តើអនាគតភាសាបារាំងនៅកម្ពុជា កំពុងតែស្ថិតក្នុងភាពស្រពិចស្រពិល?
ចុះផ្សាយនៅថ្ងៃ៖
ស្តាប់ - ០៤:៤២
លោកស្រីមីកាអែលហ្សង់ Michaëlle Jean អគ្គលេខាធិការរបស់អង្គការអន្តរជាតិនៃប្រទេសនិយាយភាសាបារាំង បានមកបំពេញទស្សនកិច្ចផ្លូវការចំនួន ៣ថ្ងៃនៅកម្ពុជា ហើយបញ្ចប់នៅល្ងាចម្សិលមិញនេះ។ ក្នុងរយៈពេលនេះ លោកស្រីមីកាអែលហ្សង់ បានចូលគាល់ព្រះមហាក្សត្រ នឹងជួបជាមួយព្រះមហាក្សត្រ, លោកនាយករដ្ឋមន្ត្រី, ប្រធានសភា, រដ្ឋមន្ត្រីក្រសួងការបរទេស និងអ្នកប្រើប្រាស់ភាសាបារាំងសំខាន់ៗផ្សេងទៀត។ និយាយដាច់ដោយឡែកពីភាសាបារាំង គឺភាសាមួយនេះ ធ្លាប់បានចាក់ឫសយ៉ាងជ្រៅនៅក្នុងសង្គមខ្មែរ ជាពិសេសក្នុងផ្នែកវប្បធម៌ និងវិស័យសុខាភិបាល។ តាំងតែពីសម័យអាណាព្យាបាលបារាំងរហូតដល់មុនសម័យខ្មែរក្រហម ពលរដ្ឋខ្មែរនិយាយ និងប្រើប្រាស់ភាសាបារាំងយ៉ាងទូលំទូលាយ។ ក៏ប៉ុន្តែបច្ចុប្បន្ន ភាសាបរទេសមួយនេះ ត្រូវបានគេមើលឃើញថា កំពុងតែធ្លាក់ចុះថមថយឥទ្ធិពល គួរឲ្យកត់សម្គាល់។ តើមកពីមូលហេតុអ្វី?
នៅស្រុកខ្មែរ អ្នកនិយាយ និងប្រើប្រាស់ភាសាបារាំង មានចំនួនប្រមាណ ៤០ម៉ឺននាក់ (2010, OIF)។ ក្នុងនោះ កូនសិស្សនិស្សិត ដែលកំពុងរៀនបារាំងមានប្រមាណ ១០ម៉ឺននាក់។ ចំនួននេះ អាចនឹងកាន់តែថមថយចុះ ដោយសារតែឥទ្ធិពលភាសាបារាំងស្រុតចុះដែរ។
ជាបឋម គេគួរយល់ថា ទស្សនវិស័យរបស់បារាំង កំពុងតែបានបង្វែរការចាប់អារម្មណ៍ និងសម្លឹងមើលទៅរកស្រុកចិន និងអាហ្វ្រិក ច្រើនជាងចោលភ្នែកមកកម្ពុជា។ កម្ពុជាដែលទំនងជាមិនសូវផ្តល់ប្រយោជន៍ផ្នែកសេដ្ឋកិច្ចដល់បារាំងច្រើនប៉ុន្មានទេ ក្រៅតែពីផ្នែកការទូត និងវប្បធម៌នោះ។
ថែមពីនេះ នៅក្នុងបរិបទតំបន់ និងការសម្របខ្លួនតាមសកលភាវូបនីយកម្ម កម្ពុជាបានប្រើភាសាអង់គ្លេសសម្រាប់ចូលសមាហរណកម្មក្នុងសហគមន៍អាស៊ាន ហើយជនជាតិខ្មែរ ជាទូទៅជ្រើសរើសរៀនភាសាអង់គ្លេស ចិន និងកូរ៉េ ច្រើនជាងរៀនភាសាបារាំង ដើម្បីរកការងារធ្វើ និងសម្រាប់ផលប្រយោជន៍សេដ្ឋកិច្ច។
ចំណែកការនិយាយ និងប្រើប្រាស់ភាសាបារាំងសម្រាប់ការរស់នៅប្រចាំថ្ងៃវិញ គឺគេឃើញតែមាននៅក្នុងចំណោមបញ្ញវន្តមួយចំនួន ក្រុមអភិជនខ្លះ អនិកជនខ្មែរមកពីបារាំង និងសែស្រឡាយរាជវង្សតែប៉ុណ្ណោះ។ ដោយឡែក ចំពោះពលរដ្ឋសាមញ្ញ ក្នុងជីវភាពរាល់ថ្ងៃរបស់ពួកគេ គឺមិនសូវជានិយាយបារាំងញឹកញយទេ ឬស្ទើរតែគ្មានតែម្តង។
ទោះយ៉ាងណាក៏ដោយ ជាទូទៅ នៅក្នុងចំណោមអ្នកនិយមភាសាបារាំង គេច្រើននិយាយថា ចេះបារាំង គឺជាឱកាស និងជាជម្រើសល្អ ហើយងាយស្រួលរកការងារធ្វើ។ ពិតណាស់ មានស្ថាប័នរដ្ឋ និងឯកជនមិនតិចទេ ដែលត្រូវការអ្នកចេះបារាំងពិតប្រាកដ ហើយក្នុងផ្នែកទេសចរណ៍វិញ ពេលខ្លះ គេលំបាកនឹងរកបានមគ្គុទេសក៏ ដែលចេះបារាំងផង។ ដូច្នេះឃើញថា ចេះបារាំង ក៏ជាឱកាសល្អពិតមែន។
ក៏ប៉ុន្តែ ចំពោះថៅកែជនជាតិបារាំង ដែលគ្រប់គ្រង់ក្រុមហ៊ុនបារាំង ប្រមាណជា ១០០ក្រុមហ៊ុននៅស្រុកខ្មែរ ក៏មិនសូវជាផ្តោតយកចិត្តទុកដាក់ខ្លាំងដល់បុគ្គលិក ដែលចេះភាសាបារាំង ឲ្យខ្លាំងបន្តិចនោះដែរ។ គឺវាមិនដូច ដែលគេនិយាយពេញៗមាត់ថា អ្នកចេះបារាំង គឺមានឱកាស និងមានជម្រើសល្អ នោះឡើយ។
ងាកមកផ្នែកបណ្តុះបណ្តាលភាសាបារាំងទៀតសោត ក៏ឃើញថា កាន់តែខ្សត់ខ្សោយ។ ទន់ខ្សោយ ត្បិតថា សាស្ត្រាចារ្យសកលវិទ្យាល័យ ដែលប្រើប្រាស់បារាំង តែងតែត្អូញត្អែ ថាកូនសិស្ស ដែលទើបចប់បាក់ឌុប ហើយចូលមហាវិទ្យាល័យ ដែលរៀនជាភាសាបារាំង គឺកម្រិតភាសាបារាំងរបស់ពួកគេ កាន់តែធ្លាក់ចុះខ្សោយជាលំដាប់ ពីមួយឆ្នាំទៅមួយឆ្នាំ។
បើគេនិយាយដល់ស្ថាប័នអប់រំកម្រិតឧត្តមសិក្សា ដែលប្រើប្រាស់ភាសាបារាំង ទាំង៩នៅភ្នំពេញវិញ ស្ថានទូតបារាំង បានផ្តាច់ជំនួយជាបន្តបន្ទាប់ តួយ៉ាងនៅសកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច។ ទូតបារាំង លែងសូវជួយជំនួយដូចមុនទៀតហើយ ហើយតម្រូវឲ្យនិស្សិតបង់លុយរៀនដោយខ្លួនឯង ដែលកាន់តែថ្លៃឡើងៗ។ រីឯចំនួនសិស្សនិស្សិត ដែលត្រូវទទួលអាហារូបករណ៍ទៅរៀនតនៅស្រុកបារាំង ក៏មិនបង្កើនចំនួនច្រើនទេ ប៉ុន្តែបែរជាកាន់តែកាត់បន្ថយចុះទៅទៀត។
ជុំវិញការផ្សព្វផ្សាយឲ្យសិស្សវិទ្យាល័យចូលរៀនភាសាបារាំង ក៏មិនសូវជាផុសផុលច្រើនប៉ុន្មានដែរ។ នេះក៏ប្រហែលមកពីការខ្វះខាតការយកចិត្តទុកដាក់ចំពោះការលើកទឹកចិត្តឲ្យរៀនបារាំង ឬក៏មកពីភាសានេះ លំបាករៀន ថែមទាំងកង្វះគ្រូបង្រៀនភាសាបារាំង ដែលមានសមត្ថភាព និងចេះដឹងច្បាស់លាស់។
ចំពោះតម្លៃរៀនភាសាបារាំងដែលឡើងថ្លៃខ្លាំងយ៉ាងគំហុក ក៏ជាបញ្ហាចំណោទមួយដែរ។ ជាក់ស្តែងតាមសាលាឯកជនខ្លះ ពីមុនរៀនមួយវគ្គ ត្រឹមតែ២០ ទៅ ៣០ដុល្លារប៉ុណ្ណោះ តែពេលនេះ ប្រហែលជា ១០០ដុល្លារ ឬថ្លៃជាងនេះ។ នៅសាលាភាសាបារាំងមួយចំនួន ដែលធ្លាប់តែបង្រៀនស្ទើរតែមិនគិតថ្លៃ ឬបង់លុយដែរ តែតិចតួច ប៉ុន្តែពេលនេះ ត្រូវបង់ប្រាក់ច្រើន។ ដោយសារតែតម្លៃសិក្សាខ្ពស់ និងរកសិស្សចូលរៀនមិនបានផង សាលាបង្រៀនភាសាបារាំង ផ្នែកឯកជន នៅភ្នំពេញ ដែលកំពុងមានចំនួនតិចស្រាប់ផង មួយចំនួន ក៏បានផ្អាក ហើយនៅខេត្តសៀមរាបឯណោះ, សាលា Alliance Française ឬវិទ្យាស្ថានបារាំង Institute Français ប្រចាំខេត្តសៀមរាប បានបិទទ្វារតែម្តង។
ជារួមបើស្ថានភាពភាសាបារាំងនៅតែបន្តអូសបន្លាយដូច្នេះយូរអង្វែងទៅទៀត អនាគតភាសាបារាំងនៅកម្ពុជា អាចនឹងកាន់តែស្ថិតក្នុងភាពស្រពិចស្រពិលខ្លាំងមែនទែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ