ភស្តុតាងថ្មីទៀត នៃគ្រោះថ្នាក់ ដោយសារគម្លាតកាន់តែធំ រវាងអ្នកមាន និងអ្នកក្រ!
ចុះផ្សាយនៅថ្ងៃ៖
ស្តាប់ - ០៥:១០
ពលករខ្មែររាប់សែននាក់ ត្រូវបានអាជ្ញាធរថៃចាប់បញ្ជូនឲ្យត្រឡប់មកប្រទេសវិញយ៉ាងតក់ក្រហល់រយៈពេលចុងក្រោយនេះ។ ការវិលត្រឡប់របស់ពលករក្រីក្រដ៏ច្រើនសន្ធឹកសន្ធាប់ទាំងនោះ បានបង្ហាញអំពីភាពក្រីក្រតោកយ៉ាកយ៉ាងខ្លាំងរបស់ពលរដ្ឋខ្មែរជាច្រើន។ ទន្ទឹមនឹងនោះដែរ ក៏មានភស្តុតាងមួយចំនួន ដែលបង្ហាញថា ក្រុមអ្នកមានកំពុងតែមានឡើងៗ ហើយសេចក្តីត្រូវការរបស់ពួកគេ ក៏កាន់តែខ្ពស់ជាងមុនដែរ។ គម្លាតរវាងអ្នកមាន និងអ្នកក្រដែលកាន់តែរីកធំឡើងៗ ជាលំដាប់ជាសញ្ញាគ្រោះថ្នាក់ ដែលគេមិនអាចមើលរំលងបានឡើយ។
បន្ថែមពីលើវត្តមាននៃរថយន្តទំនើបៗតម្លៃខ្ពស់កប់ពពកដែលកំពុងតែចរាចរណ៍ព្រោងព្រាតនៅលើដងផ្លូវក្នុងទីក្រុង រថយន្ត Rolls Royce ដែលមានតម្លៃរាប់សិបម៉ឺនរហូតដល់មួយលានដុល្លារក៏បានមកដល់ទីផ្សារកម្ពុជាដែរ។ នេះគឺជាភស្តុតាងថ្មីមួយទៀតដែលបង្ហាញថាក្រុមអ្នកមានកាន់តែមានឡើងៗហើយសេចក្តីត្រូវការរបស់ពួកគេត្រូវបានឆ្លើយតបបានយ៉ាងល្អ។
ក្រៅពីនោះ ការរីកដុះដាលព្រោងព្រាតនៃសំណង់អាគារខ្ពស់ៗ ផ្ទះវីឡា ក្លឹបរាត្រី ខារ៉ាអូខេ និងក្លឹបកម្សាន្តសប្បាយផ្សេងៗទៀតនៅក្នុងរាជធានីនិងទីប្រជុំជននានាក៏ជាសក្ខីភាពនៃតម្រូវការសប្បាយចាយលុយមិនចេះអស់របស់ពួកអ្នកមានដែរ។ ប៉ុន្តែ នៅឯជ្រុងម្ខាងទៀត ពលរដ្ឋខ្មែរជាច្រើនដើរត្រាច់រង្គាត់គ្រប់ច្រកល្ហកដើម្បីស្វែងរកប្រាក់ចិញ្ចឹមជីវិតដោយលំបាក។ អ្នកខ្លះត្រូវប្រថុយជីវិតឆ្លងដែនខុសច្បាប់ទៅស៊ីឈ្នួលគេនៅក្នុងប្រទេសជិតខាង។
ការចាប់បញ្ជូនខ្លួនពលករខ្មែរខុសច្បាប់រាប់សែននាក់ឲ្យត្រឡប់មកប្រទេសវិញនៅពេលនេះគឺជាសក្ខីភាពជាក់ស្តែងបំផុតនៃភាពតោកយ៉ាករបស់ជនជាតិខ្មែរជាច្រើនតែសេចក្តីត្រូវការរបស់ពួកគេមិនសូវមានអ្នកណាគិតគូរដល់។ បញ្ហានេះហើយដែលជំរុញឲ្យគម្លាតរវាងអ្នកមាន និងអ្នកក្រផុសត្រដែតឡើងហើយកំពុងញែកពលរដ្ឋខ្មែរទាំងពីរក្រុមឲ្យស្ថិតនៅក្នុងពិភពពីរខុសគ្នាដាច់ស្រឡះរហូតហៅគ្នាមិនលឺ។
ជាការពិតណាស់ ក្នុងសង្គមមនុស្សតែងមានអ្នកមាននិងអ្នកក្រជារឿងធម្មតា។ គ្មានសង្គមណាមួយនៅលើលោកយើងនេះដែលមនុស្សរស់នៅស្មើភាពគ្នាទាំងស្រុងនោះឡើយ។ ការស្រមើស្រមៃចង់កសាងសង្គមមួយស្មើភាពរបស់ពួកខ្មែរក្រហមដើម្បីលុបបំបាត់វណ្ណៈសង្គមនោះ ទីបំផុតបាននាំប្រទេសជាតិឲ្យធ្លាក់ក្នុងវាលពិឃាតដ៏វិនាសកម្មមួយ។ ដូច្នេះ អ្នកមាននិងអ្នកក្រគឺជាធាតុផ្សំរបស់សង្គមមនុស្សដែលមិនអាចចៀសវាងបាន។ ម្យ៉ាងទៀត ការកើនឡើងនៃចំនួនអ្នកមានឬក៏កើនឡើងនៃទ្រព្យសម្បត្តិរបស់ពួកគេគឺជាដំណឹងល្អទៅវិញទេ ប្រសិនបើទ្រព្យសម្បត្តិនោះបានមកដោយរបរសុចរិតនោះ។
ប៉ុន្តែ អ្វីដែលគួរឲ្យកត់សម្គាល់សម្រាប់សង្គមខ្មែរបច្ចុប្បន្នគឺ ក្រោយសម័យប៉ុលពតខ្មែររាល់រូបបានចាប់ផ្តើមកសាងជីវភាពគ្រួសារពីបាតដៃទទេដូចៗគ្នា។ ស្រាប់តែជាង៣ទសវត្សរ៍ ក្រោយមកគម្លាតរវាងអ្នកមាននិងអ្នកក្របានចែកភពពីរឲ្យនៅឆ្ងាយពីគ្នាស្រឡះ។ បញ្ហានេះបណ្តាលមកពីកត្តាចៃដន្យផង កត្តាសេដ្ឋកិច្ចផង និង កត្តានយោបាយផង។ កត្តាចៃដន្យមានន័យថា មានគ្រួសារខ្មែរជាច្រើនបានក្លាយខ្លួនជាអ្នកមានដោយមិនដឹងខ្លួន ដោយសារអចលនទ្រព្យដូចជាដីធ្លី ឬផ្ទះសម្បែងជាដើម ជាពិសេសអ្នកដែលមានផ្ទះសម្បែងក្នុងទីក្រុងភ្នំពេញតែម្តង។
ចំណែកឯកត្តាសេដ្ឋកិច្ចវិញ អ្នកដែលពូកែខាងធ្វើជំនួញក៏អាចក្លាយជាថៅកែបានយ៉ាងស្រួលដោយសារតែក្រោយរបបខ្មែរក្រហមខ្មែរដែលចេះធ្វើជំនួញពិតប្រាកដមានចំនួនតិចតួចប៉ុណ្ណោះ។ ប៉ុន្តែ គេក៏មិនត្រូវភ្លេចដែរថា ក៏មានអ្នកជំនួញខ្លះបានឆ្លៀតឱកាស ដែលសង្គមមានអំណោយផលដល់អ្នកមានដើម្បីរកផលប្រយោជន៍ផ្ទាល់ខ្លួនដោយដោយប្រើប្រាស់វិធីមិនសុចរិតផងដែរ។ វិធីមិនសុចរិតមានប្រសិទ្ធភាពដោយសារតែអំណាចទឹកប្រាក់ជួយពួកគេឲ្យរួចផុតពីសំណាញ់ច្បាប់បាន។
កត្តានយោបាយក៏ជាអ្វីដែលគេមិនត្រូវមើលរំលងដែរពោលគឺការប្រើប្រាស់ឥទ្ធិពលនៃអំណាច ដែលគ្មានអ្នកណាហ៊ានប៉ះពាល់គឺជាវិធីដ៏ងាយស្រួលក្នុងការរកផលប្រយោជន៍ផ្ទាល់ខ្លួន។ កត្តាចុងក្រោយនេះបានធ្វើឲ្យមនុស្សជាច្រើនក្លាយជាអ្នកមានដោយស្រួលបំផុត។ ដោយសារតែទ្រព្យសម្បត្តិបានមកដោយស្រួលបែបនេះហើយបានជាពួកគេចាយវាយប្រាក់ដូចក្រដាស ខណៈដែលអ្នកក្រីក្រត្រូវចំណាយកម្លាំងញើសឈាមដោយលំបាកលំបិនបំផុតទម្រាំបានប្រាក់បន្តិចបន្តួចសម្រាប់ចិញ្ចឹមជីវិត។
ដូច្នេះ ស្របពេលដែលប្រទេសកំពុងមានកំណើនសេដ្ឋកិច្ចល្អ រដ្ឋាភិបាលគួរងាកមកចាប់អារម្មណ៍ឡើងវិញចំពោះបញ្ហានេះហើយផ្តើមដោះស្រាយជាបន្ទាប់នូវបញ្ហាចំពោះមុខផងនិងបញ្ហាយូរអង្វែងផង។ បញ្ហាចំពោះមុខគឺដោះស្រាយការងារឲ្យពលករដែលត្រូវគេបញ្ជូនមកពីប្រទេសថៃផងនិងពលករដែលខ្វះការងារធ្វើនៅក្នុងស្រុកផង។ ចំណែកបញ្ហាយូរអង្វែងគឺការកែតម្រូវគោលនយោបាយអភិវឌ្ឍន៍សង្គមដោយធ្វើយ៉ាងណាឲ្យសង្គមមានអំណោយផលចំពោះអ្នកក្រីក្រដើម្បីឲ្យពួកគេចាកចេញពីភាពក្រីក្រឲ្យបានឆាប់តាមដែលអាចធ្វើបាន។
ប្រសិនបើមិនដូច្នោះទេ គម្លាតកាន់តែឆ្ងាយទៅៗរវាងអ្នកមាននិងអ្នកក្រប្រៀបបាននឹងគ្រាប់បែកកំណត់ម៉ោងដែលនឹងផ្ទុះឡើងនៅពេលណាមួយជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ