំ ជាប់ចំណាត់ថ្នាក់ទី៦ ក្នុងចំណោមមេដឹកនាំ កាន់អំណាចយូរជាងគេលើលោក។
តាម Human Rights Watch រយៈពេល ៣០ ឆ្នាំមកនេះ លោកហ៊ុន សែន កាន់អំណាចបានយូរ ដោយប្រើប្រាស់មធ្យោបាយសំខាន់ៗ រួមមាន ការប្រើអំពើហិង្សា ការគាបសង្កត់ និងអំពើពុករលួយ។ ជារបាយការណ៍ដែលមន្ត្រីរដ្ឋាភិបាល ចាត់ទុកជាការព្យាយាមបង្ខូចកេរ្តិ៍ឈ្មោះរបស់លោកហ៊ុន សែន និងរដ្ឋាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ