តើក្រសួងសុខាភិបាលគួរតែចេញមុខប្រកាសពីកំណែទម្រង់របស់ខ្លួនជាសាធារណៈដែរឬទេ?
ចុះផ្សាយនៅថ្ងៃ៖
ស្តាប់ - ០៤:១០
នេះមិនមែនជារឿងថ្មីនោះទេ ដែលប្រព័ន្ធសុខាភិបាលកម្ពុជា ត្រូវបានប្រជាពលរដ្ឋខ្មែររិះគន់មិនសំចៃមាត់។ ហើយអ្វីដែលធ្វើឲ្យមហាជនរឹតតែភ្ញាក់ផ្អើលទៀតនោះ គឺករណីស្លាប់របស់លោកឡាំ តៅគង់ អាយុ២៨ឆ្នាំ កាលពីថ្ងៃទី ២២ ឧសភាកន្លងទៅនេះ។ ក្រុមគ្រួសារសពជនរងគ្រោះបានចោទប្រកាន់គ្លីនិកមួយឈ្មោះឃឹម រ៉ានី ដែលមានទីតាំងនៅទួលគោក ថាបានចាក់ថ្នាំដល់ជនរងគ្រោះរហូតដល់ស្លាប់។ ភ្លាមៗនេះដែរ ក្រសួងសុខាភិបាលផ្ទាល់ ក៏បានចេញលិខិតបិទគ្លីនិកមួយនេះនៅថ្ងៃបន្ទាប់នោះផងដែរ។ តើចំណាត់ការនៅពេលនេះអាចជួយស្តាមុខមាត់ឲ្យក្រសួងសុខាភិបាលកម្ពុជាវិញហើយឬទៅ? ឬក៏ក្រសួងត្រូវតែចាត់វិធានការអ្វីបន្ថែមទៀត ដើម្បីឲ្យប្រជាពលរដ្ឋខ្មែរងាកមកទុកចិត្តលើការផ្តល់សេវាសុខាភិបាលនៅកម្ពុជាវិញ?បទវិភាគរបស់ប្រាក់ ធីតា៖
នៅពេលដែលសួរពីរឿងកំណែទម្រង់នៅក្នុងប្រព័ន្ធសុខាភិបាលកម្ពុជា លោករដ្ឋមន្ត្រីម៉ម ប៊ុនហេង រដ្ឋមន្ត្រីក្រសួងសុខាភិបាលផ្ទាល់មិនដែលប្រកែកថាក្រសួងរបស់លោកគ្មានធ្វើកំណែទម្រង់នោះទេ គឺថាក្រសួងបានកំពុងតែធ្វើជារៀងរាល់ថ្ងៃ ដែលរួមមានទាំងការបណ្តុះបណ្តាលក្រុមគ្រួពេទ្យជំនាញបន្ថែម រួមទាំងការអប់រំក្រមសីលធម៌ និងវិជ្ជាជីវៈផងដែរ។ ហើយលោករដ្ឋមន្ត្រីក៏បានឲ្យដឹងទៀតថា យោងតាមការស្រាវជ្រាវរបស់ធនាគារពិភពលោកបានបង្ហាញថា មានប្រជាពលរដ្ឋខ្មែរតែ១% ប៉ុណ្ណោះ ដែលចេញទៅព្យាបាលសុខភាពនៅក្រៅប្រទេស។
ប៉ុន្តែតួលេខនេះហាក់ផ្ទុយស្រឡះពីការស្រាវជ្រាវរបស់មន្ទីរពេទ្យជប៉ុនមួយ ដែលបានធ្វើការសិក្សាស្រាវជ្រាវអស់រយៈពេលជាច្រើនឆ្នាំមុននឹងសម្រេចចិត្តសាងសង់មន្ទីរពេទ្យនៅក្នុងប្រទេសកម្ពុជា ហើយគ្រោងនឹងបើកដំណើរការនៅប៉ុន្មានខែខាងមុខនេះហើយ។ មន្ទីរពេទ្យជប៉ុនមួយនោះបានរកឃើញថា នៅប៉ុន្មានឆ្នាំចុងក្រោយនេះមានប្រជាជនកម្ពុជាប្រមាណជា ២សែន១ម៉ឺននាក់ធ្វើដំណើរទៅពិនិត្យសុខភាព និងព្យាបាលជំងឺនៅក្រៅប្រទេសក្នុងមួយឆ្នាំៗ។ ប្រទេសដែលប្រជាជនខ្មែរមានកម្រិតជីវភាពធូរធា អាចធ្វើដំណើរទៅបាននោះមានប្រទេសវៀតណាមចំនួន ១សែន៦ម៉ឺននាក់ ស្មើនឹង ៧៦%។ បន្ទាប់មកមានប្រទេសថៃ ៤ម៉ឺននាក់ ស្មើនឹង ១៩% និងប្រទេសសិង្ហបុរី មានចំនួន ៦ពាន់៣រយនាក់ ស្មើនឹង៣%។
អ្វីដែលមិនអាចប្រកែកបានទៀតនោះ គឺការសសើរមិនដាច់ពីមាត់ពីសេវាសុខាភិបាលនៅបរទេស ហើយរហូតដល់ពេលខ្លះ ប្រជាពលរដ្ឋខ្មែរបានដឹងយ៉ាងច្បាស់ពីតម្លៃនៃសេវាកម្មក្នុងមន្ទីរពេទ្យនានាជាច្រើននៅក្នុងប្រទេសជិតខាងកម្ពុជា។ ហើយព័ត៌មានបានបន្តពីមាត់មួយទៅមាត់មួយ។ អ្នកដែលធ្លាប់បានទៅហើយ បានបន្តប្រាប់ដល់អ្នកដែលមិនទាន់បានទៅ ថាការព្យាបាលរបស់គេមានភាពច្បាស់លាស់ ហើយតម្លៃវិញក៏សមរម្យសម្រាប់អ្នកដែលមានជីវភាពធូរធា។ អញ្ចឹងវាពិតណាស់ថា ជារៀងរាល់ថ្ងៃមានប្រជាពលរដ្ឋខ្មែរជាច្រើននាក់បានកំពុងតែជញ្ជូនលុយយ៉ាងច្រើនសន្ធាប់ ទៅឲ្យពេទ្យបរទេស។ ហើយការជញ្ជូននេះ គឺជញ្ជូនទៅដោយស្ម័គ្រចិត្តថែមទៀត បើទោះបីជាត្រូវចំណាយពេលធ្វើដំណើរឆ្ងាយ និងថវិកាធ្វើដំណើរបន្ថែមផងដែរ។
កន្លងមកវិទ្យុយើងធ្លាប់បានបង្ហាញពីចំណុចខ្វះចន្លោះជាច្រើននៅក្នុងវិស័យសុខាភិបាលខ្មែរ ដែលរួមមានទាំងការភូតកុហករបស់គ្រូពេទ្យចំពោះអ្នកជំងឺ កង្វះខាតផ្នែកសម្ភារៈ និងក្រមសីលធម៌ ការហូរចូលនូវឱសថក្លែងក្លាយ និងការទិញថ្នាំដោយសេរីតាមឱសថស្ថានដោយគ្មានវេជ្ជបញ្ជាជាដើម។
និយាយទៅនៅមានការងារជាច្រើនខ្លាំងណាស់សម្រាប់ក្រសួងសុខាភិបាលកម្ពុជា ធ្វើការដើម្បីធ្វើឲ្យប្រជាពលរដ្ឋរបស់ខ្លួនមានទំនុកចិត្ត ហើយងាកមករកការព្យាបាលនៅក្នុងស្រុកវិញ។ នៅប៉ុន្មានឆ្នាំចុងក្រោយនេះ ក៏មានរដ្ឋមន្ត្រីនៃក្រសួងមួយចំនួន បានចេញមុខប្រកាសជាសាធារណៈពីកំណែទម្រង់ស៊ីជម្រៅ និងធ្វើយ៉ាងណាដើម្បីបម្រើផលប្រយោជន៍ពិតប្រាកដដល់ប្រជាជនរបស់ខ្លួន។ ហើយការប្រកាសនោះទៀតសោតក៏ត្រូវបានរដ្ឋមន្ត្រីជាច្រើនរូបនោះ ធ្វើបាន ហើយប្រជាពលរដ្ឋខ្មែរក៏បានសម្តែងការគាំទ្រ និងលទ្ធផលដែលរដ្ឋមន្ត្រីទាំងនោះសម្រេចបានផងដែរ។
បើយើងមើលទៅលើបណ្តាញសង្គមហ្វេសប៊ុកនៅពេលបច្ចុប្បន្ននេះ អាចថាជាកន្លែងមួយបង្ហាញពីស្នាដៃផង ហើយក៏ជាកន្លែងមួយបង្ហាញពីការរិះគន់ផងដែរ ព្រោះថាបើធ្វើអ្វីមិនស្រួលខុសទំនងនោះ ប្រជាពលរដ្ឋនឹងបញ្ចេញប្រតិកម្មភ្លាមៗ ដោយមិនបង្អង់ទុកយូរនោះទេ។ អញ្ចឹងមិនថាតែក្រសួងសុខាភិបាលនោះទេ សូម្បីតែក្រសួងផ្សេងៗទៀត គួរតែឆ្លៀតឱកាសនេះបង្ហាញពីកំណែទម្រង់របស់ខ្លួនជាសាធារណៈ ស្របជាមួយនឹងការអនុវត្តជាក់ស្តែង ដើម្បីបង្ហាញជូនដល់ប្រជាពលរដ្ឋថា ខ្លួនពិតជាបានធ្វើមែន មិនមែនគ្រាន់តែនិយាយឲ្យរួចពីមាត់នោះទេ ហើយសង្ងំធ្វើការងារស្ងាត់ៗនោះដែរ។ ព្រោះថាការងារកែទម្រង់មិនមែនជាការងារធ្វើមួយថ្ងៃ មួយខែ មួយឆ្នាំហើយនោះទេ គឺវាទាមទារពេលវេលា។ អញ្ចឹងដើម្បីកុំឲ្យប្រជាពលរដ្ឋបន្តការរិះគន់មិនឈប់ និងមិនយល់ថាក្រសួងកំពុងធ្វើអ្វីនោះ មន្ត្រីដែលធ្វើការងារខាងផ្នែកកែទម្រង់នេះ គួរតែយកឱកាសនេះបង្ហាញពីអ្វីដែលខ្លួនកំពុងតែធ្វើ ព្រោះថាកន្លងមកប្រជាពលរដ្ឋខ្មែរ ក៏បានសរសើរមិនដាច់ពីមាត់ផងដែរ ពីការផ្លាស់ប្តូរ និងកំណែទម្រង់របស់ក្រសួងមួយចំនួនតូចនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ