ព្រះរាជពិធីដង្ហែព្រះបរមអដ្ឋិ ព្រះបរមរតនកោដ្ឋ បានបញ្ចប់ តែអ្នកនយោបាយខ្មែរមិនទាន់ត្រូវរ៉ូវគ្នា
ព្រះរាជពិធីបុណ្យដង្ហែព្រះបរមអដ្ឋិ ព្រះបរមរតនកោដ្ឋ រយៈពេលបីថ្ងៃ បានបញ្ចប់ជាផ្លូវការហើយ ក្រោយពីព្រះបរមអដ្ឋិ ព្រះបរមរតនកោដ្ឋ ត្រូវបានយកទៅតំកល់នៅលើកំពូលចេតិយគន្ធបុប្ឆា កាលពីព្រឹកមិញ ដែលជាការបង្ហាញថា ជាព្រះរាជឋានប្រកបដោយព្រះបរមសុខដ៏ក្សេមក្សាន្ត។ ចំណែកឯសន្តិសុខសណ្តាប់ធ្នាប់រយៈពេលបីថ្ងៃនេះវិញ លោក ប៉ា សុជាតិវង្ស អភិបាលក្រុងភ្នំពេញបានវាយតម្លៃថា បានប្រព្រឹត្តទៅដោយរលូន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ព្រះបរមអដ្ឋិ ព្រះបរមរតនកោដ្ឋ ត្រូវបានបញ្ចុះរួចរាល់ហើយ នៅក្នុងព្រះបរមចេតិយគន្ធបុប្ឆា នាវេលាម៉ោង ៦ព្រឹកថ្ងៃសៅរ៍ ១រោច ខែអាសាឍ ត្រូវនឹងថ្ងៃទី១២ ខែកក្កដា ឆ្នាំ២០១៤ ទៅតាមកម្មវិធីសាសនា និងតាមការសព្វព្រះរាជហឫទ័យ របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ មុនីនាថសីហនុ។
ព្រះបរមអដ្ឋិ ត្រូវបានហែយកទៅតម្កល់នៅលើកំពូលប្រាង្គព្រះចេតិយគន្ធបុប្ផា ក្នុងបរិវេណព្រះវិហារព្រះកែវមរកតដែលជាការបង្ហាញថា «ជាព្រះរាជឋានប្រកបដោយព្រះបរមសុខដ៏ក្សេម ក្សាន្ត»។ ហើយនេះក៏ជាការសំរេចបំណងចុងក្រោយ របស់សម្តេចឳនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ដែលព្រះអង្គធ្លាប់មានព្រះបំណងចង់បានព្រះអដ្ឋិរបស់ទ្រង់ ត្រូវបានតម្កល់ជាមួយនឹងព្រះរាជបុត្រី គឺអ្នកអង្គម្ចាស់ គន្ធបុប្ឆា ដែលបានសុគត កាលពីឆ្នាំ១៩៥២ នៅក្នុងព្រះជន្ម៤ព្រះវស្សា។
សូមបញ្ជាក់ថា ខណៈដែលព្រះរាជពិធីតម្កល់ព្រះបរមអដ្ឋិ ព្រះបរមរតនកោដ្ឋ នៅលើប្រាង្គព្រះចេតិយគន្ធបុប្ឆា កំពុងរៀបចំធ្វើនៅខាងក្នុងព្រះបរមរាជវាំងទៅតាមប្បវេណីក្សត្រនោះ នៅខាងក្រៅព្រះបរមរាជាំងឯណេះវិញ ក៍មានការបាញ់កាំភ្លើងធំជាលើកចុងក្រោយចំនួន១២ដើម ដែលជាការបាញ់ ចំនួន១០៨គ្រាប់ ជាគំរប់ នៅក្នុងថ្ងៃទី៣ នៃព្រះរាជពិធីដង្ហែ និងតម្កល់ព្រះអដ្ឋិ ព្រះបរមរតនកោដ្ឋ។
ជាមួយគ្នានេះ ពុទ្ធបរិស័ទជាច្រើនពាន់នាក់ ក៍បានរៀបចំប្រារព្ធពិធីបង្សុកូល និងរាប់បាត្រ ប្រគេនព្រះសង្ឃចំនួន ៣.៦០០ អង្គ ដើម្បីថ្វាយព្រះរាជកុសលជូនដួងព្រះវិញ្ញាណក្ខន្ធ ព្រះបរមរតនកោដ្ឋ ហើយ ប្រជាពលរដ្ឋខ្មែរទូទៅ ក៏ត្រូវបានអនុញ្ញាតឲ្យចូលអុជធូប នៅក្នុងព្រះបរមរាជវាំង ដើម្បីឧទ្ទិសព្រះរាជកុសល ថ្វាយព្រះបរមរតនកោដ្ឋចាប់ពីវេលាម៉ោង១១ព្រឹក រហូតដល់ម៉ោង៣រសៀល។
ទាក់ទងទៅនឹងសន្តិសុខសណ្តាប់ធ្លាប់វិញ លោក ប៉ា សុជាតិវង្ស អភិបាលក្រុងភ្នំពេញបានវាយតម្លៃថា រយៈពេលបីថ្ងៃនេះ ព្រះរាជពិធីបានប្រព្រឹត្តទៅដោយរលូន ហើយថា ប្រជាពលរដ្ឋរាប់ម៉ឺននាក់ បានចូលរួមនៅក្នុងព្រះរាជពិធីនេះ។
ប៉ុន្តែយ៉ាងណាក៍ដោយ តើក្រោយពីព្រះរាជពិធីបុណ្យដង្ហែព្រះបរមអដ្ឋិ ព្រះបរមរតនកោដ្ឋនេះបញ្ចប់ទៅ អ្នកនយោបាយខ្មែរ នឹងវិលមកកាន់តុចរចាឡើងវិញ ដើម្បីដោះស្រាយបញ្ហាជាប់គាំងនយោបាយ ទៅតាមព្រះរាជបណ្តាំរបស់ព្រះបរមរតនកោដ្ឋដែររឺយ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ