នៅកម្ពុជា បទបញ្ជារបស់នាយករដ្ឋមន្រ្តី គួរអនុវត្តឲ្យដូច«ភ្លៀងរលឹម»
ចុះផ្សាយនៅថ្ងៃ៖
ស្តាប់ - ០៤:៣៤
ក្រៅពីបទបញ្ជាដែលធ្វើឡើងជាលាយលក្ខណ៍អក្សរហើយ នៅកម្ពុជា នាយករដ្ឋមន្រ្តី តែងតែផ្តល់អនុសាសន៍បន្ថែមទៀត ដើម្បីបង្កើនប្រសិទ្ធភាពនៃការអនុវត្តការងាររបស់មន្រ្តីរដ្ឋាភិបាលតាំងពីថ្នាក់លើរហូតដល់ថ្នាក់ក្រោម។ ក៏ប៉ុន្តែ ជារើយៗ បទបញ្ជា រឺអនុសាសន៍ទាំងនោះ មិនត្រូវបានគេអនុវត្តឲ្យដូចភ្លៀងរលឹមនោះទេ។
នៅប្រទេសណាមិនដឹងទេ! តែសម្រាប់កម្ពុជា ក្រៅពីបទបញ្ជាដែលធ្វើឡើងជាលាយលក្ខណ៍អក្សរហើយនោះ មេដឹកនាំកម្ពុជាចាំបាច់ត្រូវភ្ជាប់ទៅជាមួយផងដែរ នូវអនុសាសន៍បន្ថែមទៀត ដើម្បីជំរុញឲ្យការអនុវត្តការងាររបស់ខ្លួនមានប្រសិទ្ធភាព។
ជាក់ស្តែង លើបញ្ហានៃការដឹកជញ្ជូនលើសទំងន់ គេតែងតែឃើញលោកនាយករដ្ឋមន្រ្តីហ៊ុន សែន បានយកវេទិកានានា ដើម្បីអំពាវនាវឲ្យអាជ្ញាធរគ្រប់លំដាប់ថ្នាក់ ចាត់វិធានការទៅលើរថយន្តដឹកទំនិញដែលលើសទំងន់ និងរថយន្តធំៗដែលចូលទៅក្រុងដែលបង្កឲ្យមានការខូចខាតទៅដល់ផ្លូវថ្នល់ ស្ពាន និងស្ទះចរាចរណ៍ ឬបង្កឲ្យមានគ្រោះថ្នាក់ចរាចរណ៍ថែមទៀតផង។ ក៏ប៉ុន្តែ បទបញ្ជា ឬអនុសាសន៍ទាំងនោះ ត្រូវបានគេអនុវត្តតែមួយប៉ប្រិចភ្នែកប៉ុណ្ណោះ ក៏ស្ងាត់បាត់ទៅវិញ។
ជាក់ស្តែងករណីរថយន្តផ្ទុកទំនិញលើសទំងន់មួយគ្រឿង ដែលបើកបរឆ្លងកាត់ត្សឹបាសា ឬស្ពានអ្នកលឿងកាលពីពេលថ្មីៗនេះ បានបង្ហាញយ៉ាងច្បាស់ពីការខកខាន ឬការធ្វេសប្រហែសរបស់អាជ្ញាធរជាប់ពាក់ព័ន្ធគ្រប់លំដាប់ថ្នាក់ ក្នុងការទប់ស្កាត់ ឬរារាំង កុំឲ្យរថយន្តធន់ធ្ងន់ដឹកអង្ករដល់ទៅជាង៧០តោនបែបនេះ ឆ្លងកាត់នោះទេ។ តែផ្ទុយទៅវិញ រថយន្តយីឌុបដឹកអង្ករដែលមានទំងន់ដល់ទៅជាង៧០តោនមួយគ្រឿងនេះ បែរជាអាចបើកបរឆ្លងកាត់ស្ពានមួយនេះបាន ដោយមិនទើសភ្នែកសមត្ថកិច្ចនោះឡើយ។
ករណីនេះត្រូវបានមហាជនខ្មែរចោទជាសំណួរថា តើពីខេត្តស្វាយរៀងមកភ្នំពេញនេះ មិនមានជញ្ជីងថ្លឹងទម្ងន់ទេឬ? ហើយថាតើ អាជ្ញាធរនៅទីនោះធ្វើអ្វី បានជា មើលមិនឃើញរថយន្តធន់យក្សមួយគ្រឿងនេះបើកបរឆ្លងកាត់ភូមិសាស្រ្តរបស់ខ្លួនបែបនេះ? តើនេះ មកពីការធ្វេសប្រហែសរបស់អាជ្ញាធរ ឬក៏មកពីរថយន្តដឹកទំនិញទាំងនោះ មានសិទ្ធិអទិភាពណាមួយ ដែលពិបាកដល់អាជ្ញាធរថ្នាក់ក្រោម ក្នុងការអនុវត្តការងាររបស់ខ្លួន?
តាមពិតទៅ ករណីបែបនេះ មិនមែនជាលើកទីមួយនោះទេសម្រាប់កម្ពុជា។ ជារឿយៗ គេតែងតែបានឮពីសេចក្តីរាយការណ៍នានា ពីការបាក់ស្ពាន ឬការខូចខាតផ្លូវថ្នល់ជាដើម ដែលភាគច្រើនបង្កឡើងដោយសារការផ្ទុកលើសទំងន់របស់រថយន្តដឹកទំនិញរបស់ឈ្មួញ។ ហើយករណីទាំងអស់នោះ ក៏បញ្ចប់ទៅវិញ ត្រឹមតែសំណងជួសជុលបន្តិចបន្តួចប៉ុណ្ណោះ។
នេះគឺជាករណីមួយដែលបានឆ្លុះបញ្ចាំងឲ្យឃើញថា បទបញ្ជា ឬសេចក្តីណែនាំរបស់ប្រមុខរដ្ឋាភិបាលកម្ពុជាទៅកាន់អាជ្ញាធរមូលដ្ឋាន ហាក់មិនត្រូវបានអនុវត្តឲ្យបានពេញលេញនោះទេ។ កន្លងទៅ គេក៏បានឃើញនិងបានឮពីការអំពាវនាវរបស់នាយករដ្ឋមន្រ្តីឲ្យបង្រ្កាប់ទៅលើបទល្មើសផ្សេងៗ ដូចជា បទល្មើសជលផល ការកាប់បំផ្លាញព្រៃឈើ ការធ្វើអាជីវកម្មរ៉ែ និងបទល្មើសផ្សេងៗទៀត។ បន្ថែមលើនេះ ក៏មានការអំពាវនាវឲ្យមានការផ្តល់សេវាសាធារណៈរបស់រដ្ឋ និងការយកចិត្តទុកដាក់ទៅលើវិស័យសុខាភិបាល និងសុខភាពសាធារណៈរបស់ប្រជាពលរដ្ឋផងដែរ។ ប៉ុន្តែជាទូទៅ គេនៅតែឃើញមានសកម្មភាពល្មើសទាំងនោះដដែល ពោលគឺ ការបង្រ្កាបមិនបានធ្វើឡើងឲ្យដូចសកម្មភាពដែលគេប្រដូចទៅនឹងភ្លៀងរលឹមនោះទេ តែបែរជាដូចភ្លៀងលាយខ្យល់ ដែលបក់បោកបានតែមួយប្រាវ ហើយក៏ស្ងាត់បាត់ទៅវិញអញ្ចឹងដែរ។
គេនៅចាំបានថា កាលពីអំឡុងឆ្នាំ២០១៤ នៅក្នុងពិធីសម្ពោធផ្លូវមួយខ្សែស្ថិតនៅស្រុកបវេលខេត្តបាត់ដំបង លោកនាយករដ្ឋមន្រ្តី ហ៊ុន សែន មិនត្រឹមតែបានអំពាវនាវទេ តែថែមទាំងបានព្រមានទៀតផង ទៅដល់មន្រ្តីគ្រប់ភាគីពាក់ព័ន្ធទាំងអស់ឲ្យយកចិត្តទុកដាក់ និងត្រួតពិនិត្យ ទៅលើការធ្វើចរាចរណ៍របស់រថយន្តប្រភេទធុនធំៗ ដែលបានដឹកទំនិញលើសចំណុះផ្ទុយពីការកំណត់របស់ក្រសួងសាធារណៈការនិងដឹកជញ្ជូន។ ប៉ុន្តែសកម្មភាពល្មើសនេះ នៅតែមានដដែល។ តួយ៉ាងនៅក្នុងករណីរថយន្តយ៉ីឌុបដែលផ្ទុកអង្ករលើសទំងន់ជាង៧០តោននេះ ប្រសិនបើរថយន្តនេះមិនខូចនៅពាក់កណ្តាលស្ពានទេនោះ ក៏ប្រហែលជាមិនមាននណាដឹងនោះឡើយ ហើយបើក្នុងករណីដែលរថយន្តនេះបង្កឲ្យស្ពានដែលជាជំនួយរបស់រដ្ឋាភិបាលនិងប្រជាជនជប៉ុននេះបាក់ទៅវិញនោះ តើនណាជាអ្នកទទួលខុសត្រូវ?
យ៉ាងណាក៏ដោយ ករណីទាំងនេះ គឺជាលទ្ធផលមួយដែលស្តែងចេញពីការធ្វេសប្រហែសរបស់អាជ្ញាធរថ្នាក់ក្រោមក្នុងការអនុវត្តអនុសាសន៍ ឬបទបញ្ជារបស់នាយករដ្ឋមន្រ្តីនិងក្រសួងសាមីនេះឯង។ ដូច្នេះ វាគួរតែដល់ពេលហើយ ដែលអាជ្ញាធរគ្រប់ជាន់ថ្នាក់ ផ្លាស់ប្តូរឥរិយាបថក្នុងការអនុវត្តការងាររបស់ខ្លួន ហើយវាគួរតែដល់ពេលហើយដែរ ដែលអាជ្ញាធរកម្ពុជា គួរផ្តល់សេវាសាធារណៈជូនដល់ប្រជាពលរដ្ឋប្រកបដោយប្រសិទ្ធភាព និងប្រកបដោយការជឿទុកចិត្តពីសំណាក់ប្រជាពលរដ្ឋ ពោលគឺ អនុសាសន៍ ឬបទបញ្ជារបស់នាយករដ្ឋមន្រ្តី គួរត្រូវបានអនុវត្តឲ្យដូចភ្លៀងរលឹមអញ្ចឹងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ