តើកម្ពុជាគួរធ្វើអ្វីខ្លះដើម្បីទាក់ទាញវិនិយោគិនអឺរ៉ុប?
ចុះផ្សាយនៅថ្ងៃ៖
ស្តាប់ - ០៣:៣៤
សហភាពអឺរ៉ុបគឺជាវិនិយោគិនមួយនាំមុខគេនៅក្នុងបណ្តាប្រទេសអាស៊ាន។ ប៉ុន្តែនៅកម្ពុជាវិញ ការវិនិយោគពីសហភាពអឺរ៉ុបមានមិនដល់១ភាគរយផង។ នេះបើយោងតាមស្ថិតិផ្លូវការមួយ បង្ហាញកាលពីចុងខែមីនាកន្លងទៅនេះ។ នៅក្នុងឆ្នាំ២០១៤ ក្រុមប្រឹក្សាពាណិជ្ជកម្មអឺរ៉ុប និងអាស៊ានបានបង្ហាញថា កម្ពុជាទទួលបានប្រមាណជា ០,៣ ភាគរយនៃការវិនិយោគរបស់អឺរ៉ុបនៅក្នុងតំបន់ ដែលមានទឹកប្រាក់ចំនួន ៨៦លានដុល្លារ ក្នុងចំណោមទឹកប្រាក់សរុប ២៩ពាន់លានដុល្លារ។ តើហេតុអ្វីបានជាកម្ពុជាទទួលបានការវិនិយោគពីអឺរ៉ុបមិនដល់មួយភាគរយផង? ហើយតើកម្ពុជាត្រូវធ្វើកំណែទម្រង់អ្វីខ្លះទៀតទៅ ដើម្បីគៀងគរវិនិយោគិនអឺរ៉ុប ឲ្យមកវិនិយោគផ្ទាល់នៅកម្ពុជា?
បើទោះបីជាកម្លាំងពលកម្មនៅកម្ពុជាមានតម្លៃទាបក៏ពិតមែន ប៉ុន្តែតាមការសិក្សាស្រាវជ្រាវមួយចំនួនបង្ហាញថា កម្ពុជានៅខ្វះខាតធនធានមនុស្សច្រើនខ្លាំងណាស់។ ហើយវាក៏ជាកត្តាមួយសំខាន់ និងពិបាករកមនុស្សមកធ្វើការឲ្យត្រូវជំនាញផងដែរ។
រដ្ឋាភិបាលត្រូវតែរៀបចំការងារជាច្រើនដើម្បីជួយសម្រួលដល់ការទាក់ទាញវិនិយោគិនអឺរ៉ុបមកកាន់កម្ពុជា។ កាលពីពេលថ្មីនេះ យើងឃើញមានសញ្ញាវិជ្ជមានមួយ គឺការរៀបចំចុះបញ្ជីក្រុមហ៊ុនតាមប្រព័ន្ធអ៊ីនធឺណិត ដែលបានរួមចំណែក ធ្វើឲ្យការងារមានស្តង់ដា កាត់បន្ថយពេលវេលា និងអំពើពុករលួយជាដើម។ ក្រៅពីនេះ រដ្ឋាភិបាលកម្ពុជាគួរតែរៀបចំប្រព័ន្ធគ្រប់គ្រងច្បាប់វិនិយោគឲ្យបានច្បាស់លាស់ និងគួរតែអាចទុកចិត្តបាន ដើម្បីបង្កើនទំនុកចិត្តសម្រាប់វិនិយោគិនអឺរ៉ុបមកធ្វើការវិនិយោគដោយផ្ទាល់។
ក្រៅពីរដ្ឋាភិបាល ក្រុមហ៊ុននៅក្នុងស្រុកក៏ត្រូវធ្វើការកែទម្រង់ផងដែរ ដើម្បីអាចទាក់ទាញវិនិយោគទុន មកធ្វើការរកស៊ីរួមគ្នា ដើម្បីពង្រីកដើមទុន និងទីផ្សារឲ្យបានកាន់តែធំ និងច្រើនឡើងថែមទៀត។ ប៉ុន្តែមុននឹងទាក់ទាញបាន ក្រុមហ៊ុន នៅក្នុងស្រុកត្រូវតែរៀបចំឲ្យមានគម្រោងអាជីវកម្មមួយច្បាស់លាស់ និងបង្ហាញពីតម្លាភាពនានានៅក្នុងក្រុមហ៊ុនរបស់ខ្លួន។ ក្រុមហ៊ុនបរទេសត្រូវការមើល ថាតើក្រុមហ៊ុននៅក្នុងស្រុកបានត្រៀមខ្លួនរួចហើយឬនៅ ដើម្បីធ្វើជាដៃគូអាជីវកម្មជាមួយនឹងពួកគេ។ ដូច្នេះហើយក្រុមហ៊ុននៅក្នុងស្រុកក៏ត្រូវរៀបចំខ្លួនឲ្យមានស្តង់ដារទៅតាមហ្នឹងដែរ។
កន្លងមកមិនមែនក្រុមហ៊ុននៅក្នុងស្រុកច្រើននោះទេ ដែលបានរៀបចំខ្លួនឲ្យត្រូវបានតាមស្តង់ដារនោះ ព្រោះថាការរៀបចំឲ្យមានប្រព័ន្ធបែបនេះ គឺត្រូវចំណាយច្រើន។ ប៉ុន្តែសូមកុំភ្លេចថា ការចំណាយច្រើននៅពេលនេះ ក៏អាចជាគ្រឹះមួយយ៉ាងមាំក្នុងការពង្រីកក្រុមហ៊ុនឲ្យកាន់តែធំ និងរីកចម្រើនបានយូរអង្វែង ហើយការស្វែងរកដៃគូអាជីវកម្ម ដើម្បីពង្រីក ទីផ្សារឲ្យបានកាន់តែច្រើននោះក៏មានភាពងាយស្រួលដែរ។
បច្ចុប្បន្នសេដ្ឋកិច្ចកម្ពុជាពឹងផ្អែកច្រើនទៅលើវិស័យកាត់ដេរ ហើយបណ្តាប្រទេសជិតខាងកម្ពុជាដូចជាវៀតណាមជាដើមនោះ ក៏កំពុងតែពង្រឹងទៅលើវិស័យនេះដូចគ្នាដែរ។ វៀតណាមក៏កំពុងតែក្លាយជាដៃគូប្រកួតប្រជែងរបស់កម្ពុជា ខណៈដែលខ្លួនបានទទួលនូវកិច្ចព្រមព្រៀងពាណិជ្ជកម្មសេរីវៀតណាម អឺរ៉ុប។
ការសិក្សាមួយដែលត្រូវបានធ្វើឡើងដោយសភាពាណិជ្ជកម្មអឺរ៉ុបនៅកម្ពុជា EuroCham កាលពីឆ្នាំមុនទៅលើតំណាង ពាណិជ្ជកម្មបរទេស និងអឺរ៉ុបចំនួន ៧២ នៅក្នុងប្រទេសកម្ពុជា បានឲ្យដឹងពីមូលហេតុមួយចំនួនដែលធ្វើឲ្យកម្ពុជា នៅឆ្ងាយពីក្រសែភ្នែករបស់អ្នកវិនិយោគទុនអឺរ៉ុបនោះ គឺខ្វះធនធានមនុស្សជំនាញធ្វើការ។ បញ្ហានេះគឺជាឧបសគ្គមួយយ៉ាងធំក្នុងការរារាំងពួកគេមកបណ្តាក់ទុនរកស៊ីដោយផ្ទាល់នៅកម្ពុជា។
ដើម្បីដោះស្រាយបញ្ហានេះបាន រដ្ឋាភិបាលកម្ពុជាត្រូវតែធ្វើការរួមគ្នាជាមួយនឹងវិស័យឯកជន ហើយត្រូវតែធ្វើការសិក្សា ស្រាវជ្រាវមួយឲ្យបានច្បាស់លាស់ ដើម្បីដោះស្រាយបញ្ហាឲ្យចំគោលដៅ ដោយមិនត្រូវចាំទទួលយកតែការសិក្សារបស់ ភាគីម្ខាងទៀតនោះទេ។ ការងារនេះគឺចាំបាច់ណាស់សម្រាប់ក្រសួងអប់រំ យុវជននិងកីឡា ក្នុងការសិក្សាស្វែងរកថា តើចំនួននិស្សិត និងទីផ្សារការងារសមាមាត្រគ្នាដែរឬទេ ហើយចំពោះគុណភាពចំណេះដឹង និងជំនាញវិញយ៉ាងណាដែរ។ ប្រសិនបើធនធានមនុស្សនៅកម្ពុជាមិនទាន់មានជំនាញគ្រប់គ្រាន់ តើក្រសួងការងារនិងបណ្តុះបណ្តាលវិជ្ជាជីវៈ អាចជួយអ្វីបន្ថែមទៀតបានពីលើក្រសួងអប់រំ។ ហើយតើក្រសួងពាណិជ្ជកម្មគួរតែអប់រំ និងផ្សព្វផ្សាយយ៉ាងណា ដើម្បីឲ្យប្រជាពលរដ្ឋរបស់ខ្លួនយល់ដឹងពីការធ្វើអាជីវកម្មប្រកបដោយស្តង់ដារ និងប្រព័ន្ធច្បាប់ត្រឹមត្រូវ។ ប្រសិនបើកត្តាទាំងអស់នេះ ដោះស្រាយបានហើយ សួរថាតើប្រព័ន្ធច្បាប់នៅកម្ពុជាអាចទុកចិត្តបានហើយឬនៅសម្រាប់អ្នកវិនិយោគទុនបរទេស។ អញ្ចឹងមានន័យថា កម្ពុជាត្រូវការពេលវេលាតទៅមុខទៀត ដើម្បីដោះស្រាយបញ្ហាអស់ទាំងនេះ ហើយក៏ត្រូវតែដោះស្រាយទៅទាំងព្រមផងដែរ ដោយមិនអាចទុកមួយណាមុន ឬក្រោយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ