ប្រធានអង្គការ Underprivileged Children School ត្រូវតុលាការសួរនាំនៅថ្ងៃពុធនេះ
ប្រធានអង្គការ Underprivileged Children School ត្រូវប៉ូលីសប្រឆាំងការជួញដូរមនុស្សនិងការពារអនីតិជនខេត្តសៀមរាប បញ្ជូនទៅកាន់តុលាការហើយនៅថ្ងៃពុធទី០៩កក្កដា ឆ្នាំ២០១៤នេះ។ លោក ឡុង វេហា ត្រូវបានប៉ូលីសចាប់ខ្លួន កាលពីថ្ងៃទី០៧កក្កដា នៅក្នុងស្រុកមួយនៃខេត្តសៀមរាប ដោយសង្ស័យថាជាប់ពាក់ព័ន្ធ ទៅនឹងការជួញដូរ និងនាំក្មេងៗទៅឲ្យជនបទេសរួមភេទជាថ្នូរ និងការផ្តល់ជំនួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
លោក ឡុង វេហា, ប្រធានអង្គការ Underprivileged Children School ត្រូវបានប៉ូលីសប្រឆាំងការជួញដូរមនុស្សនិងការពារអនីតិជនខេត្តសៀមរាប បញ្ជូនទៅកាន់តុលាការ នៅព្រឹកថ្ងៃទី០៩ កក្កដានេះ ដើម្បីសាកសួរពីបទសង្ស័យថាបានជាប់ទាក់ទងទៅនឹងការជួញដូរ និងនាំក្មេងៗប្រុស-ស្រី ទៅឲ្យរួមភេទជាមួយជនបរទេស។
ក៏ប៉ុន្តែគេមិនទាន់ដឹងពិតប្រាកដថា ជនសង្ស័យត្រូវទទួលការចោទប្រកាន់ពីបទល្មើសអ្វីនៅឡើយទេ ខណៈរូបគេកំពុងស្ថិតនៅក្នុងតុលាការនៅឡើយ។
លោក សំលៀង សីលា ប្រធានអង្គការសកម្មភាព ដើម្បីកុមារប្រចាំ នៅប្រទេសកម្ពុជាថ្លែងនៅថ្ងៃនេះថា លោកកំពុងតាមដានដំណើររឿងនេះយ៉ាងយកចិត្តទុកដាក់ ដោយសារតែបញ្ហានេះបានជះឥទ្ធិពលធំធេង ទៅដល់ជនរងគ្រោះដែលបានទៅស្នាក់នៅក្នុងមណ្ឌលរបស់អង្គការ។
លោក សំលៀង សីលា បន្តថាលោកបាទទួលព័ត៌មានពីភាពមិនប្រក្រតីនេះដែរ ហើយក៏ដឹងបានតាមរយៈការសាកសួរក្មេងប្រុសនៅក្នុងមណ្ឌលថាមានជាប់ពាក់ព័ន្ធទៅនឹងជនបរទេសម្នាក់ផងដែរទាក់ទងទៅនឹងការយកក្មេងៗទៅឲ្យរួមភេទនឹងជនបរទេស។ លោកថាការគ្រប់គ្រងជាមណ្ឌលរបស់ជនសង្ស័យ មិនមានស្តង់ដារនិងមិនបានចុះបញ្ជីទីតាំងត្រឹមត្រូវឡើយ។
មន្ត្រីតុលាការការ មិនអាចទាក់ទងបានទេនៅថ្ងៃនេះ ក៏ប៉ុន្តែការចាប់ខ្លួនប្រធានអង្គការវ័យ ៣២ឆ្នាំរូបនេះ បានត្រូវបានធ្វើឡើង បន្ទាប់ពីមានការសាកសួរ របស់ប៉ូលីសជំនាញខេត្តសៀមរាប ទាក់ទិននឹងបទសង្ស័យមួយចំនួន ដូចជាការសុំជំនួយពីបរទេសតាមប្រព័ន្ធ អនឡាញ និង សុំជំនួយដោយផ្ទាល់ ហើយប្រគល់ក្មេងៗ ដែលប៉ូលីសរកឃើញចំនួន ៩នាក់នៅជាមួយនោះទៅឲ្យម្ចាស់ជំនួយមួយចំនួន ដែលជាជនបរទេសរួមភេទជាថ្នូនឹងការផ្តល់ជំនួយ, នេះបើតាមមេប៉ូលីសការិយាល័យប្រឆាំង ការជួញដូរមនុស្សនិងការពារអនីតិជន ខេត្តសៀមរាប ថ្លែងប្រាប់ប្រព័ន្ធផ្សព្វផ្សាយក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ