នៅក្នុងបរិយាកាសនយោបាយដែលចេះតែអូសបន្លាយដោយភាពតានតឹងនៅពេលនេះ វាចាំបាច់ណាស់ថាគណបក្សនីមួយៗប្រឹងប្រែងបង្កើតនូវភាពសុខដុមជាមួយគ្នា។ ផលចំណេញពីភាពសុខដុមនេះគឺធ្វើឲ្យប្រទេសជាតិមានភាពស្ងប់ស្ងាត់ល្អ។ ម្យ៉ាងវិញទៀតប្រជាពលរដ្ឋនឹងមានកម្លាំងចិត្តក្នុងការចូលរួមនយោបាយ។បទវិភាគរបស់ គង់ សុឋានរិទ្ធ
ភាពតានតឹងនៅក្នុងនយបាយកម្ពុជាមិនទាន់បានស្រាកស្រាននៅឡើយទេជាច្រើនខែមកនេះ។ ភាពតានតឹងដែលចាប់ផ្តើមពីចំណុចប្រកួតប្រជែងជាសំខាន់រវាងគណបក្សប្រជាជនកម្ពុជាកំពុងកាន់អំណាចនិងគណបក្សសង្គ្រោះជាតិដែលជាគណបក្សប្រឆាំងនាំមុខគេ។ ជាលទ្ធផលមនុស្សជាង២០នាក់ត្រូវគេចាប់ដាក់ពន្ធនាគារ។ ក្នុងនោះមានមន្ត្រីនិងសកម្មជនគណបក្សប្រឆាំង មន្ត្រីអង្គការសង្គមស៊ីវិលនិងមន្ត្រីនៃគណកម្មាធិការជាតិរៀបចំការបោះឆ្នោតដែលមានប្រភពចេញពីសមាគមការពារសិទ្ធិមនុស្សអាដហុក។
ភាពតានតឹងបែបនេះបានក្លាយទៅជាវប្បធម៌ប្រកួតប្រជែងក្នុងនយោបាយកម្ពុជាទៅហើយបើរាប់ចាប់តាំងពីក្រោយការបោះឆ្នោតដែលរៀបចំដោយអង្គការសហប្រជាជាតិនៅឆ្នាំ១៩៩៣មកម្ល៉េះ។ បើទោះជាគេមិនទាន់អាចកំណត់បាននៅឡើយថាតើនឹងមានការវិវត្តបែបណាទៀតនៅក្នុងនយោបាយកម្ពុជា តែបើយោងតាមបទពិសោធន៍នៃជីវភាពនយោបាយកម្ពុជាកន្លងមកគេរំពឹងថាអាចនឹងមានការបន្ធូរបន្ថយខ្លះនៅមុនពេលបោះឆ្នោត។
ប៉ុន្តែអ្វីដែលសំខាន់នោះគឺថាតើគណបក្សនយោបាយកម្ពុជាគួរបង្កើតបរិយាកាសបែបណាដើម្បីនាំមកនូវភាពសុខដុមជាមួយគ្នា ប្រកួតគ្នាដោយមិនមានការភ័យខ្លាចឬធ្វើនយោបាយប្រកបដោយគេចផុតពីភាពតក់ស្លុត។ ការភ័យខ្លាចនិងភាពតក់ស្លុតនាំឲ្យបាត់បង់កម្លាំងចូលរួមដោយផ្ទាល់ពីសំណាក់ប្រជាជនក្នុងនយោបាយ។ ការបាត់បង់កម្លាំងនេះមិនល្អទេនៅពេលដែលប្រជាពលរដ្ឋឬយុវជនមិនចូលរួមក្នុងនយោបាយនោះដ្បិតប្រជាជាតិមួយដែលប្រជាពលរដ្ឋលែងមានចំណាប់អារម្មណ៍ក្នុងនយោបាយអាចនឹងប៉ះពាល់ដល់កិច្ចប្រឹងប្រែងអភិវឌ្ឍន៍ប្រទេស។
ពិតមែនហើយការឈ្លោះប្រកែកក្នុងនយោបាយគឺគ្រាន់តែ ដើម្បីឈ្នះចាញ់ ប៉ុន្តែវាមិនមែនជាមន្តសណ្តំចិត្តម្ចាស់ឆ្នោតនោះទេ។ ហេតុដូចនេះភាពសុខដុមរវាងគណបក្សនយោបាយមានសារសំខាន់ណាស់ដល់កម្លាំងចិត្តប្រជាពលរដ្ឋអ្នកគាំទ្រនយោបាយ។ ដើម្បីបានបរិយាកាសបែបនេះគណបក្សនយោបាយគួរចៀសវាងការរិះគន់ដែលមានលក្ខណៈជាអាវុធវាយប្រហារ ប៉ុន្តែប្រើប្រាស់ការរិះគន់គ្នាក្នុងគោលដៅស្ថាបនាសង្គមទាំងអស់គ្នា។
គណបក្សទាំងសងខាងគួរកំរិតព្រំដែនកុំប្រើនយោបាយបែបកម្លាំងបាយឬការវាយសង្គ្រប់យកឈ្នះឲ្យខានតែបាន។ ប៉ុន្តែគួរគប្បីប្រើមូលដ្ឋាននយោបាយឬធ្វើនយោបាយដើម្បីភាពរីកចម្រើនទាំងសងខាង។ ក្នុងន័យនេះការធ្វើនយោបាយត្រូវនឹងផ្តល់ផលចំណេញទាំងខាងបក្សកាន់អំណាច ទាំងខាងបក្សប្រជែងអំណាច។
គណបក្សនយោបាយគួរគប្បីហ៊ានជជែកគ្នាចំពោះមុខ ជាជាងស្រែកពីក្រោយខ្នងដាក់គ្នាដើម្បីបង្កើនការស្អប់ម្ខាងៗ។ ពីព្រោះបញ្ហាខ្លះគ្មានអ្វីដែលអាចដោះស្រាយបានក្រៅពីលើតុនោះទេ។ ប្រសិនបើបក្សនយោបាយអាចបង្កើតភាពសុខដុមនឹងគ្នាបានចាប់ពីពេលនេះទៅផលចំណេញដែលនឹងទទួលបាននោះគឺការគាំទ្រទាំងពីសំណាក់ប្រជាជាតិខ្លួនឯង និងការគាំទ្រពីអន្តរជាតិទៀតផង។ ភាពសុខដុមនៅក្នុងនយោបាយនឹងនាំឲ្យប្រទេសជាតិទទួលបានភាពស្ងប់ស្ងាត់។ ដំណាលគ្នានោះពលរដ្ឋនឹងរស់នៅដោយសប្បាយចិត្ត។ ពួកគេនឹងមានទឹកចិត្តធ្វើដំណើរទៅកាន់ហិបឆ្នោតនៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ