សំណុំរឿង០០២វគ្គ១៖ តុលាការកំពូលគ្រោងប្រើអំណាចច្បាប់ដើម្បីអោយសវនការបន្តទៅមុខ
តុលាការកំពូលនៃសាលាក្តីខ្មែរក្រហម គ្រោងប្រើវិធានការចាប់បង្ខំតាមអំណាចច្បាប់ ដើម្បីពន្លឿនដំនើរការស្វែងរកការពិត។ សវនាការបណ្តឹងសារទុក្ខនៃសំណុំរឿង០០២វគ្គ១ ដែលគ្រោងធ្វើឡើងរយៈពេល៣ថ្ងៃនោះ បានផ្អាកទៅវិញដោយលើក ទៅពេលក្រោយ បន្ទាប់ពី លោក នួន ជា បដិសេធមិនចូលរួមនិងបានបង្គាប់អោយមេធាវីរបស់ខ្លួន មិនត្រូវចូលរួមនៅក្នុងដំនើរការសវនាការ។ ដូច្នេះវាបានបង្អាក់ដំណើរការសវនាការ ដែលទើបតែចាប់ផ្តើមកាលពីថ្ងៃទី១៧ខែវិច្ឆិកា ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ដើម្បីផលប្រយោជន៍នៃយុត្តិធម៌ និងកុំអោយសវនាការចេះតែជាប់គាំងបែបនេះ តុលាការកំពូលនៃសាលាក្តីខ្មែរក្រហមបានសំរេចស្នើសុំ អង្គភាពគាំពារការការពារក្តីអោយរកមេធាវីបំរុង ប្រសិនបើមេធាវីចាស់ របស់លោកនួន ជា នៅតែបន្តបដិសេធមិនចូលរួមនៅក្នុងដំណើរការសវនាការ។នេះបើតាម លោក ឌឹម សុវណ្ណារុំ ប្រធានផ្នែកកិច្ចការសាធារណៈរបស់សាលាក្តីខ្មែរក្រហម ដែលបានបញ្ជាក់ប្រាប់វិទ្យុបារាំងអន្តរជាតិ។
លោក ប្រធានអ្នកនាំពាក្យសាលាក្តីខ្មែរក្រហមរូបនេះបានបញ្ជាក់ទៀតថា ក្នុងករណីដែល នួន ជា នៅតែបង្គាប់មិនអោយមេធាវីបំរុងចូលសវនាការទៀតនោះ តុលាការនឹងប្រើអំណាចច្បាប់ បញ្ជាអោយមេធាវីត្រូវតែមានវត្តមាននៅក្នុងសវនាការ។សវនាការបទឧក្រិដ្ឋ នឹងមិនអាចប្រព្រឹត្តិទៅបានទេ ប្រសិនបើគ្មាន វត្តមានមេធាវីជនជាប់ចោទ។
ក៏ប៉ុន្តែផ្ទុយទៅវិញ លោក មេធាវី សុន អរុណ ដែលការពារ នួន ជា បានបញ្ជាក់ប្រាប់វិទ្យុបារាំងនៅព្រឹកថ្ងៃទី១៨ ខែវិច្ឆិកាដែរនេះថា នៅក្នុងសវនាការកាលពីថ្ងៃទី១៧ខែវិច្ឆិកា បន្ទាប់ពីការសំរាក បើទោះកូនក្តីរបស់លោកមិនអោយលោកចូលរួម តែក្រោមការបង្ខំរបស់តុលាការ និងដើម្បីការពារផលប្រយោជន៍កូនក្តី លោកបានសម្រេច ចូលមកក្នុងបន្ទប់សវនការវិញ ប៉ុន្តែមិនបានឆ្លងឆ្លើយអ្វីជាមួយអង្គសវនាការកាលពីម្សិលម៉ិញនោះទេ។ លោកបានបន្តបញ្ជាក់ថា នៅក្នុងសវនាការលើកក្រោយ លោកនឹងទៅចូលរួម ហើយថាតើត្រូវឆ្លើយឆ្លង ឬក៏អត់នោះ លោកនឹងសំរេចទៅតាមការណែនាំរបស់កូនក្តី និងតាមការជំនុំជាមួយក្រុមអ្នកច្បាប់របស់លោក។
នៅក្នុងសវនាការកាលពីថ្ងៃទី១៧ ខែ វិច្ឆិកា លោក នួន ជា បានអះអាងទទួលខុសត្រូវផ្នែកសីលធម៌ចំពោះរឿងរ៉ាវដែលបានកើតមាននៅក្នុងរបបកម្ពុជាប្រជាធិបតេយ្យ។ ក៏ប៉ុន្តែលោក បានបង្ហាញការពេញចិត្តចំពោះដំណើរការនៃសវនាការ ដោយចោទថា តុលាការនេះមិនដែលចង់រកការពិតនោះទេ ហើយតុលាការនេះឋិតក្រោមអំណាចរបស់ជនមួយចំនួន។
បើតាមលោក មេធាវី សុន អរុណ ចំនុចរសើបបំផុត ដែលធ្វើអោយជនជាប់ចោទរូបនេះ មិនចូលរួមដំនើរការសវនាការ និងបានបង្គាប់អោយមេធាវីរបស់ខ្លួនមិនចូលរួមដែរនោះ គឺ ការបដិសេធរបស់តុលាការ ចំពោះសំណើរសុំរបស់ជនជាប់ចោទ ដែលសុំអោយកោះហៅសាក្សីមួយចំនួនដែលបច្ចុប្បន្នឋិតនៅក្នុងជួរថា្នក់ដឹកនាំរដ្ឋាភិបាល។
សូមបញ្ជាក់ថានៅក្នុងបណ្តឹងសារទុក្ខតុលាការកំពូលនៃសំណុំរឿង ០០២វគ្គ១នេះមានជនជាប់ចោទពីររូបគឺនួនជា និងខៀវសំផន ហើយអ្នកទាំងពីរត្រូវបានសាលាដំបូងកាត់ទោសអោយជាប់ពន្ធនាគាអស់មួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ