លោកស្រី Elizabeth Becker ឡើងធ្វើសក្ខីកម្មនៅសាលាក្តីខ្មែរក្រហម
លោកស្រី Elizabeth Becker អ្នកនិពន្ធ សៀវភៅទាក់ទិននឹងរបបខ្មែរក្រហមនិងជាអ្នកកាសែតជើងចាស់ម្នាក់ជនជាតិអាមេរិកាំងដែលធ្លាប់បានជួបសម្ភាសន៍មេដឹកនាំខ្មែរក្រហមជាច្រើននោះត្រូវបានសាលាក្តីខ្មែរក្រហមកោះហៅមកផ្តល់សក្ខីកម្មនៅព្រឹកថ្ងៃចន្ទទី៩ខែកុម្ភៈ នេះ។ ក្នុងឋានៈជាសាក្សីជំនាញ លោកស្រី Elizabeth Becker នឹងត្រូវចំណាយ ពេលយ៉ាងតិច៤ថ្ងៃដើម្បីផ្តល់សក្ខីកម្មរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សាលាក្តី ខ្មែរក្រហមនៅថ្ងៃចន្ទនេះបានបន្តបើកសវនការលើសំណុំរឿង ០០២វគ្គ២ ដោយស្តាប់សក្ខីកម្មរបស់សាក្សីជំនាញដ៏សំខាន់ម្នាក់គឺលោកស្រី Elizabeth Becker អតីតអ្នកកាសែតជនជាតិអាមេរិកាំង។ សាក្សីរូបនេះធ្លាប់បានជួបសម្ភាសន៍ជាមួយ ប៉ុល ពត និង អៀង សារី និងធ្លាប់ជួបជាមួយកម្មាភិបាលខ្មែរក្រហមជាច្រើនទៀត។
លោកស្រីគឺជាអ្នកកាសែតបរទេសដ៏កម្រម្នាក់ដែលមេដឹកនាំខ្មែរក្រហមបានអញ្ជើញឲ្យមកបំពេញទស្សនកិច្ចនៅកម្ពុជានៅអំឡុងខែធ្នូ ឆ្នាំ១៩៧៨ ។ លោកស្រី Elizabeth Becker បានសរសេរសៀវភៅ២ក្បាលទាក់ទងនឹងរបបកម្ពុជាប្រជាធិបតេយ្យគឺសៀវភៅដែលមានចំណងជើងថា «បុប្ផាណា» និង «ក្រោយពេលសង្គ្រាមរលត់ទៅ» ដែលនិយាយពី«កម្ពុជានិងបដិវត្តរបស់ខ្មែរក្រហម»។ សៀវភៅចុងក្រោយនេះត្រូវបានសាលាក្តីដាក់បញ្ចូលទៅក្នុងសំណុំរឿង ០០២ ដើម្បីកាត់ទោសអតីតមេដឹកនាំខ្មែរក្រហម។
សូមបញ្ជាក់ថា សំណុំរឿង០០២វគ្គ២មានជនជាប់ចោទពីរនាក់គឺលោកខៀវសំផននិង លោក នួនជា។ បទចោទនៅក្នុងសំណុំរឿងនេះ មានដូចជាអំពើប្រល័យពូជសាសន៍ប្រឆាំងនឹងជនជាតិចាមនិងជនជាតិវៀតណាម និងការរៀបអាពាហ៍ពិពាហ៍ដោយបង្ខំព្រមទាំងការរំលោភសេពសន្ថវៈជាដើម។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិថា សក្ខីកម្មរបស់លោកស្រី Elizabeth Becker មានសារសំខាន់ណាស់ពីព្រោះតែលោកស្រីគឺជាសាក្សីជំនាញដែលបានដឹងរឿងរ៉ាវយ៉ាងច្រើនក្នុងរបបខ្មែរក្រហម។ បើយោងតាមមន្ត្រីអ្នកនាំពាក្យដដែល សាលាក្តីគ្រោងចំណាយពេល៤ថ្ងៃសម្រាប់ស្តាប់ការបំភ្លឺរបស់សាក្សីជំនាញរូបនេះ។ ប្រសិនបើចាំបាច់សវនាការស្តាប់សក្ខីកម្មលោកស្រី ប៊ែកឃើនឹងត្រូវបន្តទៅសប្តាហ៍ក្រោយទៀត។
យ៉ាងណាក៏ដោយ ពេលចៅក្រមសាកសួរ លោកស្រី ប៊ែកឃើ ដែលមានអាយុ ៦៧ ឆ្នាំ ទៅហើយនោះហាក់ដូចជាបង្ហាញការភ្លេចភ្លាំងមួយចំនួនដោយសារតែពេលវេលាកន្លងទៅយូរមកហើយ។ នៅថ្ងៃចន្ទនេះ លោកស្រី ត្រូវបានចោទសួរដំបូងគេដោយ ចៅក្រមអន្តរជាតិទាក់ទងទៅនឹងរឿងរ៉ាវដែលលោកស្រីបានជួបប្រទះក្នុងរបបកម្ពុជាប្រជាធិបតេយ្យ ជាពិសេសជំនួបផ្សេងៗដែលលោកស្រីបានធ្វើជាមួយមេដឹកនាំខ្មែរក្រហម និងអ្វីដែលលោកស្រីបានឃើញក្នុងអំឡុងទស្សនកិច្ចនៅកម្ពុជាកាលពីចុងឆ្នាំ ១៩៧៨ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ