វីរៈស៊ុមខ្វាមឃីត បានចាកចេញពីកម្ពុជាជាមួយគណៈប្រតិភូថៃ
លោក វីរៈស៊ុមខ្វាមឃីត នៅព្រឹកម៉ោង ១០ថ្ងៃទី ២កក្កដានេះ បានចាកចេញពីទឹកដីកម្ពុជាតាមព្រលានយន្តហោះអន្តរជាតិភ្នំពេញ ជាមួយគណៈប្រតិភូរដ្ឋមន្ត្រីស្តីទីការបរទេសថៃ។ ការដោះលែងសកម្មជនអាវលឿងរូបនេះ គឺធ្វើឡើងតាមព្រះរាជក្រឹត្យរបស់ព្រះមហាក្សត្រ ដែលបានត្រាស់បង្គាប់ឱ្យដោះលែងកាលពីថ្ងៃទី០១កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សកម្មជនអាវលឿងថៃ លោកវីរៈ ស៊ុមខ្វាមឃីត បានធ្វើដំណើរវិលត្រឡប់ ទៅកាន់ប្រទេសថៃវិញជាមួយនឹងគណៈប្រតិភូថៃ ដែលបានបិទបញ្ចប់ទស្សនៈផ្លូវរដ្ឋ នៅកម្ពុជា។ មានសម្លៀកបំពាក់សាមញ្ញ អាវឆ្នូត លោក វីរៈ ស៊ុមខ្វាមឃីត ដែលមានពាក់វែនតាម្ញ៉ូបផង បានដើរអមពីក្រោយជាប់រដ្ឋមន្ត្រីស្តីទីការបរទេសថៃ លោក ស៊ីហាសាក់ ភួងកេតកែវ ឡើងយន្តហោះតាមច្រកទ្វារពិសេស។
ការដោះលែងសកម្មជនអាវលឿងថៃរូបនេះ គឺធ្វើឡើងតាមព្រះរាជក្រឹត្យរបស់ព្រះមហាក្សត្រខ្មែរ ដែលបានត្រាស់បង្គាប់ដោះលែង កាលពីថ្ងៃអង្គារទី ១កក្កដាម្សិលមិញ។ ហើយការដោះលែងសកម្មជនអាវលឿងថៃនេះទៀតសោត គឺស្របពេលនឹងដំណើរទស្សនកិច្ចរបស់រដ្ឋមន្ត្រីស្តីទីការបរទេសថៃ ដែលបានមកបំពេញទស្សនៈកិច្ចរយៈពេលពីរថ្ងៃនៅកម្ពុជា។ លោក វីរៈ ស៊ុមខ្វាមឃីត ត្រូវបានតុលាការកម្ពុជាចាប់កាត់ទោសឱ្យជាប់ពន្ធនាគាររយៈពេល ៨ឆ្នាំ កាលពីឆ្នាំ២០១១ ក្រោមបទ ឆ្លងដែនខុសច្បាប់ចូលទឹកដីកម្ពុជា និងចូលយកការណ៍ នៅក្នុងបន្ទាយយោធាកម្ពុជា នៅព្រំដែនខេត្តបន្ទាយមានជ័យ។
អ្នកទោសជនជាតិថៃរូបនេះ មិនទាន់បានបំពេញទោស ២ភាគ៣ នៃទោសសរុបរបស់ខ្លួន ដើម្បីអាចទទួលបានការលើកលែងទោសពីព្រះមហាក្សត្រកម្ពុជានៅឡើយទេ។ បើទោះបីជាសកម្មជនអាវលឿងថៃរូបនេះ ត្រូវបានបន្ធូរបន្ថយទោសចំនួន ៦ខែម្តងហើយ កាលពីអំឡុងពេលនៃព្រះរាជពិធីថ្វាយព្រះភ្លើងព្រះបរមរតនកោដ្ឋក៏ដោយ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានលើកឡើងថា ការដោះលែងសកម្មជនអាវលឿងថៃនេះ គឺមិនមែនស្ថិតនៅក្រោមសម្ពាធនយោបាយ របស់ប្រទេសថៃ ឬប្រទេសណាមួយនោះទេ។ ពោលគឺគោរពតាមគោលការណ៍ច្បាប់ និងការគោរពសិទ្ធិមនុស្ស។ យ៉ាងណាក៏ដោយ លោកផៃស៊ីផាន បានគូសបញ្ជាក់ថា ការស្នើសុំដោះលែងពលករខ្មែរចំនួន ១៤នាក់ នៅក្នុងប្រទេសថៃ និងការដោះលែងលោក វីរៈ ស៊ុមខ្វាមឃីត គឺមិនមែនជាការដោះដូរអ្នកទោស រវាងកម្ពុជា និងថៃនោះទេ។
បើទោះបីជាបែបណាក៏ដោយ ទន្ទឹមនឹងសេរីភាពរបស់សកម្មជនអាវលឿងថៃ វីរៈស៊ុមខ្វាមឃីត ពលករខ្មែរចំនួន ១៤នាក់ ដែលកំពុងជាប់ពន្ធនាគារ ក្នុងទឹកដីថៃ ដែលលោកនាយករដ្ឋមន្ត្រីហ៊ុន សែន បានស្នើសុំឱ្យដោះលែងនោះ គឺមិនទាន់មានសញ្ញាវិជ្ជមាននៅឡើយនោះទេ។ នេះបើតាមការបញ្ជាក់ពីលោក កុយ គួង អ្នកនាំពាក្យក្រសួងការបរទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ