សវនាការសំណុំរឿង ០០២ រអាក់រអួលព្រោះសុខភាពជនជាប់ចោទ
សវនាការសំណុំរឿង០០២បានបន្តបើកធ្វើនៅថ្ងៃអង្គារទី២៧មករានេះ ដោយគ្មានវត្តមាន ជនជាប់ចោទ នួន ជា ទេ។ ជនជាប់ចោទរូបនេះបានលះបង់សិទ្ធិចូលរួមសវនាការដោយផ្ទាល់ដោយសារបញ្ហាសុខភាព។ កាលពីរសៀលថ្ងៃចន្ទ សវនាការត្រូវបានរំខានដោយសារបញ្ហាសុខភាពរបស់ជនជាប់ចោទខៀវ សំផន។ តុលាការសម្រេចកាត់បន្ថយម៉ោង តែបង្កើនចំនួនថ្ងៃបើកសវនាការ។
ចុះផ្សាយនៅថ្ងៃ៖
ស្តាប់ - ០២:១៨
បន្ទាប់ពីបានផ្អាកកាលពីរសៀលថ្ងៃចន្ទ ដោយសារតែបញ្ហាសុខភាពរបស់ ខៀវ សំផន សវនាការនៅថ្ងៃអង្គារទី២៧មករានេះបានបន្តធ្វើជាធម្មតាតែគ្មានវត្តមានជនជាប់ចោទនួន ជា ទេ។ បងធំទី២នៃរបបខ្មែរក្រហមបានលះបង់សិទ្ធិចូលរួមសវនាការដោយផ្ទាល់ដោយសារតែបញ្ហាសុខភាព។ យ៉ាងណាក៏ដោយ តុលាការបានអនុញ្ញាតឲ្យ នួន ជា ស្តាប់សវនាការពីចម្ងាយក្នុងបន្ទប់ឃុំឃាំង។
ដោយសារបញ្ហាសុខភាពរបស់ជនជាប់ចោទ លោកចៅក្រម និល ណុន ប្រធានអង្គជំនុំជម្រះសាលាដំបូងបានប្រកាសកាត់បន្ថយម៉ោងសវនាការដោយត្រូវបញ្ចប់រយៈពេល៣០នាទីមុនម៉ោងកំណត់ពោលគឺសវនាការត្រូវចាប់ផ្តើមធ្វើពីម៉ោង៩ព្រឹកដល់ម៉ោង១១និង៣០នាទីថ្ងៃត្រង់តែប៉ុណ្ណោះ។ ការកាត់បន្ថយម៉ោងនេះគឺដោយយោងតាមការផ្តល់យោបល់របស់គ្រូពេទ្យដែលចង់ទុកពេលឲ្យជនជាប់ចោទសម្រាកច្រើនជាងមុន។
ប៉ុន្តែ លោក ចៅក្រម និល ណុន ប្រកាសថា នឹងបង្កើនថ្ងៃបើកសវនាការពីបីថ្ងៃក្នុងមួយសប្តាហ៍នាពេលបច្ចុប្បន្នឲ្យដល់បួនថ្ងៃក្នុងមួយសប្តាហ៍ចាប់ពីខែកុម្ភៈតទៅ។ ការបង្កើនចំនួនថ្ងៃសវនាការនេះគឺដើម្បីពន្លឿនសវនាការឲ្យបានឆាប់ពីព្រោះតែជនជាប់ចោទកាន់តែចាស់ជរាណាស់ទៅហើយ។
ក្រៅពីវ័យចាស់ជរារបស់ជនជាប់ចោទ បញ្ហាថវិកាក៏នៅតែចោទឡើងដែរសម្រាប់សាលាក្តីខ្មែរក្រហម។ ដើម្បីដោះស្រាយបញ្ហាចំពោះមុខ រដ្ឋាភិបាលកម្ពុជាបានសម្រេចផ្តល់ថវិកាជាង៤លានដុល្លារអាមេរិកសម្រាប់ការចំណាយទូទៅនិងសម្រាប់បើកប្រាក់ខែឲ្យបុគ្គលិកជាតិ។ នេះបើយោងតាមលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម។ លោកបានប្រាប់វិទ្យុបារាំងអន្តរជាតិថា ភាគីជាតិនៅខ្វះថវិកាជាង២លានដុល្លារទៀតសម្រាប់ការចំណាយពេញមួយឆ្នាំ ២០១៥ នេះ។
សូមបញ្ជាក់ថា សវនាការសំណុំរឿង ០០២ វគ្គទី២ ដែលកំពុងដំណើរការនេះផ្តោតទៅលើអំពើប្រល័យពូជសាសន៍ទៅលើជនជាតិវៀតណាម និងចាម អាពាហ៍ពិពាហ៍ដោយបង្ខំ និងការរំលោភផ្លូវភេទជាដើម។ ជនជាប់ចោទចុងក្រោយក្នុងសំណុំរឿងនេះនៅសល់តែពីរនាក់ប៉ុណ្ណោះគឺបងធំទី២ នួន ជា អាយុ ៨៨ ឆ្នាំ និង ខៀវ សំផន អាយុ ៨៣ឆ្នាំ។ វ័យចាស់ជរារបស់ពួកគេបានរំខានដល់ដំណើរការសវនាការជាញឹកញាប់ និងកំពុងបង្កក្តីបារម្ភអំពីអនាគតតុលាការកូនកាត់មួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ